Read Zou 1 KHANG TANGTHU 20 Bible Online

1 KHANG TANGTHU 20 - Zou bible

1 KHANG TANGTHU 20

¹Khum kum khuokhal sungin gal sim dingin kumpite a kuon hunin Joab in galkapte pui-in Ammon-te’ gam a susie vua, tuale pei-in Rabbah a imtawm uhi. Hinanle Jerusalem ah David a om hi. Joab in Rabbah simin a thalpai hi.

²David in ama’ lu tung panin Milcom’[78] kumpi lukhu a lahpieh hi; tua lukhu pen kham talent khat gih a, a sungah suong manpha khat a op lam ama in thei hi; tuale ama in tua lukhu David a khusah hi. Ama in khuopi sunga van kinuasie tampite zong peipi hi.

³Ama in tua sunga om mite a peipi a, sing-atte, tuzumte, le heite[79] tawh na sem dingin amate koi[80] hi. Ammon-te’ khuopi zosie-ah tua bangin David in a bawl hi. Tua ciengin David le mi zosie Jerusalem ah a kilekia uhi.

⁴Tam zaw ciengin Gezer ah Philistia-te tawh gal dona om hi; tua ciengin Hushath-te Sibbecai in migolte’ suonlehlahte khat ahi Sippai that hi; tuale ama in a khut nei-ah Philistia-te koi hi.

⁵Philistia-te tawh khatvei kidona omkia hi; tuale Jair’ tapa Elhanan in a teipi kung siemgante’ siemlawngpi cie a pha Git-te Goliath’ sanggampa Lahmi that hi.

⁶A khut lang tuohah khutme guh le a keng lang tuohah kengme guh, a unpi-a sawmni le li a nei, mi thagol khat a opna Gath ah gal a omkia hi; ama zong mi thagolte’ hlahlesuon khat ahi hi.

⁷Ama in Israel a tawh ciengin David’ sanggampa Shimea’ tapa Jonathan in ama that hi.

⁸Tam teng Gath-a mi thagolte’ suonlehlahte ahi uhi; amate pen David le a nasemte’ khutlum tawh a si sieng uhi.