Read Zou 1 KUMPITE 8 Bible Online

1 KUMPITE 8 - Zou bible

1 KUMPITE 8

¹Tua ciengin Solomon in TOPA’ thuciemna singkuong puoto dingin Zion a kici David khuopi panin Jerusalem khuo sunga Kumpi Solomon mai-ah Israel upate le minam lutang zosie le Israel pupa innkuon makaite a kaikhawm hi.

²A hla sagina Ethanim hla sung pawi hunin Israel mite zosie Kumpi Solomon kungah a kikhawm uhi.

³Israel upa zosie pei-in siempute in singkuong a puo uhi.

⁴Tuaci’n amate in TOPA’ singkuong, kikhopna puonbuh, le puonbuh sunga om a siengtho vanzah zosie a peito pi uhi; siempute le Levi-te in tuate a puoto uhi.

⁵Kumpi Solomon le a mai-a kikhawm Israel mi buppi in biehpiehna dingin singkuong mai-ah tuu le bawngtang tampi a pieh ziehun tuate a phaza kisim zo lo hi.

⁶Tua ciengin siempute in TOPA’ thuciemna singkuong pen a kikoi nading mun biehinnpi sunga mun siengtho sungtawng, siengtho pen mun, cherub-te’ hlalim nei-ah a peipi uhi.

⁷Cherub gel in singkuong tungah a hla a zah ziehun tua cherub gel pen singkuong le a zawlte’ tungkhu a suoh hi.

⁸A zawlte sau mama ahi ziehin mun siengtho sungtawng mai-a siengtho pen mun panin a zawl mongte a kimu tabo hi; hinanle a pulam panin kimu lo hi; tuni dongin khum sontah ma-ah tua zawl tegel a om hi.

⁹Singkuong sungah Egypt gam panin a pei lai-un TOPA in Israel-te tawh thuciemna a bawlna ahi Horeb-ah Moses in suongpeh ni a na koite sim lo bangma dang om lo hi.

¹⁰Siengtho mun panin siempute a pusuo ciengun TOPA’ biehinnpi meii in tuom a,

¹¹tua meii ziehin siempute in na a sem thei sih uhi; bangzieh ahei cile TOPA’ minthanna vang in TOPA’ biehinn a tuom hi.

¹²Tua ciengin Solomon in, “TOPA in khuomiel sapi lahah a ten ding gen zo hi.

¹³Keima in nangma adingin a kitawisang inn khat, kumtawn na ten nading mun khat ka lam zo hi,” a ci hi.

¹⁴Tua ciengin a kikhawm Israel-te zosie a din laitahun kumpipa kihei-in thupha a pie hi.

¹⁵Ama in, “Ka pa David tunga a kam tawh a ciemsa teng a tangtungsah Israel Pasien TOPA in thupha nga taheh. David in,

¹⁶‘Egypt pan ka mi Israel-te ka peipi ni-a patin khum munah ka min a op zing nadingin Israel minamte lahah biehinn khat lam nading khuopi khat zong ka teel sih hi; hinanle ka mi Israel-te a uh dingin David ka teel hi,’ a ci hi.

¹⁷Israel Pasien TOPA’ min dingin biehinn khat lam ding ka pa David in a na lung bat zo ta bo hi.

¹⁸Hizongle TOPA in ka pa David kungah, ‘Keima’ min dinga biehinn khat lam na sawm khu thu hoi ahi hi;

¹⁹hinanle nang in tua biehinn na lam sih ding a, nang tung pana ang pieng ding na tapa in keima’ min dingin tua biehinn lam ding hi,’ a ci hi.

²⁰Tu-in TOPA in a bawlsa a thuciemna a tudet hi; azieh pen ka pa David tangin kei ka khang hi; TOPA ciemsa bangin Israel kumpi topha tungah to-in Israel Pasien, TOPA’ min dingin biehinn ka lam zo hi.

²¹Egypt gam panin amate ka peipi lai-in i pu i pate tawh a bawl TOPA’ thuciemna opna singkuong adingin mun khat ka bawlpieh hi,” a ci hi.

²²Tua ciengin a kikhawm Israel zosie’ opna TOPA’ maitam mai-ah Solomon dingin van lamah a khutte a zah hi.

²³Ama in, “Israel Pasien TOPA aw, tunga om vantungah hile, nei-a om leitungah hile, a lungsim zosie tawh na mai-ah gamta-in na nasemte tungah thuciemna a tudet le itna kip a lah, nangma tawh a kibang Pasien a om sih a,

²⁴nang in ka pa David tunga na gensa thuciemna na kipsah hi; na kam tawh na kamciem a, tuni-in na khut tawh na tangtungsah hi.

