Read Zou 2 SAMUEL 15 Bible Online

2 SAMUEL 15 - Zou bible

2 SAMUEL 15

¹Tam zaw ciengin Absalom in sakol leeng khat le a sakolte, le a mai-a tai ding mi sawmnga a kithawisah hi.

²Absalom thobai-in kul kotpi lam gei-ah ding zel hi; tuale mi khatpo in thu nei-in kumpipa mai-ah a tut ciengin Absalom in hlan zelin, “Koi khuo pan na hiei?” a ci hi. Mipa in, “Na nasempa, Israel sunga tua minam tua khuote ka hi hi,” a ci ciengin

³Absalom in, “En in, na thunei pen hoi a, zong a dih hi; ahi vangin kumpipa in na thu ang zahpi ding mi koima ngansie a nei sih hi,” a ci hi.

⁴Absalom in a genbe lai a, “Gam sunga thukhen khat hi leng maw! Tua ciengin mi tawh kiheh, ahi sihle thunei zosie ka kungah hing pei va-un, ke’n zong a thu uh a tangin khenpieh ma ding hi veng,” a ci hi.

⁵Ama tungah zatahna pie dingin mi khat in ama kung nai-in a pei sielin a khut zahin tupomin a nam zel let hi.

⁶Tua bangin Absalom in kumpi kunga thukhensah dinga ang pei Israel-te tungah a gamta hi; tuaci’n Absalom in Israel mite’ lungsim a guhpieh hi.

⁷Kum li[69] a cin ciengin Absalom in kumpipa kungah, “Hebron ah ei peisah inlen, TOPA kungah ka ciemsa ka thuciem ei bawlsah in, ci-in kang thum hi.

⁸Azieh pen Aram-a Geshur ah ka op laitahin na nasempa in thuciem khat ka na bawl hi: Jerusalem ah TOPA in ei peipikia tahtaha ahile Hebron ah[70] TOPA ka bie ding hi, ka ci hi,” a ci hi.

⁹Kumpipa in ama kungah, “Lungmuong tahin pei in,” a ci hi. Tuaci’n tho-in Hebron-ah ama a pei hi.

¹⁰Ahi vangin Absalom in Israel minam zosie kungah kamtaite sawldapin, “Note in pengkul gin na zah behun tam bangin awng un: Hebron ah Absalom kumpi suoh zo hi!’ ci-un,” a ci hi.

¹¹Jerusalem panin Absalom tawh mi za ni a pei uhi; amate ahile a kiciel zinte ahi vua, lungsim hoi tawh pei-in bangma thu a thei sih uhi.

¹²Absalom in biehpiehna a pieh laitahin a khuopi Gilon panin David’ thu kuppipa Gilon-te Ahitophel a hlansah[71] hi. Sawmdapna thahat semsem a, Absalom nuazui mi a khang tehteh hi.

¹³David kungah kamtai khat tung a, “Absalom lamah Israel-te’ lungtang pei sieng zo hi,” ci-in a gen hi.

¹⁴Tua ciengin David in Jerusalem-a ama tawh a omton ama’ ulien zosie kungah, “Tho un! Tai vai, tua hi sihle Absalom kung panin i suotah nading uh om lo ding hi. Manlang un, tua hi sihle ama in ei pha pai ding hi, ama in i tung vuah gimna ang tungsah ding a, namsau tawh khuopi ang sim ding hi,” a ci hi.

¹⁵Kumpipa’ uliente in kumpipa kungah, “Ka pu kumpipa in na khensat popo sem dingin na nasemte a baisa ahi hi,” a ci uhi.

¹⁶Tuaci’n kumpipa pei-in inn ngaih dinga a nuasie a mei numei sawmte simlo a innkuon zosie in ama’ nua a zui uhi.

¹⁷Kumpipa pei-in mi zosie in ama’ nua a zui uhi; tuale inn tawpna pen khatah amate a khawl uhi.

¹⁸Ama’ ulien zosie in ama a makhel uhi; tuale Chereth-te zosie, Peleth-te zosie, le Gath pana ama ang zui Gitt-te mi za guhte zosie, kumpipa’ mai nawhin pei uhi.

