Read Zou 1 KUMPITE 6 Bible Online

1 KUMPITE 6 - Zou bible

1 KUMPITE 6

¹Egypt gam panin Israel-te a peidawh lang kalsie kum zali le kum sawmgiet a cin kum, Israel-te’ tunga Solomon in a uh a kum lina, a hla nina Ziv hla sungin ama in TOPA’ biehinn lam ding a kipan hi.

²TOPA dinga Kumpi Solomon in a lam biehinn adung tong sawmguh hi a, avai tong sawmni pha-in, a sanna tong sawmthum a pha hi.

³Biehinn laikim mai-a talaap pen biehinn vailam tawh kikimin tong sawmni pha a, inn mai lamah a thuhna tong sawm pha hi.

⁴Ama in biehinn adingin vathang nei tawlette a bawl hi.[7]

⁵Ama in biehinn pang tuoh le a sunglam biehinn kawm kimkotin a kawm tungah inn lam a, tua gel in a laikim le mun siengtho sungnung nei tuoh uhi; tuale ama in a kimkotah inndante zong bawl hi.

⁶A khan neita pen[8] tong nga zai a, a laita pen tong guh, le a thumna tong sagi zai hi. Kawm sungah innkam a lut lo nadingin ama in inn pulam pang kimkot adingin a nanna singpehte bawl hi.

⁷Biehinn a kilam laitahin sehta ging hile, hei ging hile, sia vanzah ging khat popo a kizah lo nadingin, suongkhuh-a kilemsa suongte tawh biehinn kilam hi.

⁸Biehinn hlang lamah inn khan laita pen ading lutna kot kibawl hi: A khan laita penah kalei kuol tawh kikato a, a khan laita pen panin a thumna-ah kikato hi.

⁹Tuaci’n ama in inn lam a, tuale a man sieng hi; ama in innkamte hlungin a tungkhu dingin taamtah singpehte a bawl hi.

¹⁰Ama in a inn buppi tungah a lambete zomin a khan[9] khat ciengin tong nga ta sang a, taamtah singte-in a biehinn tawh kizom hi.

¹¹Tu-in Solomon tungah TOPA’ thu tung a,

¹²“Na inn lam tami biehinn tawh kisai-in ka thukhamte zui-in ka ngaina kipte mang a, ka thupiehte zosie kemcingin tuate na zui leh, nang tungah keima in na pa David tunga ka kamciemna kang kipsah ding hi.

¹³Israel mite lahah ka teng ding a, ka mi Israel-te ka nuasie sih ding hi,” a ci hi.

¹⁴Tuaci’n Solomon in inn lamin a man sieng hi.

¹⁵Ama in taamtah singpehte tawh innsung kawm dap hi; tuong panin innciing dong le innku dongin a sunglam teng taamtah singpeh dap hi; tuale a tuong pen taapi singpeh tawh a tuom hi.

¹⁶Ama in tuong panin innku dong innsia lam tong sawmni taamtah singpehte tawh lam a, tuale tami siengtho pen mun, mun siengtho sungtawng dingin a inn sungah a bawl hi.

¹⁷Mun siengtho sungtawng mai-a innsung pen tong sawmli sau hi.

¹⁸Inn sunga taamtah singte umga le pape pallun bangin kizempawl hi; a unpi-in taamtah sing ngentang hi a, suong kici kimu lo hi.

¹⁹Ama in TOPA’ thuciemna singkuong koi nadingin a sungtawng penah mun siengtho sungtawng bawl hi.

²⁰Mun siengtho sungtawng pen tong sawmni sau-in tong sawmni ma zai a, tong sawmni sang hi; ama in tua pen kham citah tawh zutmam hi; ama in taamtah sing[10] maitam khat zong a bawl hi.

²¹Solomon in kham citah tawh inn sunglam zutin, tua ciengin mun siengtho sungtawng mai lamah kham khainieng kipaivei-in hlung a, kham tawh a zut hi.

²²Tua banah biehinn buppi kham tawh zutzol a, ama in a unpi-a a nuzol masangsie a nunu hi; mun siengtho sungtawng a maitam buppi nangawn zong kham tawh a zut hi.

²³Ama in mun siengtho sungtawngah cherub lim ni olive sing tawh bawl a, tong sawm tuoh sang hi.

²⁴Cherub a hla langkhat, tong nga sau-in, cherub a hla alang dang khat, tong nga ma sau hi; a hla langkhat mong panin a mong langkhat dong tong sawm pha hi.

²⁵Cherub khat pen zong tong sawm ma pha hi; cherub tegel a sauna le a piendan gel a kithakhat ahi hi.

²⁶Cherub khat a sandan tong sawm hi a, a khat zong tua za ma ahi hi.

²⁷Ama in inn sungtawng penah tua cherub-te tung hi; cherub tegel’ hla tuoh kizah a, khat’ hla in kawm banin, adang khat pen’ hla in zong kawm langkhat ban hi; inn laikimah a hla langkhat gel kisutuo hi.

²⁸Ama in cherub tegel kham tawh a zut hi.

²⁹Ama in a sunglam le a pulam innkhante a kimkotin innkawm zosie tungah cherub-te, lutu kung le pape limte tawh zemsuoh hi.

³⁰A sunglam le a pulam inndan sunga tuongte zong kham tawh a zut hi.

³¹Ama in mun siengtho sungtawng lut nadingin olive sing kotpi pehte bawl hi; bangtung zawl le kotpi khuomte in ning nga[11] nei hi.

³²Ama in cherub-te, lutu kung le pape lim kibawlte tawh olive sing kotpi nite a tuom hi; ama in cherub-te le lutu kungte tungah kham a zutmam hi.

³³Tua ma bangin ama in inn sung lut nadingin ning li a nei olive sing kotkhuomte bawl a,

³⁴taasing kot peh ni zong bawl hi. Kot peh nite kihlip thei a, adang kot peh nite zong kihlip thei hi.

³⁵Tua a kotpehte tungah ama in cherub milimte, lutu kung milimte, le pape limte tawh zem a, a zepnate kham tawh a zutmam hi.

³⁶Ama in a kikheng suong guol thum le taamtah singzawl guol khat tawh a tuol sungta pen bawl hi.

³⁷A kum lina, Ziv hla-in TOPA’ inn khuombul kiphut hi.

³⁸A kum sawm le khatna, a hla gietna Bul hla-in a inn khan zosie le a kigen zosie bangin innpi lam kihiel bawl hi. Ama in kum sagi sung tua inn a lam hi.