²⁵Tua ahi ziehin Israel’ Pasien TOPA aw, ama kungah, ‘Keima mai-ah nang na gamtat bangin na tapate in keima mai-ah a gamtat vua, a pei nading uh lampi a etsiem nah po uleh keima mai-ah Israel kumpi topha tunga a to ding mi na kitasam ngai sih ding uhi,’ ci-in nangma in na nasempa David na kamciem tukip in.

²⁶Tua ahi ziehin Israel Pasien aw, na nasempa ka pa David kunga na thugensa na kamciem kipsah in.

²⁷“Hinanle Pasien leitungah a teng tahtah diei mah? Vantung le vantung a sangpen nangawn in nang hing dawl lo ahile keima lamsa tami biehinn in bangza-in nang hing dawl lo zaw kan lai ding ahei!

²⁸Na nasempa’ thungetna le ang thumna ei thudon inlen, TOPA ka Pasien aw, tuni-a na nasempa in na mai-a ang ngetna, a kikona le a thungetna ei ngai in;

²⁹‘Khum sungah ka min a om ding hi,’ na cina mun biehinn lam sun le zanin en zing inlen, tam muna keima na nasempa thungetnate ei za in.

³⁰Amate in tami mun lam nga-in thu a nget ciengun na nasempa le na mi Israel-te’ thumna ngai in; na tenna vantung panin ei za inlen, ka mawna uh ei ngaidam in.

³¹“A vengpa tungah mi khat maw-in ama a kiciemsah a, ama pei-in tam biehinn sung na maitam mai-ah a kiciem leh,

³²vantung panin za-in sem inlen, na nasemte tungah thukhenin a mawpa thuohsahin ama’ gamtatna ama lukhuh sah inlen, a dih mipa a dihna talangin a dihna tawh kizui-in thaman pie in.

³³“Nangma tungah ang maw ziehun galte mai-ah na mi Israel a guollel ciengin, amate nangma lamah ang kihei kia-in na min ang law vua, tami biehinn sungah thu ngenin na tunga ang thum uleh,

³⁴vantung panin za-in na mi Israel’ mawna ngaidam inlen, a pu a pate tunga na piehsa leitangah amate tunpikia in.

³⁵“Nang tunga ang maw ziehun vankot kikhahin guo a zuh nawn lo ciengin, tam mun lamah thu ngenin na min ang law vua, amate dan na pieh ziehin[17] a mawna panun a kiheikia uleh,

³⁶vantung panin za inlen na nasemte, na mi Israel’ mawna ngaidam in; tuale lamate zui ding lampi hoi na hil ciengin na mite tungah a luo ding vua na piehsa leitang tungah guo zusah in.

³⁷“Gam sungah kielpi tungin, pul natna hile, ankung natna hile, ankung zawngkhalna hile, kauphe hile, lung hile ang op a; a galte in amau’ khuopi khat popo[18] kuikhumin, bangbang gimna, bangbang natna hile;

³⁸mi khatguoh in hile, na mi Israel-te zosie in hile, a lungsim natna uh thei-in tami biehinn lamah amate in a khutte uh zahin bangbang thungetna hile bangbang thumna hile ang bawl uleh;

³⁹na tenna vantung panin za inlen ngaidam in. Tua ciengin amau’ gamtatna zosie tawh kizui-in amau’ lungsim na thei bangin hing bawl in. Azieh pen nangma beh in mihing lungsim na thei hi.

⁴⁰Tuaci’n ka pu ka pate tunga na piehsa leitang tungah a hin sung zosie uh amate in nang ang zatah ding uhi.

⁴¹“Tua ma bangin na mi Israel ahi lo gamdang mi khat nangma min ziehin khuol gamla panin ang pei a,

⁴²(azieh pen amate in a lien mama na min, na banhat, le na banzahnate a za ding uhi), tami biehinn lamah thu ang nget ciengin,

⁴³nangma in na tenna vantung panin za inlen, tua gamdang mipa in nang tunga ang ngetna zosie tawh kizui-in bawl in. Na mi Israel bangin leitung mi zosie in na min hing thei-in ang zatah nading le ka lamsa tami biehinn nangma’ min tawh a kilo zo ahina amate in a thei nading uh ahi hi.

⁴⁴“A galte do dingin na mite kuonin, bang lam bang lamah amate sawl ta lacin, na teelsa khuopi lam, TOPA kung le nangma’ min dinga ka lamsa biehinn lamah thu ang nget vua ahile,

⁴⁵van tung panin a thungetna ule a thumna uh za-in amau’ vai panpi in.

