Read Zou 1 KUMPITE 5 Bible Online

1 KUMPITE 5 - Zou bible

1 KUMPITE 5

¹[5] Tu-in amate in a pa’ munah ama kumpi dingin Solomon sathau nu zo ta uh, ci Tyre Kumpipa Hiram in a zah ciengin Solomon kungah a nasemte a sawl hi; bangzieh ahei cile Hiram le David a kilawmta den uh ahi hi.

²Solomon in Hiram kungah kam vaihlah a,

³“TOPA in ama’ ketaw[6] nei-ah amahaw a koi masangin ama a kui-im a galte tawh kidona ziehin ka pa David in a TOPA Pasien’ min dingin biehinn na lam zo lo hi, ci na thei hi.

⁴Hizongle tu-in TOPA ka Pasien in ka kimkotah tawlngahna ei pie zo ta hi; ei langpang hile, hamsietna hile om nawn lo hi.

⁵Tuaci’n TOPA in ka pa David kungah, ‘Na kumpi topha tunga ka koi ding na tapa in nangma tangin ka min dingin biehinn a lam ding hi,’ ci-in a gensa bangin TOPA ka Pasien’ min dingin biehinn khat lam ka sawm hi.

⁶Tua ahi ziehin keima adingin Lebanon taamtah singte a kiphua thei nading thupie in. Keima’ nasemte le nangma’ nasemte in a semton ding vua, na nasemte dinga na se zaza thaman nang tungah kang pie ding hi; azieh pen ko kungah Sidon-te banga sing sui siem khat beh a op lo lam na thei hi,” a ci hi.

⁷Solomon’ thugen teng Hiram in a zah ciengin ama a kipah mama a, tuale ama in, “Tuni-in tam minam lien a uh dingin David tunga tapa pil a pie TOPA in thupha nga taheh,” a ci hi.

⁸Hiram in Solomon kungah kam vaihlah a, “Ka tunga nang thupuoh ka za zo ta hi; taamtah sing le taapi sing tawh kisai na kisap zosie kang sih ding hi.

⁹Lebanon panin ka nasemte in tuipi-ah tua teng ang puohsuh ding uhi; keima in tuipi tunga laam thei dingin tua teng phawngin kang bawl ding a, nangma’ genna munah kang tungsah ding hi. Khum munah nangma in na lah thei dingin tua singte amate ka phelsah ding hi. Ka innkuonte neh ding an ei sihin ka deina na kicingsah ding hi,” a ci hi.

¹⁰Tuaci’n Hiram in Solomon’ deigaw taamtah le taapi sing zosie a sih hi.

¹¹A innkuonte neh dingin Solomon in zong mangbu cor tul sawmni le sathau tuituoh cor sawmni dim ama a pie hi. Solomon in Hiram tungah kumsimin tam teng a pie hi.

¹²Tuaci’n ama tungah a ciemsa bangin TOPA in Solomon pilna a pie hi. Hiram le Solomon kikalah kilemna a om hi; tuale ama gelin kithukimna khat a bawl uhi.

¹³Kumpi Solomon in Israel zosie panin thona-aana sem dingin mi a khon hi; a mi khonte tul sawmthum pha hi.

¹⁴Ama in hla khatin amate tul sawm a kikhelin Lebanon lamah a sawl hi; Lebanon-ah hla khat sung omin inn ah hlani sung om ding uhi; Adoniram in thona-aana nasep uh hi.

¹⁵Solomon in nasem mi tul sawm sagi le muoltung gama suong kheng dingin zong mi tul sawmgiet nei a,

¹⁶ama in nasepna van ding le nasem mite uh dingin kuligawng tul thum le zathum zong nei lai hi.

¹⁷Kumpipa’ thupiehna bangin suong kikheng zolsate tawh biehinn khuombul a phu thei nadingun suong golte le a manpha suongte a to uhi.

¹⁸Tuaci’n Solomon’ innlamte, Hiram’ innlamte le Gebal-te in suongkheng nasep a sem vua, biehinn lam nadingin sing le suong a khol uhi.