Read Zou 2 SAMUEL 2 Bible Online

2 SAMUEL 2 - Zou bible

2 SAMUEL 2

¹Tam zaw ciengin David in TOPA dong a, “Judah khuopite khat popo-ah ka peito diei mah?” a ci hi. TOPA in ama kungah, “Peito in,” a ci hi. David in, “Koi penah ka peito diei?” a ci hi. Ama in, “Hebron ah,” a ci hi.

²Tuaci’n David in a zi tegel, Jezreel-a Ahinoam le Carmel-a Nabal’ zi meigongnu Abigail tawh khum munah a peito uhi.

³David in a zawpi mite, mi zosie a innkuonpi ciet tawh peitopi hi; tuale Hebron khuopite-ah amate a teng uhi.

⁴Tua ciengin khum munah Judah mite pei-in Judah kumpi dingin David sathau a nu uhi. Amate in David kungah, “Saul a vuite pen Jabesh-gilead mite hi,” ci-in a gen ciengun

⁵David in Jabesh-gilead mite kungah kamtaite sawl a, “Na pu uh Saul tungah tam bang citahna lahin na vui ziehun TOPA in thupha hing pie ta uheh!

⁶Tu-in TOPA in na tung vuah itna kip le thumanna hing lah taheh! Tam banga na gamtat ziehun note thaman kang pie ding hi.

⁷Tua ahi ziehin na khut khausah unlen hang un; azieh pen na pu uh Saul si zo a, Judah innkuon in amate tungah kumpi dingin kei sathau ei nu zo uhi,” a ci hi.

⁸Hizongle Saul’ galkapmangpa Ner’ tapa Abner in Mahanaim ah Saul’ tapa Ishbaal a peipi hi.

⁹Ama in Gilead, Ashur, Jezreel, Ephraim, Benjamin, le Israel zosie tungah kumpi dingin ama a bawl hi.

¹⁰Israel uh dinga ama a kipatin Saul’ tapa Ishbaal kum sawmli pha a, ama in kum ni sung uh hi. Ahi vangin Judah innkuon in David’ nua zui uhi.

¹¹Hebron-a Judah innkuon tungah David kumpi a suo hun sung pen kum sagi le hla guh ahi hi.

¹²Mahanaim pan Gibeon zuonin Ner’ tapa Abner le Saul’ tapa Ishbaal’[3] nasemte a pei uhi.

¹³Zeruiah’ tapa Joab le David’ nasemte peikhie-in Gibeon buolah amate a na dawn uhi. Pawlkhat buol langkhatah a to laitahun adang khat a buol langkhatah a to uhi.

¹⁴Abner in Joab kungah, “Tangvalte a mai-ah peisah vai-in i mai vuah kisuolsah vai,” a ci hi. Joab in, “Amate a mai-ah hing peisah in,” a ci hi.

¹⁵Tuaci’n amate a mai-ah pei-in a galkai kawmun Benjamin le Saul’ tapa Ishbaal[4] adingin sawm le ni, le David’ nasemte adingin sawm le ni a kise uhi.

¹⁶Amate in a kisihpi ciet uh a lutangah manin a namsau tawh a langpa a dawt ciet uhi; tuaci’n amate a puaton ciet uhi. Tua ziehin Gibeon-a khum mun pen Helkath-hazzurim[5] kici hi.

¹⁷Khum ni-in gal kidona a nasie mama hi; tuale David’ nasemte in Abner le Israel mite a zo uhi.

¹⁸Zeruiah’ tapa thumte, Joab, Abishai, le Asahel, khumnah a om uhi. Tu-in Asahel pen sakhi lee bangin a keng a mallang hi.

¹⁹Asahel in Abner nuadel a, ama a del kawmin zietlam ah hile veilam ah hile a piel sih hi.

²⁰Tua ciengin Abner in a nua enin, “Nang, Asahel na hi amah?” a ci hi. Ama in dawng a, “Ingheh, keima ka hi hi,” a ci hi.

²¹Abner in ama kungah, “Na ziet na vei kihei inlen, tangvalte khat penpen manin a van khat kilah in,” a ci hi. Ahi vangin ama a nuadelna panin Asahel a kinua hei tuom sih hi.

²²Abner in Asahel kungah, “Kei ei del nawn sinlen piel ta’n; bang dingin ke’n nang tuolah hing satlia ta lawm ding ka hei? Tua bang bawl mawh leng na sanggampa Joab kungah bangci bangin ka maitang laa nawn ding ka hei?” a ci leuleu hi.

²³Ahi vangin ama a kinua hei nuom tuon sih hi. Tuaci’n Abner in teipi dawn tawh a gilpi khaw a, tuaci’n a teipi in pailetin a el lamah a pusuoh hi. Khum munah ama puasuhin a puana munah a si hi. Tuale Asahel pua-in a sina munah a pei mi zosie pia loin a ding uhi.

²⁴Hinanle Joab le Abishai in Abner a nuadel vua, nitum laitahin ama gel Gibeon gamlah peina lampi tunga om Giah mai-a kihlung Ammah muol a tung uhi.

²⁵Benjamin-te, Abner kimah kikhawmin pawlkhat a suoh uhi; amate muol dawn khatah a pang uhi.

²⁶Tua ciengin Abner in Joab hlan a, “Namsau in mi a nawmval den ding ma amah? A tawpna ah hamsa zaw ding hi, ci thei lo na hi amah? A sanggamte a nuadelna panin a kihei nadingun na mite thu na pieh ding bang tanvei sawt lai ding ahei?” a ci hi.

²⁷Joab in, “Pasien a hin ma bangin hing genkha sih lacin, mite in a sanggamte uh zingmawng cieng dong khawl vawt loin a del peisuoh ding uh ahi hi,” a ci hi.

²⁸Joab in zong pengkul mutin tuale mi zosie a khawl uhi; amate in zong Israel-te nuadel nawn loin gal zong a do nawn sih uhi.

²⁹Abner le a mite in khum zan tungtawnin Arabah lam tawnin khuol a zin uhi; amate in Jordan a kantan vua, tuale sunlai masang zingmawng[6] tungtawnin pei-in Mahanaim ah a tung uhi.

³⁰Abner a nuadelna panin Joab a kilekia a, ama in mi zosie a kaikhop zaw ciengin Asahel simlo David’ nasemte mi sawmkuo le kuo a pelem uhi.

³¹Ahi vangin David’ nasemte in Abner’ mite ahi Benjamin-te zathum le sawmguh a that uhi.

³²Amate in Asahel luong a puo vua, tuaci’n Bethlehem-a om a pa hanah a vui uhi. Joab le a mite zan tungtawn pei-in Hebron ah khuo a vah hi.