Read Zou 2 SAMUEL 11 Bible Online

2 SAMUEL 11 - Zou bible

2 SAMUEL 11

¹Galsim dingin kumpite a kuonkia hun uh khuokhal lai-in David in Joab, le a optonpi a uliente, le Israel zosie a sawl hi; amate in Ammon-te a sugawp vua, Rabbah a kui-im uhi. Ahi vangin Jerusalem-ah David a om hi.

²Khatvei nitah kai lamin a lupna panin David tho a, kumpi inn khumvum tungah a vah kawikawi ciengin inn khumvum panin a kipumsil numei khat galmu kha hi; tua numei nu pen melhoi mama hi.

³David in tua numei a kan dingin mi khat a sawl hi. “Tua nu, Eliam’ tanu, Hit mi Uriah’ zi Bathsheba hi, ci-in kigen hi.

⁴Tuaci’n David in kamtaite sawlin tua nu a hlansah hi. Ama kungah tua nu pei a, ama in tua nu a luppi hi. (Khum hun lai tahin tua nu a nin nei zaw a kisiensuo laitah ahi hi.) Tua ciengin a inn ah tua nu a pei hi.

⁵Tua numei a gai hi; tuale ama in mi sawlin David kungah, “Nau ka paai hi,” ci-in a gensah hi.

⁶Tuaci’n David in Joab kungah thu puoh a, “Hit mi Uriah ka kungah hing sawl in,” a ci hi. Tuale Joab in David kungah Uriah sawl hi.

⁷Ama kungah Uriah a tun ciengin David in Joab bangci op a, mite bang a ci vua, galdona bangci mavan ahei cite a dong hi.

⁸Tua ciengin David in Uriah kungah, “Na inn ah peisuh inlen na keng va sil ta’n,” a ci hi. Kumpipa’ inn panin Uriah pusuoh a, kumpipa tung panin letsong khat in ama a nuazui hi.

⁹Ahi vangin a pupa’ nasem zosie tawh kumpipa’ kotpi gei-ah Uriah lumin a inn ah peisuh lo hi.

¹⁰Amate in David kungah, “Uriah a inn ah peisuh lo hi,” ci-in a gen ciengun David in Uriah kungah, “Khuolzin hing tung na hi sih amah? Bang dingin na inn ah peisuh lo na hei?” a ci hi.

¹¹Uriah in David kungah, “Buhte[56] sungah singkuong, Israel, le Judah a om uhi; tuale ka pu Joab le ka pu’ nasemte lopang-ah gieh uhi; tua ziehin bang dingin anne tuidawn ding le ka zi tawh lumton dingin ka inn ah peisuh thei mawh ding ka hei?” a ci hi. TOPA a hing ahi bang ma le nangma a hing na hi bang ma-in tam bangin ka gamta vawt sih ding hi,” a ci hi.

¹²Tua ciengin David in Uriah kungah, “Tuni zong tanah om phot inlen zing cieng kang peisah ding hi,” a ci hi. Tuaci’n khum ni-in zong Jerusalem-ah Uriah a taam hi. A zing ciengin

¹³David in ama an le zu nehpi dingin ciel a, ama zu a khamsah hi; nitah lamin a pu’ nasemte tawh a lupna tunga lum dingin ama pusuoh a, hinanle a inn lamah a peisuh sih hi.

¹⁴Zingmawng ciengin David in Joab lai khat hlah a, tua lai Uriah in a puosah hi.

¹⁵A laihlah sungah, “Galhanna pen munah Uriah a madawhin pangsah inlen, ama kivatpua-in a si thei nadingin ama kung panin nangma nuakin in,” ci-in a giel hi.

¹⁶Joab in khuopi a bulu laitahin mihat galhangte om hi, ci-a a theina munah Uriah a pangsah hi.

¹⁷Khuo sung mite kuonin Joab tawh a kido uhi; tuale mite lahah David’ nasemte kimkhat a si hi. Hit mi Uriah zong kithat hi.

¹⁸Tua ciengin Joab in mi sawlin gal kidona thu zosie David kungah a gen hi;

¹⁹tuale ama in kamtaipa thuhil a, “Gal kidona thu zosie kumpipa kungah na gen zaw ciengin,

²⁰kumpipa lungthahin ama in na kungah, ‘Bang dinga khuopi lam nai senga galdo dinga va kuon ta na hi uh ahei? Kulpi bang tung panin ei kap va uh ci na thei sih uh amah?

²¹Jerubbaal’[57] tapa Abimelech koi in that ahei? Numei khat in kul tung panin ama tungah an-gawina suongpeh a tungta lam a khiehsuh ziehin Thebez ah ama si hi lo amah? Bang zieha kulpi lam nai-a pei na hi uh ahei?’ ang ci leh, ‘Na nasempa Hit mi Uriah zong si hi,’ na ci ding hi,” a ci hi.

²²Tuaci’n kamtaipa pei-in a tung a, Joab in a gen dinga a sawl thu zosie David kungah a gen hi.

²³Kamtaipa in David kungah, “Mite in ei thazaw-in gamlahah ei do dingin ang kuon uhi; hinanle kote in zong tunkot lutna-ah amate ka notkia uhi.

²⁴Tua ciengin kul panin thalkap siemte in na nasemte ei na kap uhi; kumpipa’ nasem pawlkhat si-in Hit mi na nasem Uriah zong a si hi,” a ci hi.

²⁵David in kamtaipa kungah, “Joab kungah tam bangin na gen ding hi, ‘Tami thu ziehin kilungkhamsah sin, bangzieh ahei cile tu-in namsau in mi khatzaw cienga khat a vat ngai ma hi lel hi; na khuopi sim hanciemin lumlet in,’ ci-in Joab hantawh in,” a ci hi.

²⁶Uriah’ zi in a pasal si a zah bepin a pasal ziehin da-in a kap hi.

²⁷Kaa le mau teng a ven zaw ciengin David in mi sawlin ama hlansah a, ama David’ zi suohin ama tawh tapa khat a nei hi. Hinanle David’ gamtatna tungah TOPA a lungkim sih a,