Read Zou 2 KUMPITE 7 Bible Online

2 KUMPITE 7 - Zou bible

2 KUMPITE 7

¹Ahi vangin Elisha in, “TOPA’ kammal za in: Tam bangin TOPA in gen a, zing cieng tu bang hunin Samaria kul tunkotah annel law khat shekel khatin kizua ding a, mangbuham law ni shekel khatin kizua ding hi,” a ci hi.

²Tua ciengin kumpipa a khuta a kingapna galkap bupa in Pasien’ mipa kungah, “TOPA in vantung tawlette nangawn hong nanle tam bang pieng thei ding amah?” a ci hi. Ahi vangin ama in, “Na mit tawh na mu ding a, ahi vangin na ne kha sih ding hi,” a ci hi.

³Tua laitahin khuopi tunkot pulamah miphah[20] li om a, amate khatlekhat in, “Bang dinga i si tanpha vua tam sunga mawh toto ding i hi uh ahei?

⁴‘Khuopi sungah lut vai,’ ci lei lah khuopi sungah kielpi tung a, tua munah i si ding uhi; tam sungah to den vai ci lei lah a si veve ding i hi uhi. Tua ahi ziehin Aram-te’ giephuolah va pei vai; amate in ei mawh hingkhawi khah uleh i hing ding a, ei tha ule lah a si veve ding ma i hi lel uhi,” a kici uhi.

⁵Tuaci’n nitum kuonin Aram-te’ phuolah a pei uhi; ahi vangin Aram-te’ phuol mong a tun uleh tua munah koima a na om nawn sih hi.

⁶Azieh pen TOPA in sakol leengte, sakolte le galkap honpi husate Aram galkapte zasahin amate khatlekhat in, “Israel kumpipa in ei do dingin Hit kumpite le Egypt kumpite ciel hi,” a kici uhi.

⁷Tuaci’n ni tum kuonin amate tai-in a puonbuhte uh, a sakolte ule a laate uh nuasie-in a hinna a taipi uhi.

⁸Tam miphahte giephuol mong a tun ciengun puonbuh khat sungah lutin an ne tui dawnin a om vua, ngun, kham, le puonsilte tomgamin tuate a phuol uhi. Tua ciengin peikia-in puonbuh dang khatah a lut vua, khum panin zong vante tuo-in tuate a phuol leuleu uhi.

⁹Tua ciengin amate khatlekhat a kiho vua, “I sepzie uh man lo hi. Tuni pen kipah ni ahi hi; bangma gen loin i dai op vua, zingmawng khuova dong i nga uleh gimna i thuoh ding uhi; tua ziehin va pei-in kumpipa’ innkuonte kungah va gen ta vai,” a kici uhi.

¹⁰Tuaci’n amate zong pei-in khuopi tunkot cingte a ko vua, tuale amate kungah, “Aram-te’ giephuol ka va haw ta vua, khum sungah a kikhi sakolte le laate le a bang banga om puonbuhte simlo, koima kimu kha lo a, koima’ husa zong kiza loin bangma dang om lo hi,” ci-in a gen uhi.

¹¹Tua ciengin tunkot cingte kiko-in kumpipa’ innkuonte kungah tam thu a tangko uhi.

¹²Zanin kumpipa tho-in a nasemte kungah, “Aram-te in ei do dinga a kisah dan uh kang gen ding hi. Amate in i kiel lam a thei uhi; tuaci’n amate gamlahah a kiphuol dingin giephuol a nuasie vua, ‘Khuopi panin ang pei ciengun amate hing matin khuopi sungah i lut ding hi,’ ci-in a ngaisun uhi.

¹³A nasemte khat in, “Tam sunga kinuasie teng in a sisa Israel mihonpi ma bangin thuoh veve ding ahi ziehin mi pawlkhat in a omlai sakolte sung panin nga kaisah hi; [21]amate sawlin en phot vai,” a ci hi.

¹⁴Tuaci’n amate in sakol tung tuong mi ni hlanin kumpipa in Aram galkapte nua-ah amate sawl a, “Pei unlen va thei ta un,” a ci hi.

¹⁵Tuaci’n ama gel in Jordan dong a del uhi; lam dung tengah Aram-te a kinaw na lam vua a kiehsah uh puonte le vanzahte a na kithethang ziezuo hi. Tuaci’n kamtaite kinuale-in kumpipa kungah a gen uhi.

¹⁶Tua ciengin mite pei-in Aram-te’ giephuol a bulu uhi. Tuaci’n TOPA gensa dung zui-in annel law khat shekel khatin kizua a, mangbuham law ni shekel khatin kizua hi.

¹⁷Tu-in kumpipa in a khuta a kingapna galkap bupa pen tunkot uh dingin koi hi; ama kungah kumpipa a peisuh lai-in Pasien’ mipa thugensa bang lien ma-in mite in a si dongin tunkotah ama a tuoncil uhi.

¹⁸Bangzieh ahei cile Pasien’ mipa in kumpipa kungah, “Zing cieng tu bang hunin Samaria tunkotah mangbuham law ni shekel khatin kizua ding a, annel law khat shekel khatin kizua ding hi,” a ci ciengin

¹⁹galkap bupa in Pasien’ mipa dawng a, “TOPA in vantung tawlette nangawn hong nanle tam bang pieng thei ding amah?” a ci hi. Tuale ama in dawngin, “Na mit tawh na mu ding a, hinanle na nekha sih ding hi,” a ci hi.

²⁰Tua bang ma-in ama tungah tung tahpi hi; mite in tunkotah ama tuoncilin a si hi.