Read Zou 2 SAMUEL 17 Bible Online

2 SAMUEL 17 - Zou bible

2 SAMUEL 17

¹Tua tham loin Ahithophel in Absalom kungah, “Mi tul sawmle tulni ei teelsah in, keima kuonin tuzanin David va nuadel ta vang.

²Ama a gim le a lungkieh petin keima in va simin ka va zausisah ding hi; tua hile ama panpi zosie a taimang sieng ding uhi. Keima in kumpipa ngentang ka that ding a,

³tuale motha nu in a pasal kung a zot bangin na kungah mi zosie kang zawpikia ding hi. Nang pen mi khat[81] lien beh tha ding a sui na hi a, midang zosie lungnuomin om ding uhi,” a ci hi.

⁴Tua ngaisutna in Absalom le Israel upa zosie a lungkimsah hi.

⁵Tua ciengin Absalom in, “Archi mi Hushai zong va hlan ta un. Ama’ thugen ngai phot vai,” a ci hi.

⁶Absalom kungah Hushai a tun ciengin Absalom in, “Ahithophel’ thugen tam teng dan ahi hi; ama’ genna banga i man ding uh amah? Ahi sihle nang in gen in,” a ci hi.

⁷Tua ciengin Hushai in Absalom kungah, “Tu tunga Ahithophel’ ang thumop a hoi sih hi,” a ci hi.

⁸Hushai in a genban zom a, “Na pa le a mite galhang behbeh ahi vua, gam sunga a note a kilahpieh vompi bangin a hangsan lam uh na thei hi. Tua banah na pa galbawl kiva mama khat ahi hi; galkapte tawh zanin ama a giehton sih ding hi.

⁹Tu nangawnin ama dum khat sungah ahiei, ahi sihle mundang khatah ahiei kiphuol zo ta kha ding hi. I galkapte uh[82] pawlkhat kido cilna-ah si uleh tua thu a za poma in, ‘Absalom nuazui galkapte lahah mi a si tam mama hi,’ ci ding hi.

¹⁰Tua ciengin humpi lungtang a kuo galhangpa nangawn cieng zau-in lungkie ding hi; azieh pen na pa galhang ahi a, ama panpi zosie zong galhat ngentang a hina thu Israel zosie in a thei uhi.

¹¹Ahi vangin kei ang thumop nop pen ahile Dan panin Beer-sheba dong, tuipi gei-a senel za-a a tam Israel mi zosie na kungah khawm inlen, nang mama gal sim dingin kuon in.

¹²Tuaci’n tu-in eite in zong i mumuna vuah amate i sim ding vua, amate tungah tuol a daitui kie bangin i kie ding uhi; ama hile ama panpite hile khat beh suohta lo ding hi.

¹³Khuopi sunga a nuakia leh Israel zosie in tua khuo sungah khauhuol tawi-in suongpem khat nangawn a kimu lo dongin kuom sungah tua khuopi i kaimang ding hi,” a ci hi.

¹⁴Absalom le Israel mi zosie in, “Ahithophel’ thumop sangin Archi mi Hushai’ thumop hoizaw hi,” a ci uhi. Bang ding ahei cile TOPA in Absalom tungah sietna a tunsah thei nadingin Ahithophel’ thumop khu a guolel mawng dinga TOPA’ sesa ahi hi.

¹⁵Tua ciengin Hushai in siempu Zadok le Abiathar kungah, “Tua bang tua bangin Ahithophel in Absalom le Israel upate kungah thu a mop hi; tuale keima in zong tua bang tua bangin thu ka mop hi.

¹⁶Tua ahi ziehin mallangin mi sawl gel inlen David kungah, “Tu zanin senel gam tanmunte-ah na gieh sinlen, ahi thei bang bangin na galkai zaw in; tua hi sihle kumpipa le a zawpi zosie ang kivaltum ding hi,’ ci-in gensah in,” a ci hi.

¹⁷Enrogel ah Jonathan le Ahimaaz in a ngah uhi; nasem numei khat va pei zelin ama gel kungah thu gen a, ama gel in zong kumpi David kungah tua thu a gensawn zel uhi; bangzieh ahei cile khuopi sungah mite’ mu-in ama gel lut ngam lo hi.

¹⁸Ahi vangin naupang khat in ama gel mu-in Absalom kungah a sawm hi; tuaci’n a ni gelin a nawtai pai vua, a inn huong sunga tuikhuh nei Bahurim-a mi khat kungah tungin tua tuikhuh sungah a kumsuh uhi.

¹⁹Tua mipa’ zi in tuikhuh kamsin khat la-in tuikhuh kam tungah pha a, tua tungah an a pho hi; tua thu koima’n a thei sih hi.

²⁰Numei nu’ inn ah Absalom’ nasemte a tun ciengun, “Ahimaaz le Jonathan hei ta uh ahei?” a ci uhi. Tua numei nu in amate kungah, “Ama gel luigal[83] a kai zo ta uhi,” a ci hi. Amate in a sui kawikawi vua, a mu zo lo bepun Jerusalem-ah a kilekia uhi.

²¹Amate a peizaw ciengun tuikhuh panin ama gel a kato vua, kumpi David kungah a gen ding teng va pei-in a gen uhi. Ama gel in David kungah, “Pei inlen luigal kai ta naw’n; azieh pen tua bang tua bangin nangma langkhatah Ahithophel in thumop hi,” a ci uhi.

²²Tuaci’n David le a zawpi mipi zosie kisa pai-in Jordan gun a galkai uhi; khuo a vah ciengin Jordan galkai lo mi koima om nawn lo hi.

²³Ahitophel in a thumop a kizui lo lam a thei ciengin a laa phaw pha a, tuaci’n a khuo-a inn ah a pei hi. Ama in a inn sung vaiteng hawmin a gui-awh hi; ama si-in a pa’ hanah kivui hi.

²⁴Tua ciengin Israel mite zosie tawh Absalom Jordan a galkai laitahun Mahanaim ah David a tung hi.

²⁵Tu-in Absalom in galkapte tunga a uh dingin Joab’ munah Amasa koi hi. Amasa pen Joab’ nu Zeruiah’ naunu Nahash’ tanu Abigail tawh kinung Ishmael[84] mi Ithra kici mipa khat’ tapa ahi hi.

²⁶Israel-te le Absalom in Gilead gamah giephuol sat uhi.

²⁷Mahanaim ah David a tun ciengin Ammon-te’ gam Rabbah panin Nahash’ tapa Shobi, le Lo-debar panin Ammiel’ tapa Machir, le Rogelim panin Gilead mi Barzillai in

²⁸lupnate, kisilna kuongte, le leibeelte, mangbu, mangbuham, an, ankan, bepi le besante,[85]

²⁹khuoizu le bawngnawi-thaukhalte, tuu le sathaukhalte zong David le a zawpite neh dingin a puo uhi; bangzieh ahei cile amate in, “Senel gamah galkapte gilkielin gimin dangta uhi,” a ci uhi.