Read Zou 2 KHANG TANGTHU 14 Bible Online

2 KHANG TANGTHU 14 - Zou bible

2 KHANG TANGTHU 14

¹[24]Tuaci’n Abijah si-in a pu a pate tawh lumton a, amate in David’ khuopi-ah ama a vui uhi. A tapa Asa in ama’ zaluo hi. Ama’ uh sungin a gam sungah kum sawm sung gal a veng hi.

²[25]Asa in TOPA a Pasien’ muna-ah a hoi le a manin na sem hi.

³Ama in gamdang maitamte, munsangte, le biehna songte satpua-in khuom siengthote[26] phua a,

⁴a pu a pate’ Pasien, TOPA sui-in thukham le thupiehnate a zui nadingun Judah thu a pie hi.

⁵Ama in Judah khuopi zosie panin munsangte le gimnamtui maitamte zong hemkhie hi. Tuale ama’ khut nei-ah kumpi gam sung gal a veng hi.

⁶A gam sungah gal a dai hun sungin ama in Judah gam sungah kulpi nei khuopite a lam hi. TOPA in ama tungah kilemna hun a pieh ziehin khum hun sungin ama in gal a nei kha sih hi.

⁷Ama in Judah kungah, “Tam khuopite lamin kulpite le tausangte, kul kotpite le zawlte tawh im vai. TOPA i Pasien i sui ziehun leitang pen eite’ gam ahi lai hi; eite in ama i sui vua, ama in zong i kim zosie-ah kilemna ei pie hi,” a ci hi. Tuaci’n amate in zong khuopi lamin a khangto uhi.

⁸Asa in Judah gam sung panin lum gol le teipi tawh kivon galkap tul zathum, le lum le thal a tawi Benjamin galkap hon tul zani le tul sawmgiet nei hi; tam teng zosie pen a thahat galhangte ahi uhi.

⁹Amate a sim dingin galkap awn khat le leeng galkap zathum tawh Ethiopia-te[27] Zerah kuonin Mareshah cieng dong tung hi.

¹⁰Ama tawh kimu dingin Asa kuonkhie a, Marashah-a Zephathah guom-ah gal kido dingin amate in panmun a la uhi.

¹¹TOPA a Pasien’ tungah Asa kiko a, “TOPA aw, a thahat le a thanemte kikalah na panpi ding pen nang adingin a kilamdanna a om sih hi. Kote ei hu in, TOPA kohaw’ Pasien aw. Nangma kang muon ziehun nangma’ minin tam mihonpi a do dingin kang pei zo ta uhi. TOPA aw, nang, kohaw’ Pasien na hi hi; mihing in kizosah vawt sin,” a ci hi.

¹²Tuaci’n TOPA in Asa le Judah mite mai-ah Ethiopia-te[28] zo a, Ethiopia-te a taimang uhi.

¹³Asa le ama tawh a omton galkapte in Gerar cieng dongah amate a nuadel vua, Ethiopia-te koima a hing om loin a puamat sieng uhi; azieh pen TOPA le a galkapte mai-ah amate kisusie hi. Judah mite[29] in van kinuasie tampitah a puo uhi.

¹⁴Amate tungah TOPA zatahna a tun ziehin Gerar kimvela om khuopi zosie a zo uhi. Amate in khuopi teng a bulu uhi; azieh pen tua khuopite sungah van kinuasie tampitah om hi.

¹⁵Amate in ganhon[30] neite’ puonbuhte zong simin tuu le keel, le kalaoh tampi a peipi uhi. Tua ciengin Jerusalem ah a kilekia uhi.