Read Zou 1 KUMPITE 21 Bible Online

1 KUMPITE 21 - Zou bible

1 KUMPITE 21

¹A sawt loin tam bang thu teng a pieng hi: Jezreel-te Naboth in Samaria kumpi Ahab’ kumpi inn gei-ah lengga lei khat nei hi.

²Ahab in Naboth kungah, “Na lengga lei kei inn tawh kinai ahi ziehin ante cinna huon dingin ei pie ta’n; keima in a tangin tua sanga a hoizaw lengga lei khat kang pie ding hi; tua ahi sih a, nang dinga a hoi zawh leh a man ding sum kang pie ding hi,” a ci hi.

³Hizongle Naboth in, “Ka pu ka pate’ gamh nang kang pieh ding pen TOPA in phal vawt lo hi,” a ci hi.

⁴Jezreel-te Naboth in ama kungah thu a gen ziehin Ahab lungkimlo le maikhingsa-in inn lam a zuon hi; azieh pen ama in, “Ka pu ka pate’ gamh nang kang pie sih ding hi,” a ci hi. Ama a lupna tung sena-in kinei a, a mai hei-in an ne loin a om hi.

⁵Ama kungah a zi Jezebel pei a, “An neh lona za ding dongin bang dinga hici lunggim na hei?” a ci hi.

⁶Ama in tua nu kungah, “Bangzieh ahei cile Jezreel-te Naboth kungah, ‘Na lengga lei sum tawh ei leisah in; tua ahi sih a, na dei zawh leh lengga lei adang khat nang pie vang,’ ka ci hi; ahi vangin ama in ei dawngin, ‘Ka lengga lei kang pie sih ding hi,’ ei ci hi,” a ci hi.

⁷A zi Jezebel in ama kungah, “Tulaitah Israel a uhpa hi lo na mah? Tho-in an ne inlen kilung nuomsah in; keima in Jezreel-te Naboth’ lengga lei kang pie ding hi,” a ci hi.

⁸Tuaci’n ama in Ahab’ min tawh laihlahte giel a, tuate tungah Ahab’ seal kitum hi; ama’ khuopi sunga Naboth tawh a teng upate le milien teng tungah a lai hlah ding teng a hawm hi.

⁹Tua nu in a laihlahte sungah, “An tan ding khat tangtawh unlen, mihonpite lahah Naboth mun thupi-ah tosah un;

¹⁰ama tawh kimaingatin mi ginalo ni koi-in ama langpangin a mawna suisah unlen, ‘Nang in Pasien le kumpipa na samsie hi,’ cisah un.

¹¹Ama’ khuomi, khuopi sunga teng upate le mi thupi a zatahhuoi teng in Jezebel’ gen bangin amate tungah a bawl uhi.

¹²Amate in zong an tan nading thu khat a tangtawh vua, mipite lah mun thupi-ah Naboth a tosah uhi.

¹³Mi ginalo ni pei-in ama tawh kigalsai-in a to uhi; tuale mipite mai-ah mi ginalote in ama’ mawna a sui vua, “Naboth in Pasien le kumpipa samsie hi,” a ci uhi. Tuaci’n amate in khuopi pulamah ama kaiphitin suong tawh a seplia uhi.

¹⁴Tua ciengin Jezebel kungah amate in thu tutin, “Naboth suong tawh kiseplia zo hi; ama si zo hi,” a ci uhi.

¹⁵Naboth suong tawh kisepin a si zo lam Jezebel in a zah zaw behin Jezebel in Ahab kungah, “Pei inlen, sum tawh lei dinga na kut ama in a phal lo, Jezreel-te Naboth’ lengga lei la-in tang in; azieh pen Naboth hing nawn loin si zo hi,” a ci hi.

¹⁶Naboth a sina thu Ahab in a zah behin Jezreel-te Naboth’ lengga lei-ah Ahab kuonsuhin a tang hi.

¹⁷Tua ciengin Tishbe-te Elijah kungah TOPA’ thu tung a,

¹⁸“Samaria gam a uh[53] Israel Kumpi Ahab tawh kimu dingin va kuonsuh in; Naboth’ lengga lei a lahpieh dingin khumnah ama a op laitah ahi hi.

¹⁹Nangma in ama kungah, “TOPA in tam bangin a gen hi: ‘Ama thatin na lahpieh ta amah? ci-hi,’ ci-in gen in,” a ci hi. Nangma in ama kungah, “TOPA in tam bangin gen hi: ‘Uite in Naboth’ sisan a liena munah nangma’ sisan zong ui in lieh ding hi, ci hi,’ ci-in gen in,” a ci hi.

²⁰Ahab in Elijah kungah, “Ka galpa aw, kei nei mu zo ta amah?” a ci hi. Ama in dawng a, “TOPA’ muna-ah nang le nang a sie bawl dingin kipumpieh na hi ziehin nang kang mu ta hi.

²¹Keima in nang tungah gimna kang tungsah ding hi; nang hing paimangin Israel gam sungah Ahab’ mi kici poma sal hile, a suohta hile ka sumaimang ding hi;

²²nang in kei nei lungthahsah zieh le Israel in mawna na bawlsah ziehin na innkuon zong Nebat’ tapa Jeroboam’ innkuon le Ahijah’ tapa Baasha’ innkuon tawh kang kibangsah ding hi.

²³Jezebel’ tungtang thu zong TOPA in gen a, ‘Uite in Jezebel’ kulpi gei-ah Jezebel a ne ding uhi,’ a ci hi.

²⁴Ahab tawh kisai khuopi sunga a si mi khat popo ui in ne ding hi. Tuale gamlahah a si mi khat popo vana leng vate in ne ding uhi,” a ci hi.

²⁵(A tahtahin a zi Jezebel’ hantawhna ziehin TOPA muna-ah Ahab bangin a sie bawl dinga a kipumpieh koima dang om nai lo hi.

²⁶TOPA in Israel-te mai-ah a delmang Amor-te gamtat bangin milimte bie-in kidahhuoi-in a gamta hi.)

²⁷Ahab in tua thu teng a zah ciengin ama in a puonte botkeh a, a pum tungah la-ip puon silin an tangin la-ip puon tungah lum hi; ama cimaw lungkia-in a vaiva hi.

²⁸Tua ciengin Tishbe-te Elijah kungah TOPA’ thu a tung hi:

²⁹“Ka mai-ah Ahab a kiniemkhieh dan na mu ei mah? Keima mai-ah amama tua bangin kiniemkhieh ahi ziehin a hin sungin ama tungah gimna ka tungsah sih ding hi; hizongle a tapa’ hun sungin a innkuonte tungah gimna ka tungsah ding hi,” a ci hi.