Read Zou 2 SAMUEL 19 Bible Online

2 SAMUEL 19 - Zou bible

2 SAMUEL 19

¹Joab kungah, “Absalom ziehin kumpipa kap le mau-in om hi,” ci-in kigen hi.

²Tuaci’n khum ni-a galzawna pen galkap zosie adingin dana le kaana a suoh ta hi; azieh pen khum ni-in galkapte in, “Kumpipa a tapa ziehin a da mama hi,” ci-in thu za uhi.

³Galtaite maizumin a daptun vakhuan bangun khum ni-in khuopi sungah galkapte a daplut uhi.

⁴Kumpipa in a mai khu-in nahpi tahin kap a, ‘Aw ka tapa Absalom, Aw Absalom, ka tapa, ka tapa!” a ci hi.

⁵Tua ciengin kumpipa’ inn sungah Joab tum a, ama in, “Tuni-in nangma’ hinna, na tanu na tapate’ hinna, na zite le na meite’ hinna ang hunkhie na galkap ulien zosie na maizumsah hi.

⁶Bangzieh ahei cile nang ang mudate na it a, nang ang itte na muda zawsop hi. Nang adingin galkapmangte le galkap uliente bangma ahi lo lamtah tuni-in na sulang zo ta hi; azieh pen Absalom hing hinlen, kote zosie tuni-in si sieng uleng na nop zawh ding ka thei hi.

⁷Tuaci’n tu mama-in va pei tanlen na nasemte kamdam no tawh va hopi in; azieh pen na pei sih poma leh tuzan ciengin mi khat zong nang kungah om nawn lo ding hi, ci-in TOPA’ minin ka kiciem ngam hi. Tuale tam thu pen na tangval-a kipan tu cieng dong na tunga ang tungsa gimna khat popo sangin nang adingin ang siehuoi zaw ding hi,” a ci hi.

⁸Tua ciengin kumpipa dingin kultunkot gei-ah a to hi. Galkapte kungah, “En un, kultunkotah kumpipa a to hi,” ci-in kigen sieng hi; tuale kumpipa mai-ah galkap zosie a pei uhi. Khum hun laitahin Israel-te zosie a inn ciet vuah a taimang sieng uhi.

⁹Israel minam zosie sungah mi zosie a kisel vua, tuale amate in, “Kumpipa in i galte khut sung panin ei hlakhie a, Philistia-te khut sung panin ei hunkhie hi; tuale tu-in Absalom ziehin gam sung panin ama taimang zo hi.

¹⁰Ahi vangin eite tungah kumpi dingin sathau i nupa uh lah gal sungah si zo hi. Tua ahi ziehin tu-in bang dinga kumpipa nua zawpikia nading bangma na gen lo uh ahei?” a ci hi.

¹¹Kumpi David in siempu Zadok le Abiathar tungah tam thu puoh a, “Judah upate kungah tam bangin gen un: Kumpipa a inna peipi nukhia pen ding na hi uh amah?’ ci un. Kumpipa[93] kungah Israel mi zosie’ thugen tung zo hi.

¹²Note ka tanau na hi vua, note ka tel ka vo na hi uhi; bang dinga kumpipa peipi nukhia pen hi ding na hi uh ahei?

¹³Tuale Amasa kungah, “Nang ka tel ka vo hi lo na mah? Tuaci’n tu-a patin nang Joab’ tanga ka galkapmangpa na hi sih tah leh Pasien in kei ei dop bawl sih taheh” a ci hi.

¹⁴Amasa’[94] thugen in Judah mi zosie’ lungsim hawisahin a kithukhatsah pai a, amate in zong kumpipa kungah thu puohin, “Nangma le na nasemte zosie hing kilekia ta un,” a ci uhi.

¹⁵Tuaci’n Jordan ah kumpipa kilekia hi; tuale kumpipa dawn ding le Jordan gal kaipi dingin Gilgal ah Judah a pei hi.

¹⁶Kumpi David dawn dingin Benjamin-te Gera’ tapa Shimei zong Judah mite tawh mallangin a peisuh hi;

¹⁷ama tawh Benjamin mi tulkhat a om hi. Tuale Saul’ innsung nasem Ziba, a tapa sawm le nga le a nasem sawmni tawh a zawh vua, kumpipa’ mai Jordan ah nawtai suhin,

¹⁸kumpipa’ innkuonte a galkaipi ding le ama dei banga na sem dingin tanmun ah amate a galkai uhi.[95] Jordan a galkai kuon ding ciengin kumpipa mai-ah Gera’ tapa Shimei bawhsuh a,

¹⁹kumpipa kungah, “Ka pu kumpipa in Jerusalem na nuasie ni-a na nasempa in na tunga kang bawl khielna ka pu in ei mawsah loin ei ciemte sin; Kumpipa in ngaisutin ei nei sin.

²⁰Bang ding ahei cile na nasempa in ka maw lam ka thei hi; tua ahi ziehin, en in, ka pu kumpipa dawn dinga ang kuonsuh Joseph’ innkuon zosie sung panin tuni-in ang tung masa pen ka hi hi,” a ci hi.

²¹Zeruiah’ tapa Abishai in a dawng a, “Shimei in TOPA’ sathau nupa a samsiet ziehin ama tha pai ding hi lo amah?” a ci hi.

²²Ahi vangin David in, “No Zeruiah’ tapate aw, tuni-in kei ei langpang dinga bang hing kikumthaw na hi uh ahei? Israel gam sungah tuni-in mi khatpo kithat ding amah? Bangzieh ahei cile tuni-in Israel-te’ kumpipa ka hi lam thei buong sam hi lo ka mah?” a ci hi.

