Read Zou 1 KUMPITE 12 Bible Online

1 KUMPITE 12 - Zou bible

1 KUMPITE 12

¹Ama kumpi suohsah dingin Shechem ah Israel mi zosie a pei zo tah ziehun Rehoboam zong a pei hi.

²Nebat’ tapa Jeroboam in tua thu a zah ciengin (azieh pen Kumpi Solomon kung pan a taina Egypt ah a omlai hi), Egypt panin[32] Jeroboam a kilekia hi.

³Amate in mi sawlin ama a hlan uhi; tuale Jeroboam le a kikhawm Israel buppi pei-in Rehoboam kungah,

⁴“Na pa in ka hahkol uh a gihsah hi. Tua ziehin tu-in na pa’ nasep a hamsate le kote tunga ei suon a hahkol gihte hing zangsah in. Tua hile nangma’ na ka sem ding uhi,” a ci uhi.

⁵Ama in amate kung ah, “Ni thum sung va pei unlen, tua ciengin ka kungah hing peikia un,” a ci hi. Tuaci’n mite a pei uhi.

⁶Tua ciengin Kumpi Rehoboam in a pa Solomon hin lai-a a na sem khangham mite hlanin thu kuppi a, “Tam mite ka dawn nadingin ngaisutna bang nei ci pieh ding vuoi?” a ci hi.

⁷Amate in ama kungah, “Tuni-in tam mite’ nasem suohin, a na uh nasep a, kam hoino tawh na dawn leh amate na nasem ahi zing ding uhi,” a ci uhi.

⁸Ahi vangin ama in khanghamte’ ngaisutna piehte thuse loin tu-a ama’ mai-a ding a khanguol tangvalte po thu a kuppi zaw hi.

⁹Ama in amate kungah, “’Na pa in ko tunga ei suon hahkol hing zangsah in,’ ei ci mite bang ka ci dawn diei?” a ci hi.

¹⁰A khanguol tangvalte in ama kungah, “Na kungah, ‘Na pa in ka hahkol uh a gihsah hi, ahi vangin nang in kote adingin hing zangsah in,’ ang ci mite kungah tam bangin na gen ding hi; amate kungah, ‘Ka pa’ kawng sangin ka khutme a sazaw hi.

¹¹Tu-in ka pa in na tung vuah hahkol gih ang suon hi. Keima in na hahkol uh kang belap lai ding hi. Ka pa in khauhuol tawh note ang thuhil a, hinanle keima in cieng lingnei tawh note thu kang hil ding hi,’ na ci ding hi,” a ci uhi.

¹²Tuaci’n kumpipa in, “Ni thum ni-in hing peikia un,” a ci ma bangin Rehoboam kungah Jeroboam le mi zosie a pei uhi.

¹³Tua kumpipa in mite ngawh dawn a, ama in khanghamte’ ngaisutna piehte thuse loin,

¹⁴khangnote’ ngaisutna piehna bangin a tung vuah gen a, “Ka pa in na hahkol uh ang gihsah hi, ahi vangin keima in na hahkol uh ka belap ding hi; ka pa in note cieng tawh ang thuhil hi. Keima in cieng lingnei tawh note kang thuhil ding hi,” a ci hi.

¹⁵Tuaci’n kumpipa in mite’ thu a ngai sih hi. Bangzieh ahei cile TOPA in Shilon-te Ahijah tungtawnin Nebat’ tapa Jeroboam tunga a gensa thu a tangtun thei nadinga TOPA in a piensah thu kiheina ahi hi.

¹⁶Kumpipa in a thu uh a ngai lo lamtah Israel zosie in a mu ciengun mite in kumpipa a dawng vua, Kote in David sungah tanh bang ka nei uh ahei? Jessi tapa sungah gamhluo ka nei sih uhi. Israel aw, na puonbuh ah pei in! David aw, tu-in na innsung beh en in,” a ci uhi. Tuaci’n a puonbuh ah Israel a pei hi.

