Read Zou 2 KUMPITE 10 Bible Online

2 KUMPITE 10 - Zou bible

2 KUMPITE 10

¹Tu-in Samaria ah Ahab in tapa sawm sagi nei hi. Tuaci’n Jehu in lai gielin Samaria-a teng Jezreel[29] uliente tung, upate tung le Ahab’ tapate[30] a cingte tungah tua laite hlahin,

²“Note tawh na pu uh’ tapate omin na dei bang vua na zah thei uh sakol leengte le sakolte, kul tawh a ki-im khuopite le galvante na nei ziehun,

³na pu’ tapate lahah a hoipen khat teelin a pa’ kumpi topha tungah tosah unlen, na pupa’ innkuon adingin gal sim un,” a ci hi.

⁴Ahi vangin amate a zau mama vua, “En un, kumpi nite nangawn in ama nang zo lo hi; tua ahile eite in bang i ci nan zo mawh ding ahei?” a ci uhi.

⁵Tuaci’n kumpi innsung vaipuo pa le khuopi uhpa in upate le a cingte tawh Jehu kungah kam vaihlahin, “Kote nangma’ nasemte ka hi uhi; na gen popo ka sem ding uhi. Koima khat beh kumpi-in ka bawl sih ding uhi; hoi na sah bangin kibawl in,” a ci uhi.

⁶Tua ciengin Jehu in amate kungah laihlah a nina gielkia a, “No kei lamah ang omin ka thu mang dingin a baisa-in na op uleh na pu uh’ tapate’ lutang la unlen, zing cieng tu bang hunin Jezreel-a ka kungah hing peipi ta un,” a ci hi. Tu-in kumpipa’ tapa sawm sagite pen amate a khansuo khuopi uliente tawh a omton uhi.

⁷Amate kungah a laihlah a tun ciengin kumpipa’ tapa sawm sagite manin a that uhi; bawng sungah amau’ lutang a guong vua, Jezreel-a Jehu kungah a hlah uhi.

⁸Kamtaipa pei-in ama kungah, “Amate in kumpipa tapate’ lutang ang puo zo ta uhi,” ci-in a gen ciengin ama in, “Zingmawng dongin tunkot lutna-ah lom ni-in koi un,” a ci hi.

⁹Zingmawngin ama a pusuo ciengin dingin mi zosie kungah, “Note pen maw peng na hi uhi. Ka pupa sawmdapin a that keima ka hi hi. Hinanle tam teng zosie a satlum koi ahei?

¹⁰Tua ciengin Ahab’ innkuon tawh kisai-in TOPA in a gen thu, TOPA’ kammal khat zong tuolah kie lo ding hi, ci-in thei un; azieh pen a nasempa Elijah tung tawna a gensa thu TOPA in sem zo ta hi,” a ci hi.

¹¹Tuaci’n Jehu in koima hen nei lo za dongin Jezreel khuo sunga Ahab’ innkuon a om sun teng, ulien zosie, a lawm it zosie, le siempu zosie that sieng hi.

¹²Tua ciengin ama dingin Samaria ah a pei hi. Lamkal, Tuucingte opna ahi Beth-eked a tun ciengin,

¹³Jehu in Judah kumpipa Ahaziah’ sanggamte mu-in, ama in, “No koi na hi vuoi?” a ci hi. Amate in a dawng vua, “Kote Ahaziah’ tanaute ka hi uhi; Jezreel-a om kumpipa’ tapate le kumpinu’ tapate kunga haw dinga ang kuonsuh ka hi uhi,” a ci uhi.

¹⁴Ama in, “Amate hingmat in,” a ci hi. Amate in tua mite hingmat in, Beth-eked dum sungah mi sawmli le ni that hi; ama in koima khat beh a hingkhawi sih hi.

¹⁵Ama in khum mun a nuasie ciengin ama dawn dinga a pei Rekhab’ tapa Jehonadab tawh kituoh hi; Jehu[31] in tuapa hopi-in ama kungah, “Nang tungah ka lungtang a thuman bangin, kei tungah na lungtang a thuman ei mah?”[32] a ci hi. Jehonadab in dawng a “Man hi,” a ci hi. Jehu in, “Tua ahile na khut ei hlah in,” a ci hi. Tuaci’n ama in a khut a hlah hi. Jehu in sakol leeng tungah ama kaito hi.

¹⁶Ama in, “Kei ei zui inlen, TOPA ading ka deiluotna hing en in,” a ci hi. Tuaci’n ama[33] in a sakol leeng tungah ama a tuongsah hi.

