Read Zou 2 KHANG TANGTHU 10 Bible Online

2 KHANG TANGTHU 10 - Zou bible

2 KHANG TANGTHU 10

¹Shechem ah Rehoboam a pei hi, azieh pen ama kumpi suohsah dingin Israel zosie a pei uhi.

²Nebat’ tapa Jeroboam in tua thu a zah ciengin (azieh pen Kumpi Solomon kung pan a taina Egypt ah ama omlai hi), Egypt panin Jeroboam a kilekia hi.

³Amate in mi sawlin ama a hlansah uhi; tuale Jeroboam le Israel zosie pei-in Rehoboam kungah,

⁴“Na pa in ka hahkol uh a gihsah hi. Tua ahi ziehin tu-in na pa’ nasep hamsate le ko tunga ei suon a hahkol gihte hing zangsah in, tua hile kote in nangma’ na ka sem ding uhi,” a ci uhi.

⁵Ama in amate kungah, “Ni thum sungin keima kungah hing peikia un,” a ci hi. Tuaci’n mite a pei uhi.

⁶Tua ciengin Kumpi Rehoboam in zong a pa Solomon hin lai-a ama a kem khanghamte thu kuppi a, “Tam mite ka dawnna ding ngaisutna ei bangci pieh ding na hi uh ahei?” a ci hi.

⁷Amate in ama kungah, “Nang in tam mite khuotuo-in amate lungkimsahin kam hoi gen po lacin, a tawntungin na nasemte ang hi zing ta ding uhi,” a ci uhi.

⁸Hinanle ama in khangham upate pieh ngaisutna nuol a, ama tawh a khangton, tulaitaha ama a kem khangnote thu a kuppi zaw hi.

⁹Ama in amate kungah, “’Na pa in ko tunga ang suon hahkol zangsah in,’ ei ci mite i dawn thei nadingin bang ngaisutna ei pie ding na hi uh ahei?” a ci hi.

¹⁰Ama tawh a khangton tangvalte in ama kungah, “Nangma kungah, ‘Na pa in ka hahkol uh gihsah hi, ahi vangin nang in ko adingin tua hahkol hing zangsah in,’ ang ci mite kungah tam bangin na gen ding hi, ‘Ka pa’ kawng sangin ka khutme a sazaw hi.

¹¹Tu-in keima in ka pa ang suon vangih kang belap lai ding hi. Ka pa in khauhuol tawh ang sat vua, ahi vangin keima in cieng lingneite tawh kang sat ding hi,’ na ci ding hi,” a ci uhi.

¹²Tuaci’n kumpipa in, “Ni thum ni-in ka kungah hing peikia un,” a ci ma bangin Rehoboam kungah Jeroboam le mi zosie a pei uhi.

¹³Kumpipa in amate na khauh dawn mama hi. Kumpi Rehoboam in khanghamte’ ngaisutna a nuol hi;

¹⁴ama in khangnote’ ngaisutna bangin amate kungah thu gen a, “Ka pa in no tunga vangih ang suon pen kang belap zaw lai ding hi; ka pa in khauhuol tawh note thu ang hil hi, ahi vangin keima in cieng lingneite tawh thu kang hil ding hi,” a ci hi.

¹⁵Tuaci’n kumpipa in mite’ thu a ngai sih hi. Azieh pen tami khu TOPA in Shiloh-te Ahijah tungtawnin Nebat’ tapa Jeroboam tungah a gensa thu a tangtun nadinga TOPA piensah thukawng kiheina ahi hi.

¹⁶Kumpipa in amau’ thu ngai lo hi, ci Israel mi zosie in a mu bepun, mite in kumpipa dawngin, David sungah kote in bang tanh ka nei uh ahei? Jessi tapa sungah gouluo ka nei sih uhi. Israel aw, na puonbuh cietah pei un! a ci uhi. Tuaci’n Israel zosie in a puonbuh ciet a zuon uhi.

¹⁷Ahi vangin Judah gam khuopite sunga a teng Israel mite tungah Rehoboam a maang hi.

¹⁸Kumpi Rehoboam in Israel mite kungah thona-aana nasepna a uhpa Hadoram a sawl ciengin, amate in ama suong tawh na seplia uhi. Jerusalem-a tai dingin a leeng tungah Kumpipa Rehoboam a naw tuon hi.

¹⁹Tuaci’n Israel in tuni dongin David’ innsung mite a ledo uhi.