Read Zou 1 KHANG TANGTHU 27 Bible Online

1 KHANG TANGTHU 27 - Zou bible

1 KHANG TANGTHU 27

¹Tam pen Israel mi, innkuon lutangte, a tul le a za-a a uhte, le khen khatah mi tul sawmni le tulli ta a pha, kum khat sung tawntung hla khat zaw hla khat vaitung le vaikuon dinga kise a khente tawh kisai-in na zosie-ah kumpipa’ na a sem a uliente uh’ min kikhumna ahi hi:

²A hla masa sungin Zabdiel’ tapa Jashobeam pen a khen masa a uhpa ahi hi; ama’ khen sungah mi tul sawmni le tulli a om hi.

³Ama Perez’ suonlehlah ahi a, a hla masa sungin galkapmangte zosie’ a uhpipa ahi hi.

⁴Ahoh-te Dodai pen a hla nina sunga a khen a uhpa ahi hi; ama’ khen sungah mi tul sawmni le tulli a om hi.

⁵A hla thumna-a a khen thumna uhpa pen siempu Jehoiada’ tapa Benaiah ahi hi; ama’ khen sungah mi tul sawmni le tulli a om hi.

⁶Tam pen mi Sawmthumte sung panin a thahat, mi Sawmthumte a uh Benanaih ahi hi; a tapa Ammizabad pen ama’ khen uhpa ahi hi.[96]

⁷A hla lina-a a lina pa pen Joab sanggampa Asahel ahi a, ama zaw ciengin a tapa Zebadiah ahi hi; ama’ khen sungah mi tul sawmni le tulli a om hi.

⁸A hla ngana-a a ngana pa pen Izhar-te Shamhuth ahi hi; ama’ khen sungah mi tul sawmni le tulli a om hi.

⁹A hla guhna-a a guhna pa pen Teko-te Ikkesh’ tapa Ira ahi hi; ama’ khen sungah mi tul sawmni le tulli a om hi.

¹⁰A hla sagina-a a sagina pa pen Ephraim-te sung panin Pelon-te Helez ahi hi; ama’ khen sungah mi tul sawmni le tulli a om hi.

¹¹A hla gietna-a a gietna pa pen Zerah-te sung panin Hushah-te Sibbecai ahi hi; ama’ khen sungah mi tul sawmni le tulli a om hi.

¹²A hla kuona- a a kuona pa pen Benjamin-te sung panin Anathoth-te Abiezer ahi hi; ama’ khen sungah mi tul sawmni le tulli a om hi.

¹³A hla sawmna-a a sawmna pa pen Zerah-te sung panin Netophah-te Maharai ahi hi; ama’ khen sungah mi tul sawmni le tulli a om hi.

¹⁴A hla sawm le khatna-a a sawm le khatna pa pen Ephraim-te sung panin Pirathon-te Benaiah ahi hi; ama’ khen sungah mi tul sawmni le tulli a om hi.

¹⁵A hla sawm le nina-a sawm le nina pa pen Othniel-te sung panin Natophah-te Heldai ahi hi; ama’ khen sungah mi tul sawmni le tulli a om hi.

¹⁶Israel minamte tungah Reuben-te adingin Zichri’ tapa Eliezer pen uhpi pa ahi hi; Simeon-te adingin Maacah’ tapa Shephatiah ahi hi;

¹⁷Levi adingin Kemuel’ tapa Hashabiah ahi hi; Aaron adingin Zadok ahi hi;

¹⁸Judah adingin David’ sanggamte sung panin Elihu ahi hi;

¹⁹Zebulun adingin Obadiah’ tapa Ishmaiah ahi hi;

²⁰Ephraim-te adingin Azariah’ tapa Hoshea ahi hi; Manasseh minam alangte adingin Pedaiah’ tapa Joel ahi hi;

²¹Gilead gam sunga Manasseh minam alangte adingin Zechariah’ tapa Iddo ahi hi; Benjamin adingin Abner’ tapa Jaasiel ahi hi;

²²Dan adingin Jehoram’ tapa Azarel ahi hi; tam teng pen Israel minam makaite ahi uhi.

²³TOPA in vana aasi za-a a tam dingin Israel a khapsa ahi ziehin David in kum sawmni le a neisie mite sim lo hi.

²⁴Zeruiah’ tapa Joab in amate a phaza sim ding kipan a, hizongle ama man sieng zo lo hi; hizongle tam thu ziehin Israel tungah lungthahna tung a, Kumpi David’ khang tangthu sungah tua a kisim mite a phaza kikhum lo hi.

²⁵Adiel’ tapa Azmaveth in kumpipa’ vanmanpha koina-ah vai a hawm hi. Gam sung, khuopite, khuoneute, le tausangte sunga vanmanpha koinate tunga vaihawm ding pa pen Uzziah’ tapa Jonathan ahi hi.

²⁶Lo nasem, lohlote tunga vaihawm ding pa pen Chelub’ tapa Ezri ahi hi.

²⁷Lengga lote-a vaihawm ding pa pen Ramah-te Shimei ahi hi. Lengga lo pana a pieng lenggazu koinate tunga vaihawm ding pa pen Shiphmoth-te Zabdi ahi hi.

²⁸Shephelah gam sunga a om olive le theitheh kungte tunga vaihawm ding pa khu Gederah-te Baal-hanan ahi hi. Sathau koinate tunga vaihawm ding pa pen Joash ahi hi.

²⁹Sharon gam sunga a gamta ganhonte tunga vaihawm ding pa pen Adlai’ tapa Shaphat ahi hi.

³⁰Kalaohte tunga vaihawm ding pa pen Ishmael-te Obil ahi hi. Laa a nute tunga vaihawm ding pa pen Meronoth-te Jehdeiah ahi hi. Tuuhonte tunga vaihawm ding pen Hagri-te Jaziz ahi hi.

³¹Tam teng zosie Kumpipa David’ neisa kemte ahi uhi.

³²David’ pano Jonathan pen thu theitel mi le laithei mi ahi ziehin thu kuppipa ahi hi; Hachmoni’ tapa Jehiel in kumpipa’ tapate a cing hi.

³³Ahithophel pen kumpipa’ thu kuppipa ahi a, Archi-te Hushai pen kumpipa’ zawlpa ahi hi.

³⁴Ahithophel’ nua ciengin Benaiah’ tapa Jehoiada le Abiathar in ama laih a, Joab pen kumpipa’ galkapmangpa ahi hi.