Read Zou 1 KUMPITE 13 Bible Online

1 KUMPITE 13 - Zou bible

1 KUMPITE 13

¹Gimnamtui hal dingin maitam gei-ah Jeroboam a din laitahin, TOPA’ thu tawh Judah panin Bethel ah Pasien’ mipa khat a tung hi.

²Pasien’ mipa in TOPA’ thu tawh maitam lang khatah kikozah a, “Maitam, maitam aw, TOPA in tam bangin gen hi: ‘David’ innkuon panin Josiah min nei tapa khat ang suoh ding hi; tuale ama in gimnamtui a hal, munsang tunga om siempute nangma tungah siem thoina-in ang pie ding a, mihing’ gute nangma tungah kihal ding hi,’ ci hi,” a ci hi.

³Khum ni ma-in ama in lim khat pie a, “Tami khu TOPA in a gensa lim ahi hi: ‘Maitam kiphelkhe ding a, a tunga om vutvamte kithezah ding hi,’ ci hi,” a ci hi.

⁴Kumpipa in Bethel ah maitam a langpan Pasien’ mipa thugen a zah ciengin maitam panin Jeroboam in a khut a zah kawmin, “Ama man un,” ci hi. Ahi vangin ama lama a zah a khut gawta-in a nuadaw thei ta sih hi.

⁵TOPA’ thu tawh Pasien’ mipa in lim khat a piehna tawh kizui-in maitam zong kiphelkhe-in maitam panin vutvamte kithezah hi.

⁶Kumpipa in Pasien’ mipa kungah, “Ka khut a ngai a bah thei nadingin tu-in kei dingin thu ei ngetpieh inlen, TOPA na Pasien’ maipha ka nga thei nadingin zong ei thumpieh in,” a ci hi. Tuaci’n Pasien’ mipa in TOPA tungah a thumpieh hi; tuale kumpipa’ khut damin a ngai bangkia hi.

⁷Tua ciengin kumpipa in Pasien’ mipa kungah, “Innah ei zui inlen an neton vai, keima in letsong khat hing pie vang,” a ci hi.

⁸Hizongle Pasien’ mipa in kumpipa kungah, “Na kumpi gam phal khat ei hawm nan lacin na inn ah kang haw sih ding hi; khum munah an zong ne loin tui zong ka dawn sih ding hi.

⁹Bangzieh ahei cile TOPA in tam bangin kei thu ei pie hi: An ne loin tuisih zong na dawn sih ding a, na peina lampi zui-in na kilekia sih ding hi,’ ei ci hi,” a ci hi.

¹⁰Tuaci’n ama lampi dangah pei a, Bethel ah ang peina lampi zui-in a kilekia ta sih hi.

¹¹Bethel ah khum hun lai-in kam sang puvuoi khat a teng hi. A tapate khat pei-in khum ni-a Pasien’ mipa in Bethel ah a sepsa thu teng ama kungah a gen hi; ama in kumpipa kunga a gen thute zong a pa uh kungah a gen uhi.

¹²A pa un amate kungah, “Ama hei lamah a pei ta e?” a ci hi. A tapate in Judah gam pana Pasien’ mipa peina lampi a lah uhi.

¹³Tua ciengin ama in a tapate kungah, “Kei ading laa khat a topha ei vawpieh un,” a ci hi. Tuaci’n amate in laa khat a topha a vaw vua, laa tungah ama a tuong hi.

¹⁴Ama in Pasien’ mipa nuadel a, gangpi sing nei khatah a to laitah a mu hi. Ama in khumpa kungah, “Judah gam pana ang pei Pasien’ mipa kici nang na hiei mah?” a ci hi. Ama in, “Ka hi hi,” ci-in a dawng hi.

¹⁵Tua ciengin ama in tua pa kungah, “Ka inn ah ei zui inlen an hing ne ta’n,” a ci hi.

¹⁶Hizongle ama in, “Nang tawh kang kilekia thei sih ding a, na inn sungah zong kang lut thei sih ding hi; tam munah zong nang tawh an ka ne sih ding a, tui zong ka dawn sih ding hi.