⁴⁶“Amate na tungah ang maw vua - bangzieh ahei cile a maw lo koima om lo hi - amate tungah na lungthah a, galte khut sungah amate pie-in, amate kimanin tua galte a gamla ah ahi a, a nai ah ahi zongin a kikai mang a;

⁴⁷ahi vangin sal dinga a kipeipina gam sungah khuo phawhin a kisiakia a, ‘Kohaw ka maw ta vua, gitlo gamtatin ka khansie ta uhi,’ ci-in a leitang panun na tungah ang thum vua;

⁴⁸amate sala a zawpi a galte’ leitangah a ngaisutna zosie ule a lungsim zosie utawh kisiakia-in, nangma in na teelsa khuopi, a pu a pate uh na piehsa amau’ leitang, le na min dinga ka lamsa biehinn lam nga-in na kunga thu ang nget uleh;

⁴⁹vantung na tenna panin a thu ngetna ule a thumna uh za-in, amau’ vai-ah panpi in,

⁵⁰tua ciengin na tunga ang maw na mite le na tunga ang gamtanate ule amau’ thupalsatnate zosie maisah inlen, a galte in amate tungah lainatna a nei thei nadingin a mitmu-un amate tungah lainatna nei in.

⁵¹(Azieh pen amate, Egypt sia meiphuol sung pana na peipi nangma’ mi le nangma’ gouluo ahi uhi.)

⁵²Na nasempa thumna le na mi Israel thumna mittuhna-in nei inlen, amate in nang ang hlat sielun na bil na ngat in.

⁵³Bangzieh ahei cile Egypt panin ka pu ka pate na peipi lai-in na nasempa Moses tungtawnin na kamciemsa bangin na gouluo ahi dingin leitung mi zosiete lah panin amate na tel zo hi, TOPA Pasien aw,” a ci hi.

⁵⁴Tu-in TOPA tungah Solomon in tami thungetnate le tami thumnate zosie a khan zaw ciengin vantung lamah a khutte zahsa-in a khupdinna mun TOPA’ maitam mai panin ama a dingto hi;

⁵⁵ama dingin awging tawh a kikhawm Israel mi zosie thupha pie hi:

⁵⁶“A ciemsa zosie dung zui-in a mipi Israel tungah tawlngahna a pie TOPA in minthanna nga taheh; ama in a nasempa Moses tung tawna a gensa thuciem hoite zosie khat zong a kipel om lo hi.

⁵⁷I pu i pate tawh a na opton bangin eite tawh TOPA i Pasien hing om taheh; ama in eite ei nuasie loin ei taisan sih heh,

⁵⁸ahi vangin ama in i pu i pate a thupiehsa ama’ lampi zosie a zui ding, le ama’ thupiehnate, a thukhamte, le a ngaina kipte a zui dingin i lungsimte ama lamah hawisah taheh.

⁵⁹TOPA mai-ah keima’ thumna kammalte sun le zanin TOPA i Pasien nai-ah omin, ama in nisielin a kisam bangin a nasempa’ vai le a mi Israel’ vai ei panpi taheh;

⁶⁰tuaci’n leitung mi zosie in TOPA pen Pasien hi, ci-in a thei ding uhi; koima adang om lo hi.

⁶¹Tua ahi ziehin TOPA i Pasien tungah noma ma ki-ap unlen tuni-a bangin a thukhamte zui-in a thupiehnate mang un,” a ci hi.

⁶²Tua ciengin kumpipa, le ama tawh a om Israel mi zosie in TOPA mai-ah biehna a pie uhi.

⁶³Solomon in thunuom biehna dingin TOPA tungah bawngtang tul sawmni le tulni le tuu tul zakhat le tul sawmni a pie hi. Tuaci’n kumpipa le Israel mi zosie in TOPA’ biehinnpi a ap uhi.

⁶⁴Kumpipa in khum ni ma-in TOPA’ biehinn mai-a om inntuol laikimteng a siensuo hi; azieh pen meihal biehnate, an tawh biehnate, le thunuom biehpiehna’ thaute adingin TOPA’ mai-a om sumngo maitam neu luo-in dawl zo ta lo ahi ziehin tua munah meihal biehnate, an tawh biehnate le thunuoma biehna thaute a pie hi.

⁶⁵Tuaci’n khum hun lai-in Solomon le a ompi Israel mi zosie in TOPA i Pasien mai-ah ni sagi sung,[19] Hamath panin Egypt Lui dongin kikhopna thupi mama khat bawlin pawi a khaam uhi.

⁶⁶Ama in a ni giet ni-in mite a peisah hi; amate in kumpipa thupha pie-in TOPA in ama’ nasempa David le ama’ mi Israel tungah migitna a lahna zosie ziehin lungdamna le kipahna tawh a inn ciet a zuon uhi.