Read Zou 1 KUMPITE 3 Bible Online

1 KUMPITE 3 - Zou bible

1 KUMPITE 3

¹Kiten kipina vai ziehin Egypt kumpi Pharaoh tawh Solomon in kipawlna a bawl uhi; ama in Pharaoh’ tanu la a, ama’ inn, TOPA’ inn le Jerusalem kimvelah kulpi lam a man masang, David khuopi sungah tua nu a peipi hi.

²Hinanle TOPA’ min tawh biehinn kilam nai lo ahi ziehin mite in munsangte-ah biehpiehna a nei uhi.

³Solomon in TOPA it a, a pa David’ thukhamte a zui hi; ama beh in munsangte-ah biehpiehna pie-in gimnamtui a hal hi.

⁴Biehpiehna pie dingin khum mun Gibeon ah kumpipa a pei hi, bangzieh ahei cile tua khu mun sang thupi pen ahi hi; Solomon in tua maitam tungah meihal biehna tulkhat a pie zel hi.

⁵Gibeon ah zanlai a mangin Solomon kungah TOPA kihil hi; tuale Pasien in, “Kang pieh ding khat ngen in,” a ci hi.

⁶Tuale Solomon in, “Nang in nasempa ka pa David tungah a lien le a kip itna na lah zo hi, bangzieh ahei cile nangma tungah muonhuoina, dihna, thumanna lungsim tawh ama a gamta hi; tuale nangma in ama adingin tami a lien itna kip na koipieh zo ta a, tuale tuni-in ama’ topha tunga a to ding tapa khat na pie zo hi.

⁷Tua ahile tu-in TOPA ka Pasien aw, keima naupangno khat ka hi vangin ka pa David tangin na nasempa kumpi-in nei koi zo ta hi. Keima in sungtum dan ding le pusuo dan ding tahpi zong ka thei sih hi.

⁸A lien le a tam seng zieha a phaza a kisim zo lo, na teelsa mite lahah na nasempa a om hi.

⁹Tua ahi ziehin na nasem pa in na mite ka uh thei nading le, a sie le a pha ka khentel thei nadingin thu theitelna lungsim ei pie in; azieh pen tam na mite koi in uh zo ding ahei?” a ci hi.

¹⁰Tami Solomon’ ngetna in TOPA a lungkimsah hi.

¹¹Pasien in ama kungah, “Nang in na khansau nading hile, na hau nading hile, na galte zaw nading hile na ngen sih a, a sie le a pha khentel thei nadingin tami theitelna ngen na hi ziehin,

¹²tu-in keima in na nget bangin nang kang pie ding hi. Keima in pilna le khentel theina lungsim nang kang pie tahtah hi; nang masangin nang tawh a kibang mi a om ngai sih a, na nua ciengin zong nang tawh kibang mi a om ngai ta sih ding hi.

¹³Nang in na nget khah lo ahi na khan sung tungtawnin hauna le patawina zong kang pie ding hi; nangma tawh tekah thei ding kumpi dang koima a om sih ding hi.

¹⁴Na pa David bangin ka lampite tawnin ka thukhamte le ka thupiehte na zui nah po leh na hinkhuo ka sawtsah ding hi,” a ci hi.

¹⁵Tua ciengin Solomon a khanglo hi; tua khu a mang ahi bo hi. Jerusalemah ama pei a, TOPA’ thuciemna singkuong mai-ah dingin meihal biehnate le thunuom biehnate pie a, a nasem zosie adingin pawi khat a bawl hi.

¹⁶Hun khat ciengin kumpipa kungah numei pahtat ni pei-in a mai-ah a ding uhi.

¹⁷A numei khat in, “Ka pu aw, tami numei tawh inn sung khatah ka tengton hi; tami inn sungah ama a op sungin keima in tapa khat ka nei hi.

¹⁸Tua ciengin ka ta nei zaw a ni thum ni-in tami numei in zong ta ang nei hi. Ko gel ka omton uhi; inn sungah koima dang tawh ka omton sih gel hi, koma gel beh ka om uhi.

¹⁹Tua ciengin ama in zanlai-in a lupna-ah a tapa netpha kha ahi ziehin tami numei’ tapa a si hi.

²⁰Zankim laitahin ama na tho a, na nasemnu ka kimut kalin ka kang sunga ka tapa ei na lahpiehin keima’ tapa pen a kang sungah na siel a, a sisa ama’ tapa pen ka kang sungah a na siel hi.

²¹Zingmawngin ka ta nawi pie dingin ka thaw ciengin ama a sisa-in ka mu hi; ahi vangin zingmawngin limtahin ka et ciengin tua pen keima sung pana a suoh tapa a na hi sih hi,” a ci hi.

²²Ahi vangin a numei dang khat in, “Hi lo hi, a hing tapa pen kei-a’ ahi a, a si tapa pen nang-a’ ahi bo hi,” ci-in a gen hi. Amasa nu in, “Hi lo hi, tapa a si pen nang-a’ ahi a, tapa a hing pen kei-a’ ahi bo hi,” a ci hi. Tuaci’n kumpipa mai-ah ama gel a kisel uhi.

²³Tua ciengin kumpipa in, “Khat nu in lah, ‘A hing pen ka tapa ahi a, a si pen na tapa ahi hi,’ ci hi. Adang khat in zong, ‘Hi malmal sih! A si pen na tapa ahi hi; a hing pen ka tapa ahi hi,’ ci zel hi,” a ci hi.

²⁴Tuaci’n kumpipa in, “Namsau khat hing la un,” a ci le kumpipa mai-ah namsau khat a peipi uhi.

²⁵Kumpipa in, “Naupang a hing pen phal ni suo un; tua ciengin khat tungah alang pie unlen, adang khat tungah alang pie un,” a ci hi.

²⁶Ahi vangin tapa a hing pen’ nu in a lungsimah a tapa a khuotuo ziehin kumpipa kungah, “Ka pupa aw, hepina tawh a hinglai naupang pen ama pie in; ama that malmal sin!” a ci hi. A khat pen in, “Ke’n lah tang sih vang, ama’n lah tang da taheh; phalsuo lel un,” a ci hi.

²⁷Tua ciengin kumpipa in a dawngkia hi: “Naupang a hinglai pen amasa numei pie un; ama that sih un. Tua nu pen ama’ nu ahi hi,” a ci hi.

²⁸Israel mi zosie in kumpipa thukhenna a za uhi; tuale amate in kumpipa lamdang a sa uhi, azieh pen ama in thu a tanga a khen thei nadingin ama’ sungah Pasien’ pilna a om lam amate in a thei uhi.