Read Zou 2 KHANG TANGTHU 17 Bible Online

2 KHANG TANGTHU 17 - Zou bible

2 KHANG TANGTHU 17

¹Ama’ tapa Jehoshaphat in a za luo a, Israel sim dingin amama a kithakhausah hi.

²Ama in Judah gama kulpi nei khuopi zosie-ah galkapte koi a, Judah gam sung le a pa Asa in a lahsa Ephraim khuopite sungah khuopi cingte koi hi.

³Ama in a pa’[35] gamtat masate a zui ziehin TOPA in Jehoshaphat a ompi hi; ama in Baal pasien-te bie loin,

⁴Israel-te’ tawndan bangin tawn a, a pa’ bieh Pasien sui-in a thupiehnate a zuizaw hi.

⁵Tua ahi ziehin TOPA in ama’ khut sungah kumpi gam a kipsah hi. Judah zosie in Jehoshaphat kungah sieh le kaihte a puoh vua, ama in neisa tampi le patawina nga hi.

⁶TOPA’ lampite ah a ama’ lungsim a hangsan hi; tua tham loin ama in Judah gam panin munsangte le khuom siengthote[36] a hemkhie hi.

⁷Ama’ uh a kum thumna kumin ama in Judah gam khuopite sunga thuhil dingin a uliente Benhail, Obadiah, Zechariah, Nethanel, le Micaiah-te a sawl hi.

⁸Amate tawh Levi mite Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, le Tob-adonijah a peiton uhi; tuale siempu Elishama le Jehoram zong tami Levi-te tawh a peiton uhi.

⁹TOPA’ thukham laibu kengin Judah gam sungah amate in thu a hil uhi; Judah khuopi zosie-ah amate pei kawikawi-in mite lahah thu a hil uhi.

¹⁰Judah gam kimvela om kumpi gam zosie tungah TOPA zatahna tung a, tuale amate in Jehoshaphat a do nawn sih uhi.

¹¹Philistia-te pawlkhat in Jehoshaphat kungah letsongte, le sie le kaih dingin ngun a puoh uhi; tuale Arab-te in zong ama tungah tuutang tulsagi le zasagi, le keeltang tulsagi le zasagi a puoh uhi.

¹²Damdamin Jehoshaphat vanglien semsem hi. Ama in Judah gam sungah kulpite le vankholna khuopite a lam hi.

¹³Ama in Judah khuopite sungah nasep lienpite sem hi. Ama in Jerusalem-ah galkapte, a thahat galhangte a nei hi.

¹⁴A pupate innkuon tawh kizui-in amate a phaza tam bang ahi hi. Judah sung pan a tula a uhte: Adah pen a uhpa ahi a, a thahat galhang mi tul zathum tawh ahi hi.

¹⁵Ama’ zomah a uhpa Jehohanan ahi a, mi tul zani le tul sawmgiet tawh ahi hi.

¹⁶Ama’ zomah TOPA’ nasepna dinga kipumpieh Zichri’ tapa Amasiah ahi a, a thahat a galhang mi tul zani tawh ahi hi.

¹⁷Benjamin sung panin: A thahat a galhang Eliada ahi a, thal le lum a tawi mi tul zani tawh ahi hi.

¹⁸Ama’ zomah Jehozabad ahi a, galdo dinga hiem tawi mi tul zakhat le tul sawmgiet tawh ahi hi.

¹⁹Tam teng pen kumpipa in Judah gam sung zosie-ah kul nei khuopite-a a koite banah kumpipa’ na a semte ahi hi.