Read Zou 2 SAMUEL 6 Bible Online

2 SAMUEL 6 - Zou bible

2 SAMUEL 6

¹David in Israel-te a kiteelkhie mi tul sawmthum khawmkia hi.

²Khum mun panin Cherub-te tunga om, Vanglien TOPA’ min tawh a kilo Pasien’ singkuong a zawng dingin a optonpi mi zosie tawh Baale-judah ah David a pei uhi.

³Leeng tha tungah Pasien’ Singkuong a puo vua, muol tunga om Abinadab’ inn panin a peipi uhi. Abinadab’ tapate Uzzah le Ahio[28] in leeng tha khat tawh

⁴Pasien’ singkuong a hawi uhi; tuale singkuong[29] mai-ah Ahio[30] a pei hi.

⁵David le Israel’ innkuon zosie in a tha nei za-un, TOPA mai-ah late,[31] lyre lasahnate, harp lasahnate, tawmte, kuongtuote, le daltuote tumin a lam uhi.

⁶Nacon’ ancilna phuol a tun ciengun bawngtangte in leeng a lawthing ziehin Uzzah in Pasien’ singkuong a khut tawh zamin tu kha hi.

⁷Uzzah tungah TOPA’ lungthahna a tung hi; tuale ama in a khut tawh singkuong a zap ziehin Pasien in khum munah ama a vatlum hi; tuale [32]Pasien’ singkuong gei-ah ama a si hi.

⁸Pasien in Uzzah a tha ziehin David lungthah mama hi; tuaci’n tuni dongin khum mun pen Perez-uzza[33] ci-in a min kiphuo hi.

⁹Khum ni-in David in TOPA a giing hi; ama in, “Keima’ kep dingin “TOPA’ singkuong bang hing ci tun thei ding ahei?” a ci hi.

¹⁰Tuaci’n David khuopi sunga ama’ kep dingin TOPA’ singkuong a kitut ding David nuom lo hi; tua sung tangin David in Gitt mi Obed-edom’ inn ah a tut hi.

¹¹Gitt mi Obed-edom’ inn ah TOPA’ singkuong hla thum sung a thaam hi; tuale TOPA in Obed-edom le a innkuonpi zosie thupha a pie hi.

¹²Kumpi David kungah, “Pasien’ singkuong ziehin TOPA in Obed-edom innkuon le ama’ nei zosie thupha pie hi,” ci-in kigen hi. Tuaci’n David pei-in Obed-edom’ inn panin David khuopi sungah kipahtahin Pasien’ singkuong a peipi hi;

¹³tuale TOPA’ singkuong a puote in kal guh a suon zaw ciengun ama in bawngtang khat le bawngno thau khat biehpiehna-in a pie hi.

¹⁴TOPA mai-ah a tha nei za-in David lam hi; David in saihadiel siempupuon khat sil hi.

¹⁵Tuaci’n David le Israel mi zosie in kikona le pengkul tumna tawh TOPA’ singkuong a peipito uhi.

¹⁶David khuopi sungah TOPA’ singkuong a tun lai tahin tawlet panin Saul’ tanu Michal khuodah a, tuale ama in TOPA mai-ah David Kumpipa lamin a dieng vazawh a mu hi; tuale ama nu in a lungsim sungah a simmaw dap mama hi.

¹⁷Amate in TOPA’ singkuong a lutpi vua, tuale David in ama dinga a na lamsa ahi puonbuh sung ama mun dingah koi hi; tuale TOPA mai-ah David in meihal biehnate le thunuom biehnate a pie hi.

¹⁸David in meihal biehnate le thunuom biehnate a pieh zaw ciengin Vanglien TOPA’ minin mite thupha pie a,

¹⁹mite zosie lahah Israel mihon buppi, numei le pasalte moh pheng khat, saba khat[34], le lenggagaw pheng khat ciet a pie hi. Tua ciengin mi zosie a inn ciet vuah a pei uhi.

²⁰A innkuonte thupha pie dingin David a peikia hi. Hinanle David dawn dingin Saul’ tanu Michal pei a, tuale ama in, “Mi kheltat khatpo in zumzie thei loin a guohtanga a op bangin, a nasem numeite muna-ah tuni-in a guohtanga a om Israel kumpipa khu ama le ama bangci kipatawi a ta diei!” a ci hi.

²¹David in Michal kungah, “TOPA’ mi Israel tungah ulien dinga ei koi dingin na pa le a innkuonte zosie tanga kei ei teel TOPA mai ahi hi.

²²Tam sangin a simmawhuoi zaw-in kei le kei ka kibawl lai ding a, keima’ mitmu mama-in a ginalo ka hi ding hi; hinanle nangma’ gen numeite in kei ei zatah mama ding uhi,” a ci hi.

²³Saul’ tanu Michal a si dongin ta nei thei nawn lo hi.