Read Zou 2 SAMUEL 24 Bible Online

2 SAMUEL 24 - Zou bible

2 SAMUEL 24

¹Khatvei Israel tungah TOPA a sinsokia a, amate langkhatah David hantawhin, “Pei inlen Israel le Judah mite va sim ta’n,” a ci hi.

²Tuaci’n kumpipa in Joab le ama tawh a omton galkapmangte[128] kungah, “Mi bangza pha ahei ci ka thei nadingin Dan panin Beer-sheba dong Israel minam zosie lahah pei-in mi phaza va sim ta un,” a ci hi.

³Hinanle Joab in kumpipa kungah, “TOPA na Pasien in mi a za zakhatin pungsah hinlen, ka pu kumpipa’ mit in a mu thei lai dingin hing bawl taheh! Ahi vangin bang dinga ka pu kumpipa in tam thu na bawl nuom mawh ahei?” a ci hi.

⁴Hizongle kumpipa thugen in Joab le galkapmangte a thuzaw hi. Tuaci’n Israel mi phaza a sim dingin kumpipa opna panin Joab le galkapmangte a dingkhie uhi.

⁵Amate Jordan galkai-in Aroer le kuom laikima om khuopi pan kipanin[129] Gad lam manaw-in Jazer lamah a peisuoh uhi.

⁶Tua ciengin amate Gilead-ah a tung vua, khum tah panin Hitt-te’[130] gam Kadesh a tung uhi; tuale khum panin amate Dan ah a tung vua, Dan[131] panin kuol pei-in Sidon a tung uhi,

⁷tuale Tyre kulpi, Hiv-te le Canaan-te’ khuopi zosie-ah a amate tung uhi; tuale khum panin Judah-te’ Negeb lam Beer-sheba ah a pei uhi.

⁸Tuaci’n a gam sung zosie a kuolva zaw uh, hla kuo le ni sawmni a cin zaw ciengin Jerusalem-ah a peikia uhi.

⁹Joab in a kumpipa kungah a kisimsa mi phaza gawm a puoh hi: Israel sungah namsau tawi thei galkap tul zagiet om a, Judah sungah tul zanga a om hi.

¹⁰Ahi vangin khum zaw ciengin ama in mi a sim zo tah ziehin David kisia mama hi. David in TOPA kungah, “Ka silbawlsa tung tangah nahpi tahin ka maw hi. Ahi vangin tu-in, TOPA aw, nang tungah kang thum hi. Na nasempa’ khielna ei ngaidam in. Azieh pen ka mot gamtat hai kha ta hi,” a ci hi.

¹¹Zingmawngin David a thaw ciengin David’ thumu pa kamsang Gad tungah TOPA’ thu tung a,

¹²“Pei inlen David kungah tam bangin gen in: TOPA in tam bangin a gen hi: Nang tungah thu thum kang pie[132] hi. Khat penpen teel in, na tungah kang bawl ding hi,’ ci hi,” a ci hi.

¹³Tuaci’n David kungah Gad pei-in a gen hi. Ama in, “Kum thum[133] sung na gamah kielpi ang tungzaw ding mah? Na galte in hla thum sung hing gamdelin a masang vuah taizaw ding na mah? Ahi sihle ni thum sung na gamah pul natna hing tungzaw ding amah? Tu-in ngaisun inlen ei sawlpa kungah bang dawnna puohkia ding ka hei khentat in,” ci-in dong hi.

¹⁴Tua ciengin David in Gad kungah, “Ka lung a kham mama hi; ama’ ei hepina lien seng ahi ziehin mihing’ khut sungah ei tungsah sih hinlen, TOPA’ khut sungah tungzaw vai,” a ci hi.

¹⁵Tuaci’n TOPA in zingmawng panin a kise hun cieng dongin Israel-te tungah pul natna a tungsah hi; tuale Dan panin Beer-sheba dongin mi tul sawm sagi a si hi.

¹⁶Ahi vangin Jerusalem a susie dingin vantungmi in a khut a zah laitahin TOPA in sil hoi lo bawl ding ki-awi loin mite lahah sietna bawlpa vantungmi kungah, “Pha zo ta; tu-in khawl ta’n,” a ci hi. Tua ciengin Jebus-te Araunah’ ancilna gei-ah TOPA’ vantungmi a om hi.

¹⁷David in mi susie vantungmi a mu bepin ama in TOPA kungah, “A maw kei beh ka hi hi, a gitlo gamtat kei beh ka hi bo hi; tami tuute in bang a bawl uh ahei? Kang thum hi, keima le ka innkuonpite tung behah na khut hing hlang in,” a ci hi.

¹⁸Khum ni-in David kungah Gad pei-in, “Peito inlen Jebus-te Araunah’ ancilna-ah TOPA dingin maitam khat va bawl ta’n,” a ci hi.

¹⁹TOPA’ thupiehsa bangin Gad’ hilna bang zui-in David a peito hi.

²⁰Araunah in a ensuh leh kumpipa le a nasemte ama kung lam zuona ang peito a mu hi. Araunah zong a pusuoh hi; tuale David mai-ah tuolkunin a khupbawh hi.

²¹Araunah in, “Ka pu kumpipa’ na nasempa kungah bang dinga hing haw na hei?” a ci hi. David in, “Mite tung panin pulnatna a ven thei nadingin na ancilna kilei hinlen tuami tungah TOPA adingin maitam khat kilam leh ka ci hi,” a ci hi.

²²Tua ciengin Araunah in David kungah, “Hoi na sah bangin ka pu kumpipa in la inlen biehna pie in; meihal biehna dingin bawngtangte le na meitaw nadingin ancilna peehte le bawng lokaina hahkol singte tanah a om hi.

²³Kumpipa aw, keima Araunah in tam teng zosie kumpipa tungah kang pie hi,” a ci hi. Tuale Araunah in kumpipa kungah, “Nangma tungah TOPA na Pasien in hepi lungsiet tahin hing thuh taheh,” a ci hi.

²⁴Ahi vangin kumpipa in Araunah kungah, “Hi lo hi, tamte pen nangma tung panin a man pie-a kang lei ding ahi bo hi. A man bangma pie loin TOPA ka Pasien tungah meihal biehna ka pie sih ding hi,” a ci hi. Tuaci’n David in ngun shekel sawmnga tawh ancilna phuol le bawngtang tegel a lei hi.

²⁵David in khumnah TOPA adingin maitam khat bawl a, meihal biehna le thunuoma biehna a pie hi. Tuaci’n TOPA in khum gam ading thumnate dawng a, Israel sung panin pul natna a veng hi.