²³Kumpipa in Shimei kungah, “Nang na si sih ding hi,” a ci hi. Tuale kumpipa in ama tungah kiciemna a bawl hi.

²⁴Kumpipa dawn dingin Saul’ tupa Meiphibosheth[96] a peisuh hi; Kumpipa a pei ni-a kipanin dam le bihin a tunkia ni dongin ama in a keng sil lo, a khamul heu loin a puon zong sawp lo hi.

²⁵Kumpipa tawh kimu dingin Jerusalem a tun ciengin kumpipa in, “Mephibosheth,[97] bang dinga kei nei zui lo ahiei?” a ci hi.

²⁶Ama in dawng a, “Ka pu, kumpipa aw, ka nasempa in kei ei sol hi; azieh pen na nasempa in a kungah, ‘A tungah tuongin kumpipa tawh ka zaw thei nadingin kei dingin[98] ka laa-phaw va guong tan,’ ka ci hi. Azieh pen na nasempa a khelbai ahi hi.

²⁷Ama in ka pu kumpipa kungah na nasempa ei mindaisah zo hi. Hinanle ka pu kumpipa pen Pasien’ vantungmi tawh a kibang hi; tua ahi ziehin hoi na sah bangin ei bawl in.

²⁸Azieh pen ka pu kumpipa mai-ah ka pa’ innkuon zosie si ding beh ngaha om ahi bo uhi. Hinanle nang in na sabuoi-a an a ne mite lahah kei nei koi hi. Tua ahi ciengin kumpipa kungah bang hamphatna kang ngen kan nawn ding ahei?” a ci hi.

²⁹Kumpipa in ama kungah, “Bang dinga na kungtung thu na hici gengen ahei? Ka khensatsa ahi hi: Nangma le Ziba in leitang na hawm ding uhi,” a ci hi.

³⁰Mephibosheth[99] in kumpipa kungah, “Ka pu kumpipa dam le bihin inn nang tun buongin ama a unpi-in lasah in,” a ci hi.

³¹Rogelim panin Gilead-te Barzillai a peisuh hi; Jordan gal khatah a cing dingin kumpipa tawh ama a peisuh hi.

³²Barzillai pen a khangham mama mi khat ahi a, kum sawmgiet a pha hi. Mahanaim ah kumpipa a op laitahin ama in an le tui na sih zing hi, azieh pen ama mihau mama khat ahi hi.

³³Kumpipa in Barzillai kungah, “Jerusalem-a ka kungah ei zui in, keima’n nang va vang,” a ci hi.

³⁴Ahi vangin Barzillai in kumpipa kungah, “Kumpipa tawh Jerusalem-a kang peito na valia dingin kei kum bangza hing lai ding ka hei?

³⁵Tuni-in kum sawmgiet ka cing ta hi; a nuom le a nuom lo zong ka khen thei tha ding amah? Na nasempa in ka neh ka dawnte zong a tui lam ka thei nawn beh ding amah? Lasa numei le pasalte’ awging zong ka za thei nawn beh ding amah? Tua ahi ciengin bang dinga na nasempa, ka pu kumpipa vangih kibelap na bep dinga hing om ding ka hei?

³⁶Na nasempa in Jordan tuipi gal khatah bakhat sung ang zui ding hi. Bang dinga kumpipa in khum bang thaman ei pieh son ding ahei?

³⁷Ka nu le ka pa’ han gei-a keima’ khuo sunga ka si thei nadingin na nasempa hepina tawh ei kilesah kia ta’n. Hinanle tanah na nasempa Chimham om hi; ka pu kumpipa tawh ama zawhton heh; tuale nangma’ hoisah popo ama adingin bawlpieh in,” a ci hi.

³⁸Kumpipa in dawng a, “Chimham tawh ka zawh ding a, nang hoisah bangin ama ading ka bawlpieh ding hi; tuale kei tung pana na dei vannuoi nang adingin kang bawlpieh ding hi,” a ci hi.

³⁹Tua ciengin mi zosie in Jordan galkai-in kumpipa zong a galkai hi; kumpipa in Barzillai namin thupha pie a, tuale a inn ah ama a kilekia hi.

⁴⁰Gilgal dongah kumpipa a peisuoh hi; tuale Chimham zong ama tawh a zawh hi; Judah mi zosie le Israel mi alang in zong a pei nading lampi-ah kumpipa a hla uhi.

⁴¹Tua ciengin Israel mi zosie in pei-in kumpipa kungah, “Bang dinga ka sanggam uh Judah mite in nangma hing gumangin, kumpipa le a innkuonte, le David’ mi zosie ama tawh, Jordan galah zawpi uh ahei?

⁴²Judah mi zosie in Israel mite dawngin, “Kumpipa pen ko tawh a kinai tanau ka hi zieh uh ahi hi. Tuale tam thu-ah bang dinga lungthah na hi uh ahei? Kumpipa’ sum tawh anne tuidawn ka hi son uh amah? Ahi sihle ama in kote letsong khatpo ei pie amah?” a ci uhi.

⁴³Ahi vangin Israel mite in Judah mite dawngkia-in, “Kumpipa sungah tanh sawm ka nei vua, David’ sungah zong no sangin tam ka neizaw uhi. Tuale note in bang dinga nei ci nuoisie uh ahei? I kumpipa nua lahkia dinga thugen masa koma ka hi sih uh amah? Ahi vangin Israel mite’ thugen sangin Judah mite thugen a bunzaw hi.