¹⁷Samaria a tun ciengin TOPA in Elijah kunga a gensa dung zui-in Jehu in amate a suh maimang dongin Samaria-a om Ahab’ innkuonpi a omlai teng zosie a that sieng hi.

¹⁸Tua ciengin Jehu in mi zosie khawmtuo-in amate kungah, “Ahab in Baal’ na themkhat sem hi; ahi vangin Jehu in tam semzaw ding hi.

¹⁹Tua ahi ziehin tu-in Baal kamsangte zosie le a siempu zosie ka kungah hing sawl un; koima pelemsah sih un; azieh pen keima in Baal tungah kithoina thupi khat ka nei ding hi; a pelem poma kihingkhawi lo ding hi,” a ci hi. Ahi vangin Jehu in Baal bie mi zosie a suh maimang thei nadinga ngian tawh a bawl ahi bo hi.

²⁰Jehu in thu pie a, “Baal ading a thupi kikhopna siengtho khat bawl un,” a ci hi. Tuaci’n amate in a tangko uhi.

²¹A pei lo koima khat beh om loin Baal bie mi zosie a pei nadingin Jehu in Israel gam sung zosie-ah thu a zasah hi; Baal a bie zosie a pei vua, a pei lo mi khat zong om lo hi. Baal biehinn a kawm khat panin a kawm khat dong dimin Baal biehinn sungah amate a lut uhi.

²²Ama in kizepna puon kempa kungah, “Baal bie zosie adingin puon hing la in,” a ci hi. Tuaci’n amate dingin ama in puonte a peipi hi.

²³Tua ciengin Rechab’ tapa Jehonadab tawh Baal biehinn sungah Jehu tum hi; ama in Baal bie mite kungah, “Note lahah TOPA a bie mi om loin Baal biete beh a op nadingin sui unlen en un,” a ci hi.

²⁴Tua ciengin amate in kithoinate le meihal biehnate a zom suoh uhi. Tu-in Jehu in a pulamah mi sawmgiet koi a, “Na khut sung vua kang pieh khat popo a hlasuo pa in ama’ hinna a tan ding hi,” a ci hi.

²⁵Meihal biehna pieh a man zaw behin Jehu in a cingte le uliente kungah, “Va lut unlen, va that ta un; mi khat zong pitsah sih un,” a ci hi. Tuaci’n namsau tawh amate a that uhi. A cingte le uliente in amate a pulam sena’n a nei vua, Baal biehinn kulpi sung a lut uhi.

²⁶Baal biehinn sunga om Baal biehna song[34] la-in a hal uhi.

²⁷Tua ciengin amate in Baal biehna song phelkhe-in Baal biehinn a susie vua, tuni dongin ehbuh a suohsah uhi.

²⁸Tua bangin Jehu in Israel sung panin Baal a phietmang sieng hi.

²⁹Ahi vangin Bethel le Dan-a kham bawngnote a bawl zieha Israel a khielsah, Nebat’ tapa Jeroboam’ mawnate panin Jehu a kihei tuom sih hi.

³⁰TOPA in Jehu kungah, “Nang in man ka sah thu limtaha na sep zieh le ka lung lam banga Ahab’ innkuonte na bawlna ziehin khang lina dongin Israel kumpi topha tungah na tapate a to ding uhi,” a ci hi.

³¹Ahi vangin Jehu in a lungsim zosie tawh Israel Pasien TOPA’ thukham limtahin zui kha lo hi; Israel a khielsah Jeroboam’ mawna panin ama a kihei tuon sih hi.

³²Khum hun lai-in TOPA in Israel gam pawlkhat khep ding kipan hi. Hazael in Israel gam sung zosie-ah amate a zo hi.

³³Jordan nisuona lam, Gilead gam zosie, Gad-te, Reuben-te, Manasseh-te, Arnon Lui gei-a om Aroer panin Gilead le Bashan gam zosie a zomang hi.

³⁴Tu-in Jehu’ gamtatna a omlai teng, a sep zosie le ama thahatnate zosie, Israel Kumpite’ Khang Sutna Laibu sungah kigiel hi lo amah?

³⁵Tuaci’n a pu a pate tawh Jehu lumton a, amate in Samaria ah ama a vui uhi. A tapa Jehoahaz in ama’ za luo hi.

³⁶Jehu in Samaria panin Israel tungah kum sawmni le giet sung uh hi.