¹⁹Tua ciengin Gitt-te Ittai kungah, “Nang in zong bang dinga nei zui ahiei? Nuakia inlen kumpipa tawh omton in; bangzieh ahei cile nang gamdang mi na hi a, na gam pana ang kinotmang na hi bo hi.

²⁰Zani ahiei khat a ang tung pan hi bo cin a, kei na ngawn in zong nang hei lam zuon ding ci kang thei lo laitahin tuni-in kote tawh a vah kawikawi dingin kang pui ding amah? Na sanggamte zawpi inlen peikia ta’n; tuale TOPA in nang tungah a itna kip le a thumanna hing lah taheh,”[72] a ci hi.

²¹Hinanle Ittai in kumpipa dawng a, “TOPA hing a, ka pu kumpipa zong a hing ahi ma bangin, ka pu kumpipa opna popo-ah si leng hing leng na nasempa kang pei ding hi,” a ci hi.

²²David in Ittai kungah, “Tua ahile pei in, peisuoh in,” a ci hi. Tuaci’n Gitt-te Ittai, a mite zosie le a zawpi numei naupang zosie tawh a peisuoh hi.

²³Mi zosie a pei laitahin gam sung mi zosie a gingin a kap uhi; kumpipa in Kidron Lui galkai-in mi zosie in senel gam lam a manaw uhi.

²⁴Abiathar a peito a, tuale Zadok zong Levi-te zosie tawh pei-in Pasien’ thuciemna singkuong a puo uhi. Mite in khuopi a kal zaw masangsie amate in Pasien’ thuciemna singkuong a nga phot tadi uhi.

²⁵Tua ciengin kumpipa in Zadok kungah, “Khuopi sungah Pasien’ singkuong puokia in. TOPA’ maipha ka mu leh ama in kei ei puohkia ding a, tuami le a opna mun ei musahkia ding hi.

²⁶Ahi vangin ama in, ‘Nang tungah lungkim sing,’ ei ci leh tanah kei ka om hi, ama in hoi a sah bangin kei tungah bawl taheh,” a ci hi.

²⁷Kumpipa in zong siempu Zadok kungah, “En in,[73] nuom tahin nangma le Abiathar, na tapa nite Ahimaaz le Abiathar’[74] tapa Jonathan tawh khuopi sungah peikia ta un.

²⁸En un, kei thu ei puoh dingin nangma kung panin thu ang tun masang senel gam sunga tanmunte-ah kang na ngah ding hi,” cibe lai hi.

²⁹Tuaci’n Jerusalem-ah Zadok le Abiathar in Pasien’ singkuong a puokia vua, tua munah ama gel a om uhi.

³⁰Ahi vangin Olive Muoltung katona lam zuonin a pei pumin David kap a, puon kilukhu-in a keng guohin lam a pei hi; a zawpi mi zosie puon kilukhusa-in a peito pumun a kap uhi.

³¹David kungah, A sawmsim mite lahah Ahithophel zong Absalom tawh kipawl hi,” ci-in kigen hi. David in, “TOPA aw, kang thum hi. Ahithophel’ thumopte motna-in na heipieh in,” a ci hi.

³²Pasien biehna muol vumah David a tun ciengin a dawn dingin a puontungsil balkehsa le a lu tungah leivui bangsa-in Archi mi Hushai a pei hi.

³³David in ama kungah, “Kei nei zui suoh leh kei adingin vangih na hi ding hi.

³⁴Ahi vangin khuopi sungah peikia-in Absalom kungah, ‘Kumpipa aw; masang lai-a na pa’ nasem ka hi ma bangin tu-in zong nangma’ nasem ka hi ding hi,’ ci-in va gen ta’n, tua hile keima dingin Ahithophel’ thumopte na sumit thei ding hi.

³⁵Khum munah nang tawh siempu Zadok le Abiathar ang om ding uhi. Tuaci’n kumpipa’ inn sunga na thu zah poma Zadok le Abiathar siempu tegel kungah gen in.

³⁶Khum munah amau’ tapa gel, Zadok’ tapa Ahimaaz le Abiathar’ tapa Jonathan, tawh a omton uhi; tuale ama gel tungtawnin na thuzah zosie kei nei theisah ding hi,” a ci hi.

³⁷Tuaci’n Jerusalem ah Absalom a lut laitahin David’ guolpa Hushai zong khuopi sungah a pei hi.