Read Zou 2 KHANG TANGTHU 13 Bible Online

2 KHANG TANGTHU 13 - Zou bible

2 KHANG TANGTHU 13

¹Kumpi Jeroboam a maan kum sawm le gietna kumin Judah tungah Abijah maan ding a kipan hi.

²Ama in Jerusalem ah kum thum sung maang hi. Ama nu’ min Micaiah hi a, Gibeah-te Uriel’ tanu ahi hi. Tu-in Abijah le Jeroboam kilalah kidona a om hi.

³Gal sim dingin Abijah kuon a, a kituomteel mi zali a pha, a thahat galhang galkap hon a nei hi. A kituomteel a thahat galhang tul zagiet tawh Abijah do dingin Jeroboam a pang hi.

⁴Tua ciengin Ephraim muoltung gama om Zemaraim Muol tungah Abijah ding a, “Jeroboam le Israel zosie aw, ka thu ngai un!

⁵Israel Pasien TOPA in ci tawh kibawl thuciemna tawh Israel tunga kumpi sem den dingin David le a tapate tungah a pieh lam thei lo na hi uh amah?

⁶Hizongle David’ tapa Solomon’ nasempa, Nebat’ tapa Jeroboam kipanin a pu a ledo hi;

⁷tuale Rehoboam pen khangno lai a, thukhentat thei nai loin amate a nan zo lo hun laitahin, a kimvelah kimanna a nei lo mi ginalo honkhat kikhawmin Solomon’ tapa Rehoboam a dem bawl uhi.

⁸“Note in mi tampi na hi zieh ule Jeroboam in na pasien ding vua ang bawlpieh kham bawngnote na nei ziehun, tu-in David tapate’ khut sunga om TOPA’ kumpi gam do na sawm uhi.

⁹Aaron’ suonte ahi TOPA’ siempute, le Levi-te delmangin gamdang mite bawl bang ma-in noma dingin siempute bawltawm hi lo na hi uh amah? Bawngtangno khat ahi sihle tuutang sagi tawh a kisiensuo dinga a pei popo pasien ahi lote’ siempu suoh paipai hi.

¹⁰Ahi vangin kote adingin ahile, TOPA pen ka Pasien uh ahi a, ama ka nuasie sih uhi. TOPA’ na a sem Aaron’ suon siempute le amau’ nasep a hu dingin Levi-te ka nei uhi.

¹¹Amate in zingmawng le nitah sielin TOPA tungah meihal biehnate le a gim namtuite a pie vua, kham citah tawh a kibawl sabuoi tungah anlum guolte lui-in, nitah sielin a meivahte a kuon siem nadingin kham meivah tunna a kem hoi uhi; bangzieh ahei cile kote in TOPA ka Pasien’ ei sawlna ka zui vua, ahi vangin note in ama na nuasie uhi.

¹²En un, ka makai dingun kote tawh TOPA ang omton a, note do dinga gal hlatna pengkul tum dingin ama’ siempute in galkap pengkulte a nei uhi. Israel-te aw, na pu na pate uh’ Pasien, TOPA do sih un; azieh pen na zo vawt sih ding uhi,” a ci hi.

¹³Jeroboam in a nua lam panun a buhdap dingte a sawl hi; tua bangin Judah masangah a galkapte[22] om a, a nua lam vuah a buhdapte a om hi.

¹⁴Judah a kihei ciengin ama in a galte a nua a ma-ah a op lam a mu hi. TOPA kungah amate a kiko vua, siempute in pengkul a mut uhi.

¹⁵Tua ciengin Judah mite in zong galdona aw a kiko uhi. Judah mite a kiko ciengun Abijah le Judah mai-ah Pasien in Jeroboam le Israel mi zosie a zo hi.

¹⁶Judah mai-ah Israel-te a taimang vua, Pasien in a khut sung vuah amate a pie hi.

¹⁷Abijah le a galkapte in amate zogawpin mi tampi a that uhi; a kituomteel Israel mi tul zanga kithat hi.

¹⁸Tua bangin a pu a pate uh’ Pasien, TOPA tungah amate a kingap ziehun Judah mite a guol zo vua, Israel-te in tua hunin gal a lel uhi.

¹⁹Abijah in Jeroboam nuadel a, ama kung panin khuopite, Bethel a khuoneute tawh, Jeshanah a khuoneute le Ephron[23] a khuoneute tawh a la hi.

²⁰Jeroboam in Abijah’ hun sungin vang nei zo nawn lo hi; TOPA in ama vatin ama a si hi.

²¹Ahi vangin Abijah a thahat tehteh hi. Ama in zi sawm le li la a, tapa sawmni le ni le tanu sawm le guh’ pa a suoh hi.

²²Abijah’ gamtatna a omlai teng, ama ziete le a thugente, Kamsang Iddo’ Tangthu sungah kigiel hi lo amah?