Read Zou 2 KUMPITE 1 Bible Online

2 KUMPITE 1 - Zou bible

2 KUMPITE 1

¹Ahab a si zaw ciengin Moab in Israel ledo hi.

²Samaria-a a innkhan tungnung vathang panin Ahaziah kiesuhin a liem hi; tuaci’n ama in kamtaite sawlin amate kungah, “Va pei ta unlen tam ka liemna pan ka dam zo na diei, Ekron pasien Baal-zebub va dong ta un,” a ci hi.

³Hinanle TOPA’ vantungmi in Tishbe khuomi Elijah kungah, “Ding inlen, Samaria kumpipa’ kamtaite kimupi-in amate kungah, ‘Israel sungah Pasien a op nawn lo ziehin Ekron pasien Baal-zebub kunga thu dong dinga kisa na hi uh amah?’ ci in.

⁴Tua ahi ziehin tu-in TOPA in tam bangin a gen hi: ‘Na katona na lupna na kan nawn sih ding a, nang a si valon ding na hi hi,’ ci-in,” a ci hi. Tuaci’n Elijah a pei hi.

⁵Kumpipa kungah kamtaite a kilekia vua, kumpipa in amate kungah, “Bang dinga hing kilekia na hi vuoi?” a ci hi.

⁶Amate in dawngin, “Kote tawh kimu dingin mi khat ang pei a, ama in ka kung vuah, ‘No ang sawl kumpipa kungah peikia unlen ama kungah, “TOPA in tam bangin a gen hi: ‘Israel sungah Pasien om nawn lo ahi ziehin Ekron pasien Baal-zebub thu dong dinga mi na sawl amah? Tua ahi ziehin, ‘Na lupna na kan nawn sih ding a, nang na si valon ding hi,’ ei ci hi,” a ci uhi.

⁷Ama in amate kungah, “No ang kimupipa le tami thu teng ang gen pa bangci bang mi ahiei?” a ci hi.

⁸Amate in dawngin, “Ama pen mul hau khat ahi a, a kawngah savun kawnggah a gah hi,” a ci uhi. Tuale ama in, “Ama pen Tishbe mi Elijah ahi hi,” a ci hi.

⁹Tua ciengin kumpipa in ama kungah mihing sawmnga a uhpa a mihing sawmnga tawh a sawl hi. Muol dawn khat a na to Elijah kungah ama kato-in a kungah, “Pasien’ mipa aw, kumpipa in, ‘Hing peisuh heh,’ ci hi,” a ci hi.

¹⁰Hizongle Elijah in mihing sawmnga a uhpa dawng a, “Pasien’ mipa ka hi leh van panin meikuong ang kiesuh hinlen, nangma le na mihing sawmngate katum taheh,” a ci hi. Tua ciengin van panin meikuong kiesuhin ama le a mihing sawmnga a katum hi.

¹¹Kumpipa in ama kungah mihing sawmnga a uh adang khat a mihing sawmnga ma tawh a sawlkia hi. Ama kato-in[1] tua mipa kungah, “Pasien’ mipa aw, tam khu kumpipa thupieh ahi hi: Mallang tahin hing kumsuh in!” a ci hi.

¹²Ahi vangin Elijah in amate dawng a, “Pasien’ mipa ka hi leh van panin meikuong ang kiesuh hinlen, nangma le na mihing sawmngate katum heh,” a ci hi. Tua ciengin van panin meikuong kiesuhin ama le a mihing sawmngate a katum hi.

¹³Kumpipa in mihing sawmnga a uh a thumna pa mihing sawmnga tawh sawlkia leuleu hi. Tuaci’n mihing sawmnga a uh a thumna pa peito a, Elijah mai-ah pei-in khupdinin pua a, ama kungah tau-in, “Pasien’ mipa aw, hing thum ing, na muna-ah keima’ hinna le nangma’ nasem tam mihing sawmngate’ hinna manphasah in.

¹⁴En in, vantung panin meikuong kiesuhin mihing sawmngate a uh a masa nite a mi sawmnga tuoh utawh a katum uhi; ahi vangin tu-in na muna-ah ka hinna manphasah in,” a ci hi.

¹⁵Tua ciengin TOPA’ vantungmi in Elijah kungah, “Ama tawh zawhsuh in; ama giing malmal sin,” a ci hi. Tuaci’n ama dingin kumpipa kungah ama tawh peisuh a,

¹⁶ama kungah, “TOPA in tam bangin gen hi: Nangma in Ekron pasien Baal-zebub thu dong dingin kamtaite sawl tahtah na hi ziehin, Israel sungah thu dawh ding Pasien a om nawn sih amah? Tua ahi ziehin nangma in na katona na lupna na nuasie sih ding a, na si valon ding hi,” a ci hi.

¹⁷Tuaci’n Elijah in a gensa TOPA’ thu tawh kizui-in ama a si hi. Judah kumpipa Jehoshaphat’ tapa Jehoram uh a kum nina kumin a sanggampa[2] Joram in ama’ za luo hi. Bangzieh ahei cile Ahaziah in tapa nei lo hi.

¹⁸Tu-in Ahaziah’ gamtatna a sepsa a omlai teng, Israel Kumpite’ Khang Sutna Laibu sungah kigiel hi lo amah?