Read Zou 2 SAMUEL 23 Bible Online

2 SAMUEL 23 - Zou bible

2 SAMUEL 23

¹Tu-in tam teng khu David’ kam nukhiate ahi hi: Pasien in a tawisang[116] mipa, Jacob’ Pasien in sathau a nu pa, Israel a thahat pa’ angvan pa, Jessi tapa David’ thuphuon tam bang ahi hi: TOPA’ hlagau in kei tungtawnin thu gen a,

²Ka kam sungah ama’ kammal a om hi.

³Israel Pasien in thu gen zo a, Israel Suongpi in kei kungah tam bangin a gen hi: Mi khat in mite tungah thumanna tawh uhin Pasien zatahna tawh a uh ciengin,

⁴tua khu zingmawng meii kai lo ni-a a suoh ni taang tawh kibang a, guo a zuh zaw ciengin lei lahah a po lopa dawngte tawh kibang hi.

⁵Ka innkuon zong Pasien tawh tua bangma hi lo amah? Azieh pen ama in kei tawh tawntung thuciemna bawl zo a, na zosie a hoi a kipin a bawl hi. Ama in ka lunggulna le ei panpina zosie ang kibelapsah sih ding amah?

⁶Ahi vangin Pasien thei lote[117] ahi uleh a kipaimang ling kungte tawh kibang hi; bangzieh ahei cile khut guoh tawh amate kitham thei lo hi;

⁷tua bangte a tham ding poma in siatawn ahi sihle teizum zang a, amate mei tawh a kihaltum sieng hi,”[118] a ci hi.

⁸Tam teng David’ nei galhang mite’ min ahi hi: Josheb-basshebeth pen Tahchemon-te a hi hi; ama pen Thumte[119] a uhpa ahi hi; ama in a teipi[120] tawi-in mi zagiet thakhatin that hi.

⁹Ama zomah Ahohi’ tapa, Dodo’ tapa Eleazar pen galhang thumte lahah khat ahi hi. Khum munah galsim dinga kikhawm Philistia-te a phin lai-un David tawh ama a om hi. Israel-te a nuakia vua,

¹⁰ahi vangin a dinna tuolah ama a ding den hi. A bante khamin a khut le a namsau a kimat dongin ama in Philistia-te a satlia hi. TOPA in khum ni-in guolzawna lienpi tungsah hi. Tua ciengin ama kungah mite a kilekia vangun misite van khawm ding beh ahi bo uhi.

¹¹Ama zomah Harar mi Agee’ tapa Shammah ahi hi. Beli a dima a pona mun Lehi-a lozau-ah Philistia-te a kikhawm uhi; tuale Philistia-te kung panin galkapte a taimang uhi.

¹²Hizongle ama lozau laikimah pangin tua lo hung a, Philistia-te that hi; tuale TOPA in guolzawna lienpi a piengsah hi.

¹³Anlah kipat hunin Adullam leihawm-a om David kungah ama pawl dingin uhpi sawmthumte[121] sung panin mi thumte a peisuh vua, tua hun laitahin Philistia-te honkhat in Rephaim kuomah giephuol a sat uhi.

¹⁴Tua ciengin mun muonhuoi sungah David a om hi; tuale Bethlehem ah Philistia khuocingte a om uhi.

¹⁵David in lunggulna tawh, “Mi khat in Bethlehem tunkot gei-a tuikhuh panin ka dawn ding tui ei saw leh nuom sam vang e!” a ci hi.

¹⁶Tua bepin galhang thumte in Philistia-te’ galphuol a phukeh vua, tunkot gei-a om Bethlehem tuikhuh panin tui tawi-in David kungah a peipi uhi. Ahi vangin ama in tua tui dawn lo hi; ama in TOPA adingin tua tui a sung hi,

¹⁷azieh pen ama in, “TOPA aw, tami tui ka dawn vawt sih ding hi. A hinna uh khama a va peite’ sisan ken ka dawn thei ding amah?” a ci hi. Tua ahi ziehin ama in a dawn sih hi. Galhang thumte in tam bangin a sem uhi.

¹⁸Tu-in Zeruiah’ tapa Joab’ sanggampa Abishai pen mi Sawmthumte[122] a uhpa ahi hi. Ama in a teipi tawh mi zathum simin that a, ama in mi Thumte banah minthanna nga hi.

¹⁹Mihing Sawmthumte[123] sung panin ama a mindawh pen ahi a, amau’ makai a suoh hi. Ahi vangin ama in tua mi Thumte ban zo lo hi.

²⁰Kabzeel khuo panin Jehoiada’ tapa Benaiah zong a hang le galdo a siem,[124] na golpi a sempa khat ahi hi; ama in Moab-te Ariel’[125] tapate ni a satlia hi. Vua kieh ni khatin ama zong peisuhin leihawm sunga om humpi khat that hi.

²¹Ama in Egypt-te a melhoi khat that hi. Egypt-pa in a khutah teipi tawi hi; ahi vangin Benaiah in ciengkhut khat tawi-in ama kungah pei a, Egypt-pa’ khut sung panin a teipi lahpiehin ama’ teipi ma tawh ama that hi.

²²Jehoiada’ tapa Benaiah in tua bang teng na bawl a, galhang Thumte banah min na nga hi.

²³Ama pen mi Sawmthumte lahah a min kidawh a, ahi vangin ama in mi Thumte pha zo deu lo hi. David in ama pen ama cingte uhpa-in koi hi.

²⁴Mi Sawmthumte lahah Joab’ sanggampa Asahel; Bethlehem-te Dodo’ tapa Elhanan;

²⁵Harod-te Shammah, Harod-te Elika;

²⁶Palti-te Helez; Tekoa-te Ikkesh’ tapa Ira;

²⁷Anathoth-te Abiezer; Hushath-te Mebunnai;

²⁸Ahoh-te Zalmon; Netophah-te Maharai;

²⁹Netophah-te Baanah’ tapa Heleb; Benjamin-te’ gam sunga om Gibeah-te Ribai’ tapa Ittai;

³⁰Pirathon-te Benaiah; Gaash gei-a kuom panin Hiddai;

³¹Arbath-te Abi-albon; Bahurim-te Azmaveth;

³²Shaalbon-te Eliahba; Jashen’ tapate: Jonathan

³³Harar-te Shammah’ tapa[126], Harar-te Sharar’ tapa Ahiam;

³⁴Maacah-te Ahasbai’ tapa Eliphelet; Gilon-te Ahithophel’ tapa Eliam;

³⁵Carmel-te Hezro,[127] Arbi-te Paarai;

³⁶Zobah-te Nathan’ tapa Igal; Gad-te Bani;

³⁷Ammon-te Zelek; Beeroth-te Naharai; Zeruiah’ tapa galhiem a tawi Joab; Beeroth-te Naharai;

³⁸Ithri-te Ira, Ithri-te Gareb,

³⁹Hitt-te Uriah; a unpi-in sawmthum le sagi ahi hi.