Read Zou 2 SAMUEL 21 Bible Online

2 SAMUEL 21 - Zou bible

2 SAMUEL 21

¹Tu-in kum khat zaw kum khat, David’ khan sungin kum thum sung kielpi a tung hi; tuale David in TOPA kungah thu dong hi. TOPA in, “Ama in Gibeon-te a tha ziehin Saul le a innkuon tungah sisan luonsahna zieha khielna a om hi,” a ci hi.

²Tuaci’n kumpipa in Gibeon-te hlanin amate a hopi hi. (Tu-in Gibeon-te pen Israel mite ahi sih vua, Armor mi a omlaite ahi uhi. Amate hinkhawi dingin Israel mite kiciem zo napi Israel mite le Judah mite ading a deisah luotna-in Saul in amate thagam ding na hanciem hi.)

³David in Gibeon-te kungah, “Note dingin bang kang bawlpieh diei? TOPA’ gouluo thupha na pieh thei nadingun bangci danin kilemna kang bawl thei diei?” a ci hi.

⁴Gibeon-te in ama kungah, “Kote le Saul ahi sihle a innkuon tawh kikal thu pen ngun le kham tawh a mai thei ding ahi sih hi; Israel sunga mi khatpo ka tha zieh vua zong lungkim zawh nading a om sih hi. Ama in, “Note ading kang bawlpieh ding bang hi, na ci uh ahei?” a ci hi.

⁵Amate in kumpipa kungah, “Israel gam sung teng zosie-ah mun ka nei lo nadingun kote ei thatgamin ei suhsiet sawm mipa-

⁶kote tungah a tapa sagite ei piesah inlen, kote in zong TOPA’ muoltunga om Gibeon-a TOPA mai-ah amate ka khailia ding uhi,” a ci uhi.[105] Kumpipa in, “Amate kang pie ding hi,” a ci hi.

⁷Ahi vangin kumpipa in David le Saul’ tapa Jonathan kikala om TOPA tawh kiciemna ziehin Saul’ tupa, Jonathan’ tapa Mephibosheth[106] a hinkhawi hi.

⁸Kumpipa in Aiah’ tanu Rizpah’ tapa ni, Saul tawh a nei Armoni le Mephibosheth;[107] le Saul’ tanu Merab[108] in Meholah mi Barzillai’ tapa Adriel tawh a nei a tapa ngate a la hi;

⁹ama in Gibeon-te tungah tua teng pie a, amate in TOPA mai muol tungah a khailia uhi. Amate a sagi-in a siton uhi.

¹⁰Tua ciengin Aiah’ tanu Rizpah in la-ip puon la-in, anlah huna kipan guotui kieh dongin suong khat tungah ama adingin pha a, tua misi luongte[109] tungah sunlai-in vana leng vate hile zanlai-in gamsate hile a tusah sih hi.

¹¹David kungah Saul’ meinu Aiah’ tanu Rizpah’ bawl dante a kigen ciengin

¹²David pei-in Gilboa muol tungah Philistia-te in Saul a tha lai vua Philistia-te in amate a khailupna mun Bethshan-a mipi kikhopna panin amate a guhpieh Jabesh-gilead mite tung panin Saul’ gute le a tapa Jonathan’ gute a lakia hi.

¹³Ama in khum mun panin Saul le a tapa Jonathan’ gute a puoto hi; tuale amate in a kikhailum mite’ gute zong a khawm uhi.

¹⁴Zela khuo Benjamin’ leitang, a pa Kish’ han sungah Saul le a tapa Jonathan’ gute a phum vua, kumpipa’ thupieh zosie a sem uhi. Tua zaw ciengin Pasien in khum gam adinga thumnate a sang hi.

¹⁵Israel tawh Philistia-te a kidokia vua, ama’ nasemte tawh David a kuonsuh hi. Amate in Philistia-te a sim vua, David a gim mama hi.

¹⁶Migolte suonlehlahte khat, a teipi sumngo shekel zathum a gih, galhiem a tha khat a kuo[110] Ishbi-benob in David ka that ding hi, a ci hi.

¹⁷Hizongle ama hum dingin Zeruiah’ tapa Abishai pei a, Philistia mipa simin that hi. Tua ciengin ama tungah David’ mite kiciemin, “Israel’ meivah na suhmit lo nadingin ko tawh galdo dingin nang kuon nawn sih ding hi,” a ci uhi.

¹⁸Tam zaw ciengin Gob ah Philistia-te tawh gal kidona omkia hi; tua ciengin Hushath mi Sibbecai in migolte’ suonlehlahte khat ahi Saph that hi.

¹⁹Tua ciengin Gob ah Philistia-te tawh galkidona adang khat om leuleu hi; Bethlehem-te Jaare-oregim’ tapa Elhanan in a teibul siamgante’ siemlawng cie bang a pha, Gitt-te Goliath that hi.

²⁰A khutphang langkhat tuohah khutme guh, a kephang langkhat tuohah keme guh, a unpi-in sawmni le li a nei migol khat a opna mun ahi Gath ah gal om leuleu hi; ama zong migolte’ suonlehlahte khat ma ahi hi.

²¹Ama in Israel a tawh ciengin David’ sanggampa Shimei’ tapa Jonathan in ama that hi.

²²Tam mi li teng Gath-a migolte’ suonlehlahte ahi uhi; David le a nasemte’ khutlum tawh amate a si uhi.