Read Zou 2 KHANG TANGTHU 22 Bible Online

2 KHANG TANGTHU 22 - Zou bible

2 KHANG TANGTHU 22

¹Jerusalem-a tengte in ama’ za luo dingin a tapa tumpen Ahaziah kumpi-in a koi uhi; azieh pen Arab-te tawh giephuola a pei galkapte in tapa tazaw zosiete a that sieng uhi. Tuaci’n Judah kumpi Jehoram’ tapa Ahaziah kumpi-in a maang hi.

²Ahaziah a maan ding a kipatin kum sawmli le ni pha hi; ama Jerusalem ah kum khat sung maang hi. Ama nu’ min Athaliah ahi a, Omri’ tunu ahi hi.

³A sie lam bawlna-ah a nu khu ama’ thu kuppi ahi ziehin ama in zong Ahab’ innkuon’ lampi a zui hi.

⁴Ahab innkuonpite ma bangin TOPA muna-ah ama a sie-in gamta hi; bangzieh ahei cile a pa a si zaw ciengin ama’ siet nadinga a thu kikuppite pen Ahab’ innkuonte ahi hi.

⁵Ama in amau’ thuhil nangawn zui a, Aram kumpipa Hazael tawh kido dingin Ramoth-gilead ah Israel kumpipa Ahab’ tapa Jehoram tawh a kuonton hi. Aram-te in Joram a liemsah vua,

⁶tuale Ramah ah Aram kumpipa Hazael tawh a kidona pana a nga liemmate a dam nadingin Jezreel ah kilekia hi. Jezreel ah Ahab’ tapa Joram a cinat ziehin a ve dingin Judah kumpi Jehoram’ tapa Ahaziah a kuonsuh hi.

⁷Hizongle Joram ve dingin ama a hawna ziehin Ahaziah’ zakieh nading pen Pasien’ laitansa ahi hi. Azieh pen ama khum munah a tun ciengin Ahab’ innkuon susie dinga TOPA in sathau a nusa Nimshi’ tapa Jehu tawh kimu dingin Jehoram a pusuoh hi.

⁸Jehu in Ahab’ innkuonte tungah thukhenna a sep laitahin Judah uliente le Ahaziah’ na a sem Ahaziah’ sanggam pasalte’ tapate tawh a kituoh a, ama in amate a that hi.

⁹Ama in Ahaziah sui a, Samaria ah a kibuh laitahin ama kiman a, Jehu kungah kizawpi-in kithat hi. Amate in ama a vui uhi, azieh pen amate in, “Ama pen a lungsim zosie tawh TOPA a sui Jehoshaphat’ tupa ahi hi,” a ci uhi. Tuale ciengin Ahaziah’ suonlehlahte in kumpi gam a uh zo ding mi khat zong a nei nawn sih uhi.

¹⁰Ahaziah’ nu Athaliah in tu-in a tapa a si lam a thei ciengin ama kipanin Judah inn sunga kumpi innkuon zosie that hi.

¹¹Ahi vangin kumpipa’ tanu Jehoshabeath in Ahaziah’ tapa Joash la a, tha dinga kikoi kumpipa’ tapate lah panin ama a gudap hi; ama nu in lupna tung khatah ama le a cingnu a koi hi. Ama pen Ahaziah’ sanggamnu ahi ziehin Kumpi Jehoram’ tanu, le siempu Jehoiada’ zi Jehoshabeath in tua bangin Athalia’ kung panin ama na phuol a, tua nu in ama that kha lo hi;

¹²Athaliah gam sungah a maan laitahin Pasien’ biehinn sungah ama kum guh sung kiphuol hi.