Read Zou 2 SAMUEL 14 Bible Online

2 SAMUEL 14 - Zou bible

2 SAMUEL 14

¹Tu-in Absalom tungah kumpipa’ lungsim a om lamtah Zeruiah’ tapa Joab in a thei hi.

²Joab in Tekoa ah mi sawlin khum mun panin numei pil khat zawpi hi. Ama in tua numei kungah, “A kap kipang in; dana puonte sil in, sathau kinu sinlen, ni tampi sung si-uop numeite bangin om in.

³Kumpipa kungah pei inlen ama kungah tam bangin gen in,” a ci hi. Tuale Joab in tua nu tungah a thugen dingte a mop hi.

⁴Kumpipa kungah Tekoa numei a tun ciengin a mai tuolah kunin zatahna a pie hi. Ama in, “Ei hu in, Kumpipa aw!” a ci hi.

⁵Kumpipa in tua nu kungah, “Na lungkhamna bang ahei?” a ci hi. Tua nu in dawng a, “Kadei, kei pen meigong numei khat ka hi hi; ka pasal lah si zo ta hi.

⁶Na nasem nu in tapa ni nei a, lolai-ah ama gel a kihau uhi; a phel ding koima om loin khat in a khat pa satin a that hi.

⁷Tu-in a innkuon buppi-un na nasem nu’ langkhatah a ding uhi. Amate in, ‘Ama in a tha a sanggampa’ hinna tangin ama ka tha thei nadingun a sanggampa a satpua pa ei pie in, gamhluo pa nangawn zong ka susie ding uhi,’ ei ci uhi. Amate in a omlai ka kinepna pa tua bangin ei suhsietpieh vua, leitungah ka pasal’ min le a suonlehlah themkhat zong a om lo dingin ei bawl uhi,” a ci hi.

⁸Tua ciengin kumpipa in tua nu kungah, “Na inn ah pei in, keima in nang tungtang thu ka pie ding hi,” a ci hi.

⁹Tekoa numei in kumpipa kungah, “Ka pu kumpipa aw, kei tung le ka innkuon tungah mawna tu hinlen, kumpipa le a mangtona mawpeng taheh,” a ci hi.

¹⁰Kumpipa in, “Na kungah mi khatpo in thu khatpo ang gen leh ka kungah tua mipa hing peipi in. Ama in nang ang thamkia ngai nawn sih ding hi,” a ci hi.

¹¹Tua ciengin ama in, “Sisan phulapa in that nawn loin ka tapa a kisuhsiet lo nadingin hepina tawh kumpipa in na lungsim sungah TOPA na Pasien hing phawh bo in,” a ci hi. Ama in, “TOPA a hing ahi ma bangin na tapa’ samzam khat zong tuolah kie lo ding hi,” a ci hi.

¹²Tua ciengin numei nu in, “Hepina tawh na nasem nu in ka pu kumpipa tungah kam khat ei gensah in,” a ci hi. Ama in, “Gen in,” a ci hi.

¹³Numei nu in, “Tua ahile Pasien’ mite langkhatah bang dinga tam bang na bawl sawm ahei? Bang ding ahei cile tam bang khensatna a piehna-ah kumpipa in a gamdel mipa inn ah na hlatkia masangsie, kumpipa ama le ama a kimawsah ahi hi.

¹⁴Eite i unpi-in i si ding hi; eite pen tuola kibuo a kiluoh thei lo tui tawh kibang i hi uhi. Ahi vangin Pasien in hinna khat pen a mawh lah sih hi; ama in a opna pana a kipuse mi khat a khantana a kihawlkhiet lo nadingin ama in lampi gelpieh hi.[68]

¹⁵Tu-in ka pu kunga tam thu gen dinga ang pei ka hi hi, azieh pen mite in kei ei zausah hi; na nasem nu in, ‘Kumpipa kungah thu ka gen ding hi; kumpipa in a nasem nu’ ngetna ang sem kha ding hi.

¹⁶Bangzieh ahei cile kumpipa in za-in, Pasien’ gouluo panin kei le ka tapa ei sumangton ding mipa’ khut sung panin a nasem nu a hunkhie ding hi,’ ci-in a ngaisun hi.

