Read Zou 2 SAMUEL 8 Bible Online

2 SAMUEL 8 - Zou bible

2 SAMUEL 8

¹Tua zaw hun khat ciengin David in Philistia-te simin a zo hi; David in Philistia-te’ khut sung panin Metheg-ammah a la hi.

²Ama in Moab-te zong zo-in tuolah lumsah a, khauzam khat tawh amate a te hi; ama in tha dingin guol ni le hinkhawi dingin guol khat[43] dim a te hi. Moab-te ahile David’ nasemte suohin sieh le kaihte a pie uhi.

³A uhna gam[44] ngakia nuomin Euphrates lui-ah Zobah kumpipa Rehob’ tapa Hadadezer a pei laitahin David in ama a vatlum hi.

⁴David in sakol galkap tulkhat le zasagi le lei galkap tul sawmni man hi. David in leengkai sakol zosie a kapzahui vatsan a, hinanle leeng zakhat adingin a kicing a hen hi.

⁵Damascus gama Aram-te, Zobah kumpipa Hadadezer a panpi dingin a kuon ciengun David in Aram-te tul sawmni le tulni that hi.

⁶Tua ciengin David in Damascus gama Aram-te lahah khuocingte koi hi; tuale Aram-te pen David’ nasemte a suoh vua, sieh le kaih a pie uhi. TOPA in a peina popo-ah David guolzawna a pie hi.

⁷David in Hadadezer’ nasemte in a puoh uh kham tawh kibawl lumte a lahpieh a, Jerusalem-ah tuate a peipi hi.

⁸David Kumpipa in Hadadezer’ khuopite Betah le Berothai panin sumngo tampi a la hi.

⁹David in Hadadezer’ galkap zosie a zawna thu Hamath kumpipa Toi in a zah ciengin,

¹⁰ama in Hadadezar do-in a zawna hangin ama a hopi ding le a noppi dingin Toi in Kumpi David kungah a tapa Joram a sawl hi. Hadadezer pen Toi tawh galin a kido ngai zel hi. Joram in ngun, kham, le sumngo tawh kibawl nate a puoh hi;

¹¹David in a zawsa minam zosiete panin a ap ngun le khamte tawh

¹²Edom, Moab, Ammon-te, Philistia-te, le Zobah kumpipa Rehob’ tapa Hadadezer in a nuasie van teng zong TOPA tungah ap hi.

¹³David in ama’ minthan nadingin a bawl hi. A kinuale lamin ama in Ci Kuom ah Edom-te[45] tul sawm le tulgiet that hi.

¹⁴Ama in Edom ah khuocingte a koi hi; ama in Edom gam mun zosie-ah khuocingte koi a, tuale Edom-te zosie David’ nasemte a suoh uhi. Tuale a peina popo-ah TOPA in David guolzawna a pie hi.

¹⁵Tuaci’n Israel gam sungah David a maang hi; tuale David in a mi zosie tungah thutang le thuman zang hi.

¹⁶Zeruiah’ tapa Joab in galkapte uh hi; Ahilud’ tapa Jehoshaphat pen thuciemte pa ahi hi;

¹⁷Ahitub’ tapa Zadok le Abiathar’ tapa pen Ahimelech siempu ahi uhi; Seraiah pen thuvanpi pa ahi hi;

¹⁸Jehoiada’ tapa Benaiah in Chereth-te le Peleth-te tungah[46] uh a, David’ tapate siempu ahi uhi.