Read Zou 2 KHANG TANGTHU 15 Bible Online

2 KHANG TANGTHU 15 - Zou bible

2 KHANG TANGTHU 15

¹Obed’ tapa Azariah tungah Pasien’ hlagau a tung hi.

²Asa tawh kimu dingin ama pusuohin ama kungah, “Asa, Judah le Benjamin-te zosie aw, ka thugen ngai un. Ama tawh na om laisie uh note tawh TOPA ang om hi. Ama na sui uleh ama na mu ding vua, ahi vangin ama na nuasie uleh ama in zong note ang nuasie ding hi.

³Hun sawtveipi sung Israel-te, Pasien man tawh om lo, thuhil siempu tawh om loin, thukham tawh zong omlo uhi.

⁴Ahi vangin amate a lungkham ciengun Israel Pasien, TOPA lamah kihei-in ama a sui vua, tuaci’n ama a mu uhi.

⁵Khum hun lai-in amate a zinsuh a zinto na vuah lungmuonna a om sih hi, bangzieh ahei cile gamcin tenga a teng mi zosie tungah buoina lienpi a tung hi.

⁶Pasien in lungkhamna namcin tawh a buoisah ziehin minam khat le minam khat, khuopi khat le khuopi khat a kido vua, a nengnengin a kikhenthang uhi.

⁷Hinanle nang na hi leh hang in! Na nasepna thaman ang kipie ding ahi ziehin na khut zawsah sin,” a ci hi.

⁸Asa in Oded’[31] tapa Azariah’ genkhol na ahi tam thute a zah ciengin ama hangsanin, Judah gam zosie le Benjamin le Ephraim muoltung gam pana a lahsa khuopite panin a kidahhuoi milimte paimang a, TOPA’ biehinn talaap mai-a [32]TOPA’ maitam a puopha hi.

⁹Ama in Judah le Benjamin-te zosie, le Ephraim, Manasseh, le Simeon sung panin amate kunga a peem gamdang mite a kaikhawm hi. Bangzieh ahei cile TOPA a Pasien in ama tawh a opna thu a mu ciengun Israel panin ama kungah mi tampi a tai uhi.

¹⁰Asa’ uh kum sawm le ngana a hla thumna sungin Jerusalem ah amate a kikhawm uhi.

¹¹Tua ni-in gal sunga a puoh uh nate sung panin TOPA tungah bawngtang zasagi le tuu tulsagi tawh biehpiehna a pie uhi.

¹²A lungsim zosie ule a hinna zosie utawh a pu a pate uh’ Pasien, TOPA a sui nadingun kiciemna khat a bawl uhi.

¹³Israel Pasien, TOPA a sui lo poma, a khang hile, a teh hile, pasal hile, numei hile kithat ding hi.

¹⁴Awsangpi tawh a kiko kawmun amate in pengkul le sakite tumin TOPA tungah kiciemna a bawl uhi.

¹⁵Tua kiciemna-ah Judah mi zosie a kipah uhi; bangzieh ahei cile a lungsim zosie utawh amate kiciemin a deina zosie utawh ama a sui vua, amate in ama mu-in, TOPA in zong a kimvel vuah galvenna a pie hi.

¹⁶A nu Maacah in Asherah adingin a kidahhuoi milim khat a bawl ziehin kumpi Asa in a nu nangawn kumpipa’ nu hina za panin a hemkhie hi. Asa in a nu’ milim sattanin suguoi a, Kidron Lui-ah a haltum hi.

¹⁷Ahi vangin Israel panin munsangte a kilakhietuon sih hi. Hizongle a uh hun sung tungtawnin Asa’ lungsim a thuman hi.

¹⁸Ama in pieh dinga a pa in a na ciemsa letsongte le ama’ na ciemsa letsongte - ngun le kham, le vanzahte, Pasien’ biehinn sungah a peipi hi.

¹⁹Asa in a uh kum sawmthum le ngana cieng dong galkidona om nawn lo hi.