Read Zou 2 SAMUEL 4 Bible Online

2 SAMUEL 4 - Zou bible

2 SAMUEL 4

¹Hebron-ah Abner si zo ci thu Saul’ tapa Ishbaal[18] in a zah ciengin a thakiem a, Israel zosie lungkie uhi.

²Saul’ tapa in galsim pawlte makai mi ni nei hi; khat pa’ min Baanah hi a, adang khat pa’ min Rechab ahi hi. Ama gel pen Beeroth pan Benjamin mi Rimmon’ tapate ahi uhi, azieh pen Beeroth khu Benjamin-a’ in kisim hi.

³(Gittaim-ah Beeroth mite a tai vua, tuni dongin khum tahah pemta-in a om uhi.)

⁴Saul’ tapa Jonathan in tapa khelbai khat nei hi. Jezreel panin Saul le Jonathan’ si a kizahin ama kum nga a pha hi. A naucing nu in ama la-in a taipi hi; tuale ama nu a nawtai na lamin naupangno khiehsuo-in a khel a bai hi. Ama’ min Mephibosheth ahi hi.[19]

⁵Tu-in Beeroth mi Rimmon’ tapate Rechab le Baanah a kuon vua, sun nisat hun pawl, Ishbaal’[20] inn ah a sunkim tawlngah hun laitahin a tung gel hi.

⁶Ama gel zong mangbu la ding a kipang vua, inn sungah lutin a gilpi a sutkehpieh vua, tua ciengin Rechab le a sanggampa Baanah a suohta uhi.[21]

⁷Tu-in ama’ lupna khan sunga a lupna tungah a lup laitahin inn sungah ama gel a lut uhi; ama gel in ama simin a that vua, a lu a tan uhi. Tua ciengin a lutang la-in Arabah lampi zui-in zan tawn tungin a pei uhi.

⁸Hebron-a om David kungah ama gel in Ishbaal’[22] lutang a tut vua, tuale kumpipa kungah, “Tha dinga ang sui na gal Saul’ tapa Ishbaal’[23] lutang tam sungah om hi; TOPA in tuni-in Saul le a suonlehlahte tungah ka pu kumpipa’ phu la zo hi,” a ci uhi.

⁹David in zong Beeroth-te Rimmon’ tapa gel ahi Rechab le a sanggampa Baanah dawngin, “Hahsatna zosie panin keima’ hinna ei hunkhie TOPA a hing ahi ma bangin,

¹⁰mi khat in ka kungah, ‘En in, Saul si ta,’ ci-a ang gen ciengin ama thuhoi puohin a kingaituo a, ken lah ama manin Ziklag-ah ka that hi; tam pen keima in ama’ thupuoh zieha ka pieh thaman ahi hi.

¹¹Tua ahile ama’ inn sung, ama’ lupna tungah mi dihpa khat a that migilopa tungah bang za-in sietna kibawl zaw kan lai ding ahei! Tu-in na khut sung vuah ama’ sisan hing ngenin leitung panin kang susie sih ding uh amah?” a ci hi.

¹²Tuaci’n David in tangvalte thu pie a, ama gel a that uhi; ama gel in a khut a keng tegel sattanin Hebron-a buol gei-ah a luonghawm a khai uhi. Hinanle Ishbaal’[24] lutang la-in Hebron-a Abner’ hanah a vui uhi.