¹⁷Na nasem nu in, ‘Ka pu kumpipa’ kammal in ei toidamsah ding hi,’ ci-in ngaisun hi; bangzieh ahei cile ka pu kumpipa pen a sie le a pha khentel thei Pasien’ vantungmi tawh kibang hi. Nang tawh TOPA na Pasien hing omton taheh!” a ci hi.

¹⁸Tua ciengin kumpipa in numei nu dawng a, “Kang dawh popo ei pha sin,” a ci hi. Numei nu in, “Ka pu kumpipa in gen in,” a ci hi.

¹⁹Kumpipa in, “Tam thu zosie Joab’ hing thupieh ahiei mah?” a ci hi. Numei nu in dawng a, “Ka pu kumpipa aw! nang a hing tahtah na hi ma bangin, ka pu kumpipa in na gensa thute panin koima zietlam hile veilam hile a piel thei sih hi. Bangzieh ahei cile kei ei sawlpa pen na nasem pa Joab ahi hi; na nasem nu’ kam sunga tam thu ei mop pa zong khu ama ma ahi hi.

²⁰Na thu peizie na khel nadinga na nasempa Joab in tam thu a bawl ahi hi. Ahi vangin ka pu in leitunga om na vannuoi theithei nadingin Pasien’ vantungmi’ pilna tawh a kibang pilna na nei hi,” a ci hi.

²¹Tua ciengin kumpipa in Joab kungah, “Hoi mama hi, tam kang pie hi; va pei inlen tangval Absalom hing zawpikia in,” a ci hi.

²²Tuolah Joab khupbawhin zatahna pie a, kumpipa thupha a pie hi; tuale Joab in, “Kumpipa in a nasempa ngetna pie zo ta ahi ziehin tuni-in ka pu kumpipa mai-ah maipha ka nga zo hi, ci thu na nasempa in ka thei ta hi,” a ci hi.

²³Tuaci’n Joab kuon pai a, Geshur ah pei-in ama in Jerusalem ah Absalom a zawpi hi.

²⁴Kumpipa in, “Ama a inn ah peisah in; ka opna-ah ama ang pei sih ding hi,” a ci hi. Tuaci’n a inn ah Absalom pei-in kumpipa opna-ah pei lo hi.

²⁵Tu-in Israel zosie sungah a melhoina ziehin Absalom banga phattah ding koima om lo hi; a ketaw panin a luzang dong ama tungah muhkaw ding bangma om lo hi.

²⁶Ama in a luzang sam a heu ciengin (bangzieh ahei cile kum tawp sielin ama in a sam a heu let hi; a sam a gih seng ciengin a heu hi), a luzang sam tawi a te a, kumpipa’ tawikhaina-ah a te ciengin shekel zani gih hi.

²⁷Absalom sung panin tapa thum, le Tamar kici ta numei khat a pieng hi; tua nu pen numei melhoi khat ahi hi.

²⁸Tuaci’n kumpipa’ opna-ah pei loin Jerusalem ah kum ni tangcim Absalom a teng hi.

²⁹Tua ciengin Absalom in kumpipa kungah ama zawpi dingin Joab hlan ding mi a sawl hi; ahi vangin ama kungah Joab pei lo hi.

³⁰Tua ciengin ama in a nasemte kungah, “En un, Joab’ logam, kei-a’ tawh kizon lien ahi hi. Khumtahah ama in mangbuham nei hi; pei unlen mei tawh vahal ta un,” a ci hi. Tuaci’n Absalom’ nasemte in tua logam mei tawh a hal uhi.

³¹Tua ciengin Joab dingin a inn-a om Absalom kungah haw a, “Na nasemte in bang dinga ka logam ei halpieh uh ahei?” a ci hi.

³²Absalom in Joab dawng a, “En in, nang kam kang vaihlah hi: Kumpipa kungah nang hing sawlin, “Bang dinga Geshur pana hing pei ka hei? Khum munah om lai leng kei adingin hoi zaw ngel ding hiven,” a cisah dingin tam sungah hing pei ta’n ang ci ka hi hi. Tu-in kei kumpipa opna-ah ei peisah inlen, mawna ka nei tah leh zong ama in ei that taheh!’ ka ci hi,” a ci hi.

³³Tua ciengin Joab in kumpipa kunga a gen ciengin ama in Absalom hlan dingin mi sawl pai hi. Tuaci’n kumpipa kungah ama haw a, kumpipa mai-ah khupbawhin a mai tuolah a kun hi; tuale kumpipa in Absalom a nam hi.