¹⁷Bangzieh ahei cile keima kungah TOPA in tam bangin gen hi: ‘Khum munah an zong ne loin tui zong na dawn sih ding a, na peina lampi lamah nang kilekia sih ding hi,’ ei ci hi,” a ci hi.

¹⁸Tua ciengin adang khat[36] in ama kungah, “Kei zong nang banga kamsang khat ka hi a, TOPA’ thu tawh vantungmi khat in ka kungah thu ang gen a, “An ne ding le tui dawn dingin na inn ah ama hing zawpikia in,’ ei ci hi,” a ci hi. Ahi vangin ama in khumpa a sol ahi bo hi.

¹⁹Tua ciengin ama tawh Pasien’ mipa[37] kilekia-in a inn ah an ne-in tui a dawn hi.

²⁰Sabuoi-ah ama gel a to laitahin ama a zawpikia kamsangpa kungah TOPA’ thu a tung hi;

²¹tuale Judah gam pana a pei Pasien’ mipa kungah ama kiko-in, “TOPA in tam bangin gen hi: Nang in TOPA’ thugen mang loin TOPA na Pasien in na kunga ang gensa thupiehna na zui sih a,

²²ahi vangin ama in na kungah, ‘An ne sinlen tui dawn sin,’ ang cina munah kilekia-in an ne-in tui dawn na hi ziehin na pu na pate’ hanah na luonghawm kivui lo ding hi,” a ci hi.

²³Pasien’ mipa[38] in an ne-in tui a dawn zaw ciengin amate in a zawpikia uh ahi kamsangpa’ laa phaw a vawpieh uhi.

²⁴Tua ciengin a pei laitahin humpi khat in ama na dawntuo-in ama a petlia hi. A luonghawm lampi-ah kipai a, ama’ gei-ah a laa a ding hi; humpi zong a luonghawm gei-ah a ding hi.

²⁵Mite in a nawhkha vua, lampi-ah a luong kipai-in a luong gei-ah humpi a ding a mu uhi. Amate zong pei-in kamsang puvuoi pa tenna khuopi sungah tua thu a gen uhi.

²⁶Lamkim pana ama a zawpi kamsangpa in khumi thu a zah cieng in, “Tua pa pen TOPA’ thugen a mang lo Pasien’ mipa ahi hi. Tua ahi ziehin TOPA in ama kunga a gensa tawh kizui-in TOPA in humpi tungah ama pie a, tua in ama ehmalin a tha ahi hi,” a ci hi.

²⁷Tua ciengin ama in a tapate kungah, “Kei ading laa phaw ei vawpieh un,” a ci hi. Tuaci’n amate in khat a vawpieh vua,

²⁸ama a va pei ciengin lampi-a a luonghawm kipai le laa le a luonghawm gei-ah humpi a ding a mu hi. Humpi in a luonghawm ne loin a laa zong bangma law lo hi.

²⁹Kamsangpa in Pasien’ mipa’ luonghawm domto-in a laa tungah khang a, kaa ding le vui dingin khuopi[39] sungah a peipi hi.

³⁰Ama in ama’ hanah tua luonghawm a vui hi; tuale amate in ama uopin a kaa vua, “Kadei, ka sanggampa!” a ci uhi.

³¹Ama in tua pa a vui zaw ciengin a tapate kungah, “Kei ka si ciengin tua Pasien’ mipa kivuina hanah ei vui un; ama’ gute gei-ah ka gute koi un,” a ci hi.

³²Bangzieh ahei cile ama in Bethel-a maitamte le Samaria khuopite sunga a om munsang tunga kithoina mun zosie’ langkhatah TOPA’ thu tawh a thugente tung valon ding hi,” a ci hi.

³³Tam thute a pien zaw nangawnin zong a gitlona panin Jeroboam kihei nuom tuon lo a, tua lemahin mi zosie lah panin munsangte tunga siempu sem ding mi a sekia hi; ama in siempu a suoh nuom popo munsangte-a siempu dingin a siensuo hi.

³⁴Tam thu pen lei maitang panin Jeroboam innkuon tungah vatmai ding le suhmang ding a tun mawna a suoh hi.