Read Zou 2 SAMUEL 9 Bible Online

2 SAMUEL 9 - Zou bible

2 SAMUEL 9

¹David in, “Jonathan ziehin ama tungah ka migitna ka lah thei nadingin Saul’ innkuon sungah mi khatpo a om lai ei mah’” ci-in dong hi.

²Saul’ innkuon sungah a min Ziba a kici nasempa khat om a, ama David kungah a hlan uhi. Kumpipa in ama kungah, “Nang Ziba na mah?” a ci leh ama in, “Na nasempa hi na’ng!” a ci hi.

³Kumpipa in, “Pasien’ migitna ama tungah ka lah thei nadingin Saul’ innkuon sungah mi khat beh a om lai diei mah?” a ci hi. Ziba in kumpipa kungah, “Jonathan’ tapa khat omlai hi; ama pen a khelbai ahi hi,” a ci hi.

⁴Kumpipa in, “Ama hei-a om ahiei?” a ci hi. Ziba in kumpipa kungah, “Lodebar-a Ammiel’ tapa Machir’ inn ah om hi,” a ci hi.

⁵Tua ciengin Kumpi David in mi sawlin Lodebar-a Ammiel’ tapa Machir’ inn panin ama a lasah hi.

⁶David kungah Saul’ tapa Jonathan, a tapa Mephibosheth[47] a pei a, tuale a mai tuol kunin zatahna a pie hi. David in, “Mephibosheth!”[48] a ci hi. Ama in dawng a, “Na nasempa ka hi hi,” a ci hi.

⁷David in ama kungah, “Zau sin, azieh pen na pa Jonathan ziehin na tungah migitna kang lah ding hi; keima in na pu Saul’ leitang zosie nang tungah kang piekia ding a, ka sabuoi-ah an na ne zing ding hi,” a ci hi.

⁸Ama in zatahna pie-in, “Ui sisa khat bang lel kei nei hici bawl nadingin na nasempa bang hi mawh ka hei?” a ci hi.

⁹Tua ciengin kumpipa in Saul’ nasempa Ziba hlanin ama kungah, “Saul le a innkuon sung mite’ neisa zosie na pu’ tupa kungah ka pie zo hi.

¹⁰Nangma le na tapate le na nasemte in ama adingin lo na hlo ding vua, na pu’ tupa in anneh ding a nei nadingin lo-a piengte na puoh ding uhi; hizongle na pu’ tupa Mephibosheth[49] in ka sabuoi ah an a ne zing ding hi,” a ci hi. Tua hun laitahin Ziba in tapa sawm le nga le nasem sawmni nei hi.

¹¹Tua ciengin Ziba in kumpipa kungah, “Ka pu kumpipa in a nasempa nei thupieh zosie bangin na nasempa in a sem ding hi,” a ci hi. Mephibosheth[50] in kumpipa’ tapate khat bangin David’[51] sabuoi-ah an a ne hi.

¹²Mephibosheth[52] in a min Mica a kici tapa tangval khat nei hi. Tuale Ziba’ inn-a a teng zosie zong Mephibosheth’[53] nasemte a suoh uhi.

¹³Ama in kumpipa’ sabuoi-ah an a neh zing ziehin Jerusalem ah Mephibosheth[54] a teng hi. Tu-in ama pen a khel a langni-a bai ahi hi.