Read Zou 1 KUMPITE 10 Bible Online

1 KUMPITE 10 - Zou bible

1 KUMPITE 10

¹Sheba kumpinu in Solomon’ minthanna a zah ciengin, (TOPA’ min zieha[23] a minthanna) thudawhna hamsate tawh a ma zelah dingin ama kungah haw hi.

²A namtui nate, kham tampi le suong manphate a puo kalaohte, le ama’ nuazui honpite tawh Jerusalem ah tua nu pei hi; tuale ama Solomon kung a tun ciengin a lungsim sunga om zosie a gen hi.

³Solomon in tua nu thudawh zosie a unpi-in a dawng hi; Kumpipa in tua nu tungah a gencien thei lo thuhamsa khat beh om lo hi.

⁴Sheba kumpinu in Solomon’ pilna, a lamsa a inn,

⁵a sabuoi-a kilui an, a uliente tona, le a nasemte’ kep le khoi dan, a puonsil a nihtente uh, ama an a piete, le TOPA’ inn sunga meihal biehna zosiete a mu ciengin a hla tawh zong teng nawn lo hi.

⁶Tuaci’n ama in kumpipa kungah, “Keima in ka gam panin na sepsate le na pilna thu kigen ka zahte a man ahi a,

⁷hinanle pei-in tua thu kigente ka mit tawh ka mu masangsie ka tahsang sih hi. Keima kungah alang nangawn ang kigen nai sih hi; na pilna le na hauna in ka zah thute a khupsin sieng hi.

⁸Na zite[24] mi hampha ahi uhi! Nangma hing khoi-in nangma’ pilna a tawntunga a za den tam nasemte zong mi hampha ahi uhi!

⁹Nangma tungah lungkimin Israel kumpi topha tunga ang tosah TOPA na Pasien in thupha nga taheh! TOPA in Israel a it zing ziehin nangma in thutang le thuman na sep thei nadingin ama in kumpi-in nang ang bawl hi,” a ci hi.

¹⁰Tua ciengin tua nu in kumpipa tungah kham talent za le sawmni, le gimnamtui tampi le suong manphate a pie hi. Sheba kumpinu in Kumpi Solomon tunga a pieh za-a a tam gimnamtuite a kipuoh ngai nawn sih hi.

¹¹Tua tham loin Ophir panin kham a puo Hiram’ tembaw honte in Ophir panin cingsing le suong manpha tampitah a puoh uhi.

¹²Kumpipa in tua cingsingte TOPA’ biehinn le kumpipa’ inn dona-in zang a, lasate ading lyre lasahna le harp lasahna-in zong a bawl hi; tua bang cingsingte tuni dongin kipuoh ngai nawn lo a, zong kimu ngai nawn lo hi.

¹³Khum hun sungin Kumpi Solomon in kumpi letsongte a pieh banah ama in a dei a nget zosie zong Sheba kumpinu tungah a pie hi. Tua ciengin a nasemte tawh a gam zuonin tua nu a pei hi.

¹⁴Kum simin Solomon kunga a tung kham a gihna talent zaguh le sawmguh le guh ahi hi.

¹⁵Tua banah summet bawlte le sumbuhte, Arabia kumpite le gamsung uhpite tung pana a peite zong omlai hi.

¹⁶Solomon in a kikheng kham tawh kibawl lum a gol zani bawl hi; lum a gol khat bawlna-ah kham shekel zaguh lut hi.

¹⁷Ama in a kikheng kham tawh a kibawl lum zathum bawl hi; lum khat ciengin kham mina[25] thum ta lut hi; tuale kumpipa in Lebanon Gamlah Inn a kici sungah tua lumte koi hi.

¹⁸Kumpipa in saiha tawh kumpi topha golpi khat zong bawl a, kham hoipente tawh tua topha zut hi.

¹⁹Kumpi topha in kalei ciel guh nei hi. Kumpi topha tunglam pen a nualamah a bemin kibawl a, a tona pang tuohah ban ngahnate omin tua ban ngahnate pangah humpi ni a ding hi.

²⁰Kalei ciel guh’ mong cietah khat ciet a om humpi sawm le ni a ding hi. Koima’ kumpi gam sungah tam banga kibawl kumpi topha om ngai lo hi.

²¹Kumpi Solomon’ tuidawnna hai zosiete kham tawh kibawl ahi a, Lebanon Gamlah Inn sunga kizang kuong le beel zosie zong kham tawh kibawl vive hi a, ngun tawh kibawl khat beh om lo hi; Solomon hun lai-in ngun pen bangma-in kisim lo hi.

²²Azieh pen kumpipa in Tarshish tembaw honpi khat nei a, tuipi tungah Hiram’ tembaw honte tawh a peiton vua, kum thum a cin sielin Tarshish tembaw honte khatvei ta pei-in kham, ngun, saiha, zawngmang, le utongte[26] puoh zel uhi.

²³Tua bangin Kumpi Solomon in a hauna le a pilna tawh leitung kumpi zosie a khupsin hi.

²⁴Pasien in a lungsim sunga a guot a pilna ngai dingin leitung buppi in Solomon’ opna a leisui uhi.

²⁵Ama kunga a haw mi zosie in a kumkumin letsong, ngun le kham tawh kibawl nate, puonsilte, galvante, gimnamtuite, sakolte, le laa-sakolte tampi puoh uhi.

²⁶Solomon in leengte le sakol tung tuongte khawm hi; ama in leeng tul le zali tuonna sakol tul sawm le tulni nei a, leeng koina khuopite le Jerusalem-a kumpipa’ opna munah tuate koi hi.

²⁷Kumpipa in Jerusalem ah ngun suong bangin olsahin Shephalah-a theitheh sing bangin vausah hi.

²⁸Solomon sakol leina gam pen Egypt gam le Kue gam hi a, kumpipa’ sumbawlte in Kue gamah a manpie-in a lei uhi.

²⁹Egypt panin leeng khat ngun shekel zaguh, sakol khat shekel za le sawmnga-in kinga hi; tuaci’n kumpipa’ sumbawlte tungtawnin Hit-te’ kumpite zosie le Aram-te’ kumpite kungah tuate kizuasawn hi.