¹⁷Ahi vangin Rehoboam in Judah khuopite sunga teng Israel-te uh hi.

¹⁸Kumpi Rehoboam in thona-aana nasemte uhpa Adoram a sawl ciengin Israel zosie in suong tawh ama a seplia uhi. Jerusalem-a tai dingin a sakol leengah kumpi Rehoboam a nawtuon hi.

¹⁹Tuaci’n tuni dongin Israel in David’ innkuonte a ledo hi.

²⁰Jeroboam a kinuale zo ahi lamtah Israel zosie in a zah bepun amate in zong mi sawlin kikhopna-ah ama hlansah a, Israel zosie tungah kumpi a semsah uhi. Judah minam khat beh simlo David’ innkuonte a zui koima dang om lo hi.

²¹Jerusalem ah Rehoboam a tun ciengin, Solomon’ tapa Rehoboam in kumpi gam a ngakia thei nadingin Israel innkuon sim dingin Judah’ innkuonte zosie le Benjamin minam, a kiteel galkap tul zakhat le tul sawmgiet kaikhawm hi.

²²Ahi vangin Pasien’ mipa Shemaiah tungah Pasien’ thu a tung hi:

²³Judah Kumpipa, Solomon’ tapa Rehoboam tung, Judah le Benjamin’ innkuon zosiete tung, le a omlai mite tungah gen in.

²⁴“TOPA in tam bangin gen hi, ‘Na kuonto sih ding vua, na sanggam Israel mite na do sih ding uhi. Mi zosie a inn vuah pei uheh. Azieh pen tam thu pen keima kung pan ahi hi,’ ci hi,” a ci hi. Tuaci’n amate in zong TOPA’ thu a mang vua, TOPA’ thugen bangin inn lam a zuonkia uhi.

²⁵Tua ciengin Jeroboam in Ephraim muoltung gamah Shechem satin khum munah a teng hi; ama khum panin pei-in Penuel a sat hi.

²⁶Tua ciengin Jeroboam in a lungsim sungah, “Tu-in David’ innkuonte tungah kumpi gam kiheikia thei kha ding hi.

²⁷Jerusalem-a TOPA’ biehinn-ah biehpiehna pie dingin tam mite kuonto den uleh a pupa uh Kumpi Rehoboam lamah a lungsim uh kiheikia ding hi; amate in kei ei thatin Judah Kumpi Rehoboam kungah a kilekia ding uhi,” a ci hi.

²⁸Tuaci’n kumpipa in mite thu kuppi kawikawi a, kham bawngno lim ni a bawl hi. Ama in mite tungah,[33] “Jerusalem ah sauvei na peito zo ta uhi. Israel mite aw, tamtahah Egypt gam pana ang peipi na pasiente uh a om hi,” a ci hi.

²⁹Ama in khat Bethel ah koi a, a khat pen Dan ah koi hi.

³⁰Mi kimkhat a bie dingin Bethel ah, adangte Dan[34] cieng dong a pei ziehun tam pen mawna khat a suoh hi.

³¹Ama in munsangte tungah zong innte[35] lam a, mi zosiete lah panin Levi-te ahi lo mite siempu-in koi hi.

³²Jeroboam in Judah gam sungah pawi kibawl bangin hla giet a cin ni, a ni sawm le nga ni-in pawi khat bawl a, maitam tungah biehpiehnate a pie hi; tuaci’n ama in Bethel ah zong bawlin a bawlsa bawngno milimte tungah biehpiehna a pie hi. Ama in Bethel ah a bawlsa munsang siempute koi hi.

³³Hla giet a cin ni, a ni sawm le nga ni, ama beh in a gelna hla sungin Bethel-a a bawlsa maitam ah peito hi; ama in Israel mite adingin pawi khat bawlin gimnamtui hal dingin maitam ah a peito hi.