Read Zou 2 SAMUEL 20 Bible Online

2 SAMUEL 20 - Zou bible

2 SAMUEL 20

¹Tu-in Benjamin mi, Bichri’ tapa Sheba a kici mi ginalo khat khum sungah na om kha hi. Ama in pengkul mutin, “David sungah tanh i nei sih a, Jessi’ tapa sungah gamh i nei sih hi! Israel aw, mi zosie na puonbuh vuah pei un!” ci-in a kiko hi.

²Tuaci’n Israel mi zosie in David a nuasie vua, Bichri’ tapa Sheba a zui uhi; ahi vangin Judah mite in Jordan panin Jerusalem cieng dong a kumpipa uh kiptahin a zui uhi.

³Jerusalem-a a inn ah David a tung hi; tuale kumpipa in a inn ngah dinga a nuasie a mei sawmte khawmin inn khatah amate cingsahin an le tui a pie hi, ahi vangin ama in amate a luppi nawn sih hi. Tuaci’n a si dongun inn sungah amate kikhumcipin meigong numei bangin hinkhuo a mang uhi.

⁴Tua ciengin kumpipa in Amasa kungah, “Ni thum sungin Judah mi zosie ka kungah hing khawm inlen, nang mama zong tanah hing om in,” a ci hi.

⁵Tuaci’n Judah hlan dingin Amasa a kuon hi; ahi vangin a kiniciem hunin ama tung loin a kiheh hi.

⁶David in Abishai kungah, “Tu-in Bichri’ tapa Sheba in Absalom sangin ei bawlsie zaw ding hi; na pu’ nasemte zawpi inlen ama va nuadel ta’n, tua ahi sihle ama’n ama adingin kul tawh ki-im khuopite mu-in eite kung panin a pitmang ding hi,” a ci hi.

⁷Abishai’ nua-ah Joab le Chereth-te, Peleth-te, le mi thahat zosie kuon uhi; Bichri’ tapa Sheba nuadel dingin Jerusalem panin amate a kuon uhi.

⁸Gibeon-a suongpi opna mun a phah tahun, amate tawh kimu dingin Amasa a pei hi. Tu-in Joab in galkap puon sil a, tua tungah a pai-a kisiet namsau khat kivaw kawnggah khat a kawngah a gah hi; ama a mai-ah a pei phei leh tua namsau tuolah kie hi.

⁹Joab in Amasa kungah, “Ka sanggampa, na dam nai mah?” a ci hi. Tuale Joab in ama nam dingin a zietlam khutin a khamulah Amasa a man hi.

¹⁰Ahi vangin Amasa in Joab’ khut sungah namsau a op lam a phawh kha sih hi; Joab in a gilpi dawtpiehin a sungkuo teng tuolah luongkhe-in ama a si hi. Tua ciengin Joab le a sanggampa Abishai in Bichri’ tapa Sheba a nuadel uhi.

¹¹Tuale Amasa gei-ah Joab’ mite khat dingin ama in, “Joab panpi poma, le David-a’ ahi poma in Joab nua zui un,” a ci hi.

¹²Lam lienpi tunga ama’ sisan sungah Amasa kidie-in a om hi. Tuale lamlienpi-a pei mi zosie in ama a mu ciengun a dinkhawl uhi. Ama kunga a pei mi zosie a khawl lam a mu ziehin ama in lamlienpi panin gamlahah Amasa’ luong puo-in ama puon khat a se hi.

¹³Lamlienpi panin ama’ luong a kihep sieng bepin Bechri’ tapa Sheba del dingin Joab’ nua-ah mi zosie a peisuoh uhi.

¹⁴Sheba[100] in Beth-maacah[101] gam Abel dong Israel minam zosie a nawhsuoh hi; tuale Bichri’ [102]mi zosie kikhawmin ama’ nua zui-in a sungah a tum uhi.

¹⁵Joab’ galkapte[103] pei-in Beth-maacah gam Abel ah ama a kui-im uhi; amate in khuopi tawh kimaingatin kulpi mai-ah leicien a bawl uhi. Joab’ galkapte in kulpi a cipzan thei nadingin a susie uhi.

¹⁶Tua ciengin numei pilvang khat in khuopi panin hlanin, “Ngai un! Ngai un! Joab kungah gen un, ‘Tam tahah hing pei in, nangma kungah thu kang gen nuom hi,’ ci-un,” a ci hi.

¹⁷Tua numei nu gei-ah ama pei a, tua nu in, “Joab kici nang na mah?” a ci hi. Ama in dawng a, “Hi na’ng,” a ci hi. Tua ciengin ama in, “Na nasemnu’ thugente ei ngaipieh in,” a ci hi. Ama in dawngin, “Kang ngaipieh hi,” a ci hi.

¹⁸Tua ciengin ama nu in, “Khanglui lai-in mite in, ‘Abel ah thu dongsah un,’ a ci thei zel uhi; tuaci’n amate in thukhenna na bawl zel uhi.

¹⁹Kei pen Israel sungah kilemna a dei le a muontah mi khat ka hi hi; nang in Israel sungah nu tawh a kibang khuopi khat suhsiet na sawm hi; bang dingin TOPA’ gouluo valtum ding na hei?” a ci hi.

²⁰Joab in dawng a, “Valtum ding hile suhsiet ding hile bawl vawt sih vang!

²¹Tua khu thuman ahi sih hi! Ahi vangin Ephraim muoltung gam mi Bichri’ tapa Sheba a kicipa khat in kumpi David do nading a khut a hlang hi; ama beh ei pie in, tua hile khuopi panin ka pei ding hi,” a ci hi. Numei nu in Joab kungah, “Kulpi panglam na kungah a lutang ang kisepsuh ding hi,” a ci hi.

²²Tua ciengin numei nu in a pilna zangin khuopi sunga mi zosie kungah a pei hi. Tuale Bichri’ tapa Sheba’ lu tansanin Joab sena-in a nei uhi. Tuaci’n ama in pengkul mut a, Joab in Jerusalem-a kumpipa kung a zot lai tahin, khuopi panin amate kithezahin a inn ciet a zuon uhi.

²³Tu-in Joab in Israel galkap zosie makai hi; Jehoiada’ tapa Benaiah in Chereth-te le Peleth-te a makai hi;[104]

²⁴Adoram pen thona-aana nasemte uhpa ahi hi; Ahilud’ tapa Jehoshaphat pen thuciemte pa ahi hi;

²⁵Sheva pen thuvanpi pa ahi hi; Zadok le Abiathar pen siempute ahi uhi;

²⁶tuale Jair mi Ira zong David’ siempu ahi hi.