Read Zou 1 KHANG TANGTHU 23 Bible Online

1 KHANG TANGTHU 23 - Zou bible

1 KHANG TANGTHU 23

¹David vuoi-in kum tampi a phah ciengin Israel tungah kumpi dingin a tapa Solomon koi hi.

²David in Israel makai zosie le siempute le Levi-te a kikhawmsah hi.

³Levi-te kum sawmthum pan a tungsie teng kisim a, a kigawm mi tul sawmthum le tulgiet pha hi.

⁴David in, “Tam teng sung panin tul sawmni le tul li in TOPA’ biehinn sung nasep uh ding a, tulguhte pen uliente le thukhente ahi ding vua,

⁵tul li pen kotcingte hi-in, tul li in ama phat nadinga ka bawlsa tumtheite tawh TOPA tungah phatna pie ding uhi,” a ci hi.

⁶David in Levi tapate tawh kituohin amate tam bangin a pawlpawlin khen hi: Tuate pen Gershon[83] pawl, Kohath pawl, le Merari pawl ahi uhi.

⁷Gershon’[84] tapate pen Ladan le Shimei ahi uhi.

⁸Ladan’ tapate: A uhpi Jehiel, le Zetham, le Joel, thum pha uhi.

⁹Shimei’ tapate: Shelomoth, Haziel, le Haran, thum pha uhi. Tam teng pen Ladan innkuonte’ lutangte ahi uhi.

¹⁰Shimei’ tapate: Jahath, Zina, Jeush, le Beriah. Tam mihing li teng pen Shimei’ tapate ahi uhi.

¹¹Zahatha pen uhpi ahi a, Zizah a nina ahi hi; ahi vangin Jeush le Beriah in tapa tampi a nei sih vua, tuaci’n amate innkuon khat bangin kisim hi.

¹²Kohath’ tapate: Amram, Izhar, Hebron, le Uzziel, li pha uhi.

¹³Amram’ tapate: Aaron le Moses ahi uhi. Ama le a tapate in TOPA mai-ah khan tawnin biehna pie-in ama’ na semin, ama’ min tawh thupha a pieh zing thei nadingin a siengpen nate a ap dingin Aaron kituomkoi hi;

¹⁴ahi vangin Pasien’ mipa Moses’ tapate, Levi minam lahah kisim ding hi.

¹⁵Moses’ tapate: Gershom le Eliezer ahi uhi.

¹⁶Gershom’ tapate lahah Shebuel a uhpi ahi hi.

¹⁷Eliezer’ tapate: Rehabiah a uhpi ahi hi; Eliezer in tapa dang nei lo a, hinanle Rehabiah’ tapate pen a tam mama uhi.

¹⁸Izhar’ tapate: Shelomith a uhpi ahi hi.

¹⁹Hebron’ tapate: Jeriah a uhpi, Amariah a nina, Jahaziel a thumna, le Jekameam a lina ahi hi.

²⁰Uzziel’ tapate: Micah a uhpi, le Isshiah a nina ahi hi.

²¹Merari’ tapate: Mahli le Mushi ahi hi. Mahli’ tapate: Eleazar le Kish ahi hi.

²²Eleazar tapa nei loin si a, ahi vangin tanu beh a nei hi; amau’ tanau ahi Kish’ tapate in amate a tenpi uhi.

²³Mushi’ tapate: Mahli, Eder, le Jeremoth, thum pha uhi.

²⁴Tam teng pen TOPA’ biehinn lam nasepna-ah a sem ding, kum sawmni pan a tungsie, a mimalin a mina mi phaza tawh kituohin a pupa uh’ innkuon zui-a kiciemte Levi’ suonte ahi hi.

²⁵Azieh pen David in, “Israel Pasien, TOPA in a mite tungah tawlngahna pie zo hi; tuale Jerusalem ah ama a om zing hi.

²⁶Tuaci’n Levi-te in biehbuh hile biehna nasep nadingin vanzah dingte hile puoh ngai nawn lo hi,” a ci hi.

²⁷Azieh pen David’ kam nukhia pen dung zui-in tam teng kum sawmni pan a tungsie Levi mi phaza hi a,

²⁸“Hinanle amau’ nasep ding pen TOPA’ biehinn nasepna-ah Aaron’ suon le hlahte a hu ding vua, biehinn tuolte le biehinn khante kemin, a siengtho ahi nate zosie sawp sieng ding, le Pasien’ biehinn nasepna-ah sep ding khat popo a sem ding uh ahi hi;

²⁹anlum guolte, an tawh biehna ding annel, tol saw lo anpheng, a ki-em silpieh, sathau tawh a kihal silpieh, le a phaza ahi sihle a golna tena nasep zosie hu ding uhi.

³⁰Amate in zingmawng sielin dingin lungdam ko-in, TOPA a phat ding vua, nitah lamin tua bang ma-in bawlin,

³¹TOPA kungah a kul le a poimaw dung zui-in sabbath nite, hladet nite, le pawi nite-ah meihal biehna a kipieh popo ciengin TOPA mai-ah om zing ding uhi.

³²Tua bangin amate in kikhopna puonbuh le mun siengtho kemin, TOPA’ biehinn nasepna ah a tanaute uh ahi Aaron’ suonte a hu ding uhi,” a ci hi.