Read Zou 1 KHANG TANGTHU 28 Bible Online

1 KHANG TANGTHU 28 - Zou bible

1 KHANG TANGTHU 28

¹David in Israel uliente, minam uliente, kumpipa’ na a sem a khen khena uliente, a tul uh galkap uliente, a za uh galkap uliente, neisa zosie le kumpipa’ ganhonte le a tapate a kemte, kumpi inn sung uliente, mi thahat galhangte, le galhang zosie tawh Jerusalem ah a unpi-un a kikhawmsah hi.

²Tua ciengin a keng tawh Kumpi David dingto a, “Ka sanggamte le ka mite aw, ka thu gen za un. Keima in TOPA’ thuciemna singkuong ading le i Pasien’ keng ngah nading tawlngahna biehinn khat lam dingin ka gel zo ta hi; tua biehinn adingin ka kigingkhol zo hi.

³Hizongle Pasien in keima kungah, ‘Nang galhang khat na hi a, sisan luongsah zo na hi ziehin keima’ min dingin biehinn na lam sih ding hi,’ ei ci hi.

⁴Ahi vangin Israel TOPA Pasien in ka pu innkuonte zosie sung panin Israel tungah kumpi a sem zing dingin keima ei teel hi; bangzieh ahei cile ama in makai dingin Judah teel a, Judah innkuon sung panin ka pa’ innkuon, ka pa’ tapate sung panin Israel zosie tunga kumpi sem dingin keima ei lungkimpi hi.

⁵TOPA in tapa tampi ei pie ahi ziehin keima’ tapate zosie sung panin Israel tung, TOPA’ kumpi topha tunga a to dingin ama in ka tapa Solomon a teel zo hi.

⁶Ama in keima kungah, ‘Ka biehinn le ka inntuolte a lam ding pa khu nangma’ tapa Solomon ahi hi. Azieh pen keima in ka tapa dingin ama ka teel zo a, keima ama’ pa ka hi ding hi.

⁷Ama in ka thupiehnate le ka biehna ngaina kipte tuni-a ma bangin zui dinga a ngaisut peisuoh nah leh keima in a kumpi gam ka kipsah den ding hi,’ ei ci hi.

⁸Tua ziehin tu-in tami gam hoi tangin na nua vua na tate uh tungah gamh-in na nuasie tawntung thei nadingun TOPA mai-a kikhopna ahi Israel zosie’ muna le i Pasien’ zahna-ah na TOPA Pasien thupiehna zosie zui-in sui un.

⁹“Nang, ka tapa Solomon aw, na pa’ Pasien thei inlen, lungsim khat le lawpna lungtang tawh ama’ na sem in; azieh pen TOPA in lungsim zosie sui a, gelna le ngaisutna zosie thei hi. Nang in ama na sui leh ama in nang ang mu ding a, ama na elngat leh ama in zong a tawntungin nang ang nuasie ding hi.

¹⁰Munsiengtho adingin biehinn khat a lam dingin TOPA in nang ang teel zo ziehin tu-in kingaisun in; thahat inlen sem in,” a ci hi.

¹¹Tua ciengin David in a tapa Solomon kungah biehinn talaap, a innte, a vanmanpha koinate, a khan tungnungte, a khan sungtate, le hepina topha[97] dinga a innkhan gelna;

¹²tuale TOPA’ biehinn tuolte adinga a lungsim sunga a ngaisut zosie, a kimvela innkhan zosie, Pasien’ biehinn sung vanmanpha koinate, le a ki-ap letsongte adingin vanmanpha koina’ innlimte pie a,

¹³siempute, Levi a kisekhente le TOPA’ biehinn sunga nasepna zosie ading; TOPA’ biehinn sunga nasepna ding vanzah zosie ading,

¹⁴na sepna khat sima zah ding kham tawh kibawl vanzah zosie a gihna, nasepna sima zah ding ngun tawh kibawl vanzahte a gihna,

¹⁵kham meivah khuom le a meivahte a gihna, meivah khuom khat ciet a gihna le a meivahte gihna, ngun meivah khuom ding le nasepna-ah a poimaw dung zui-a zah dingin meivah teng gihna zong a unin tesa-in a pie hi.

¹⁶Ompina Anlum adingin sabuoi kham a gihna ciet, ngun sabuoite ading ngun a gihna,

¹⁷le tawkeukate, kuongte, le haite adingin kham citah a gihna; kham haipite le a gihna ciet, ngun haipite le a gihna ciet;

¹⁸a kisiengsah kham tawh a kibawl gimnamtui halna maitam ding le a gihna za ding gelna; a hlate uh zahin TOPA’ thuciemna singkuong a khu cherub-te’ khamleeng ding a gelna zong a pie hi.

¹⁹TOPA’ lamlahna tawh a kigiel nasepna gelna tamteng zosie ama in a unin keima ei theiciensah hi,” a ci hi.

²⁰David in a tapa Solomon kungah, “Hattah le hangsan tahin om inlen sem in. Zau sinlen lungkie sin; azieh pen TOPA Pasien, keima’ Pasien in nangma ang ompi hi. TOPA’ biehinn nasepna zosie a kizaw sieng masangsie ama in nangma ang tamasah sih ding a, zong ang nuasie sih ding hi.

²¹TOPA’ biehinn nasep zosie a sem dingin siempute le Levi mi kisekhente om a, nasepna khat popo-ah siemna a nei a kipumpieh zosie in a nasepna vannuoi vuah nangma tawh ang om ding uhi. Uliente le mi zosie zong nang’ thupiehna bangbangin a gamta ding uhi,” ci-in a gen hi.