Read Zou 2 KHANG TANGTHU 1 Bible Online

2 KHANG TANGTHU 1 - Zou bible

2 KHANG TANGTHU 1

¹A kumpi gam sungah David’ tapa Solomon ama le ama kiptahin om hi; TOPA a Pasien in ama ompi a, a lien mama-in ama a bawl hi.

²Solomon in Israel mi zosie, a tul uhte le a za uhte, thukhente, Israel makaite zosie, le innkuon lutangte hlan hi.

³Tua ciengin Solomon le ama tawh a om mi buppi, Gibeon-a munsangah a pei uhi; bangzieh ahei cile gamlahah TOPA’ nasem Moses in a na lamsa ahi Pasien’ kikhopna puonbuh khu tuanah a om hi.

⁴(Ahi vangin David in Kiriath-jearim panin ama dinga a bawlpieh nasa munah Pasien’ thuciemna singkuong puoto zo hi; bangzieh ahei cile ama in Jerusalem-ah tua adingin puonbuh khat lampieh zo hi.)

⁵Tua tham loin, Hur’ tapa Uri, a tapa Bezalel in a na bawlsa sumngo maitam zong TOPA’ biehbuh mai tua munah a om hi. Tua munah Solomon le a kikhawm mite in thu a dong uhi.

⁶Kikhopna puonbuh-a om TOPA’ mai-a sumngo maitam ah Solomon peito-in tua tungah meihal biehna tulkhat a pie hi.

⁷Tuami zanin Solomon tungah Pasien kilah a, ama kungah, “Kang pieh ding pen ngen in,” a ci hi.

⁸Solomon in Pasien kungah, “Ka pa David tungah a lien le a kip itna na lah zo a, keima kumpi-in ama’ za nei luosah zo hi.

⁹TOPA Pasien aw, leitungah leivui za banga a tam mite lahah kumpi dingin nei koi zo tah ziehin ka pa David kunga na thuciemna tu-in hing tangtungsah in.

¹⁰Tam mite mai-a ka sungtum ka pusuo thei nadingin tu-in pilna le theina ei pie in, azieh pen hiza taha a tam na mite koi in uh zo ding ahei?” a ci hi.

¹¹Pasien in Solomon dawng a, “Tam thu na lungsim sungah om a, nangma in nei le lamte, hauna, patawina, ahi sihle nang ang mudate’ si nading, le khansauna na ngen sih a, amate tungah kumpi-a kang koina ka mite na uh thei nadingin nang adingin pilna le theina nang nget zawh ziehin,

¹²na tungah pilna le theina ang kipie hi. Keima in nangma tungah na masanga kumpite koima in a nei ngai lo le na nua-ate koima in zong tua bang a nei ngai nawn lo ding haunate, nei le lamte, le patawinate zong kang pie ding hi,” a ci hi.

¹³Tuaci’n Gibeon-a om munsang kikhopna puonbuh mai panin[1] Jerusalem ah Solomon a pei hi. Tuale ama in Israel tungah a uh hi.

¹⁴Solomon in leengte le sakolte kaikhawm hi; ama in leeng tulkhat le zali le sakol tul sawm le tulni nei a, tuate leeng khuopite le Jerusalem ah kumpipa tawh koi hi.

¹⁵Kumpipa in Jerusalem ah suongpem tam bangin ngun tamsah a, taamtah sing zong Shephelah theitheh sing vau bangin vausah hi.

¹⁶Solomon sakolte zong Egypt gam le Kue gam pana kila ahi hi; kumpipa’ sumbawlte in a man ding pie-in Kue panin tuate a nga uhi.

¹⁷Egypt gam panin leeng khat ngun shekel zaguh, sakol khat shekel za le sawmnga-in a la uhi; tuaci’n amate tung panin Hit kumpite zosie le Aram kumpite tungah tuate kizuasawnkia hi.