Read Zou 2 SAMUEL 22 Bible Online

2 SAMUEL 22 - Zou bible

2 SAMUEL 22

¹TOPA in a galte zosie’ khut sung le Saul’ khut sung panin ama a hutkhiet ni-in David in tam latengte TOPA kungah na sa hi.

²Ama in a gen hi: “TOPA khu ka suongpi, ka kulpi, kei ei hunkhie pa,

³ka Pasien, ka kibuhna ka suongpi, ka lum le ka hutdamna saki, ka mun muonhuoi le ka belh, ka hundam pa ahi hi.; nangma in a tatsie mite panin kei nei hundam hi.

⁴A phat tah TOPA ka hlan a, ka galte khut sung panin kei ei kihundam hi.

⁵Bangzieh ahei cile sina tuihuolte in kei ei imtawm a, manthaina tuikhangte in keima ei nawh hi;

⁶Misikhuo khauhuolte in kei ei kantawm a, sina thangte in kei ei dawntuo hi.

⁷Ka genthei hunin keima in TOPA’ kungah ka thum hi; ka Pasien kungah keima ka tau hi. A biehinn panin ama in ka aw za a, ama in ka kikona a bil ei ngat hi.

⁸Tua ciengin ama’ lungthah ziehin leitung kithingin, nahpi-in kilawh gawp a, vantung dopphate kiling gawp hi.

⁹Ama’ nahkuo panin meikhu a pusuoh a, ama’ kam sung panin mi katum thei mei a pusuoh hi; ama tung panin mei-am a kuong hi.

¹⁰Ama in vantungte kunsahin a kumsuh vua; ama’ keng nei-ah khuomu tawkhalpi om hi.

¹¹Cherub khat tungah ama tuongin leng a; hui’ hlate tungah ama kimu hi.

¹²Ama in a kimvelah khuomiel a siem a, a tungkhu dingin tui kikhawmtuo meii sapi zang hi.

¹³Ama’ mai-a a taang sung panin mei-amte a kuong hi.

¹⁴Van panin keh kie bangin TOPA awngsuh a; Sangpen Pa in ama’ aw a gingsah hi.

¹⁵Ama in thaltangte kapin tuate thethang a, ama in tun phesahin amahaw a delmang hi.

¹⁶Tua ciengin TOPA’ phawsiet zieh le ama’ nahkuo panin a naahu a hla ziehin, tuipi tawdopte kimu a, leitung bulpite kidawh hi.

¹⁷Mun sang panin ei banin ei kai a, tui hatpi lah panin ei kaikhie hi.

¹⁸A thahat ka galte kung pan le ei mudate kung panin kei ei hunkhie hi; azieh pen amate a thahat mama hi.

¹⁹Ka tuosiet ni-in kei ei bulu vua, ahi vangin TOPA khu ka kingapna ahi hi.

²⁰Ama in mun tanzau ah kei ei zawpi a; ka tungah a lungkim ziehin ama in kei ei hunkhie hi.

²¹Ka dihna tawh kizui-in TOPA in thaman ei pie a; ka khutte a sienthona tawh kizui-in ama in kei ei dinkia hi.

²²Bangzieh ahei cile TOPA’ lampite ka zui zo ta a, keima in gitlo bawlin ka Pasien ka taisan sih hi.

²³Ama’ ngaina kip zosie, ka mai-ah a op ziehin, ama’ thukhamte panin kei ka piel sih ding hi.

²⁴Ama mai-ah kaw ka baang sih a, khielna panin ka kikoicing hi.

²⁵Tua ahi ziehin TOPA in keima’ thumanna zui le ama muna-ah ka sienthona zui-in kei ei dinkia zo hi.

²⁶Thuman mi tungah thumanna na lah a; kawbaang lo mi tungah kawbaan lona na lah hi.

²⁷A siengtho mi tungah na sienthona na lah a, a lungkawi mite tungah na letatna na lah hi.

²⁸Nang in mi neilutte na hunkhie a, hinanle a kiliensah mite na niemkhieh hi.

²⁹A tahtahin TOPA aw, nang ka meivah na hi a, TOPA in keima’ khuomiel a vahsah hi.

³⁰Nang ziehin galkap honkhat ka sumaimang a, Ka Pasien ziehin khuokul khat ka kan zo hi.

³¹Tam Pasien a lampi bukim a; TOPA’ kamciem a tangtung hi; ama a bel zosie adingin kidalna lum ahi hi.

³²Bangzieh ahei cile TOPA simlo Pasien koi ahei? I Pasien simlo, suongpi koi ahei?

³³Pasien in keima thahatna[111] ei guon a, ka lampi ei gol honpieh hi.[112]

³⁴Ama in keima’[113] kephangte sazuhpi kephang bangsah a, a sangna munah ei ding kipsah hi.

³⁵Ama in galsim nadingin ka khutte ei cil a, tuaci’n ka bante in sumngo thal a kuoi zo hi.

³⁶Na hundamna lum kei nei pie zo ta a, nangma’ ei panpina[114] in kei nei liensah hi.

³⁷Suohta tahin kal nei suonsah a, ka kitawnkhaw sih hi;

³⁸ka galte delin ka susiemang a, amate a manthai masangun kei ka kinuale sih hi.

³⁹A tho zo nawn lo dingin amate sumangin ka satpua a; ka kephang nei-ah amate puamat uhi.

⁴⁰Azieh pen nangma in galdo nadingin thahatna kawnggah tawh nei gah a; kei ei dote ka nei-ah na siel hi.

⁴¹Nangma in ka galte, kei ei mudate, na nuakiasah a, keima in amate ka susie gawp hi.

⁴²Amate a khuodah vua, ahi vangin a hundam ding koima om lo hi; TOPA kungah a kiko vua, hinanle ama in dawng lo hi.

⁴³Leivui bangin amate ka satvui a, lam lai-a buon nawi bangin amate ka tuonmat a, ka sianal hi.

⁴⁴Kei ei langpang mite[115] panin kei nei hunkhie a, minamte’ lutangin nei koi hi; ka theikhah lo mite in ka na a sem uhi.

⁴⁵Gamdang mite ka mai-ah kunin ka thugen a zah behun, ka thu a mang uhi.

⁴⁶Gamdang mite a lungkie vua, a mun muonhuoite panin citunin a peikhie uhi.

⁴⁷TOPA hing hi! Ka suongpi in thupha nga hinlen, ka Pasien, ka hundamna suongpi, kitawisang taheh.

⁴⁸Phu ei lahpieh Pasien in mite ka keng nei-ah koisuh a,

⁴⁹ka galte khut sung panin ei peipi a; ei langpangte tungah ei tawisang hi. Thagumhat mite khut sung panin ama in kei ei hunkhie hi.

⁵⁰TOPA aw, tam thu ziehin minamte lahah kang phat ding a, na minphatna la ka sa ding hi.

⁵¹Ama pen a kumpipa adingin hutdamna tausang ahi a, ama in a sathaunu pa David le a suonlehlahte tungah tangtawngin a itna kip a lah hi,” a ci hi.