Read Zou 2 KHANG TANGTHU 23 Bible Online

2 KHANG TANGTHU 23 - Zou bible

2 KHANG TANGTHU 23

¹Ahi vangin a kum sagina kumin Jehoiada kihansuo-in galkap a za-a a uhte, Jeroham’ tapa Azariah, Jehonanan’ tapa Ishmael, Obed’ tapa Azariah, Adaiah’ tapa Maaseiah, Zichri’ tapa Elishaphat tawh kithukimna khat a nei uhi.

²Judah gam muncin tengah amate zin kawikawi-in Judah khuopi zosie panin Levi-te, le Israel innkuonte’ lutang teng khawmin Jerusalem-ah a pei uhi.

³Tua ciengin a kikhawm buppi in Pasien’ biehinnpi sungah kumpipa’ tapa Joash tawh thuciemna khat a bawl uhi. Jehoiada[47] in amate kungah, “Kumpipa’ tapa! David’ suonte tawh kisai-in TOPA’ ciemsa bangin ama kumpi-in maangsah un.

⁴Tami khu note’ sep ding ahi hi: Sabbath ni-a nasep a lut ding no siempute le Levi-te sung pan sethum-suoh-sekhat tunkotcing na hi ding vua,

⁵a sekhat kumpipa’ inn-ah omin, a sekhat Tunkot Phungpi-ah na om ding uhi; tuale TOPA’ biehinn leituolah mi zosie a om ding uhi.

⁶Siempute le tuonvai sem ahi Levi-te ci longal koima TOPA’ biehinn sungah lutsah sih un; a siengtho ahi ziehun amate lut thei ding a, hinanle adang[48] mi zosiete in TOPA’ thuhilna na zui ding uhi.

⁷Levi-te in a khut sung vuah a galhiem ciet uh tawi-in kumpipa kimvelah a om ding uhi; tuale biehinn sunga a lut poma kithat ding hi. A sungtumna le a pusuona-ah kumpipa tawh om un,” a ci hi.

⁸Levi-te le Judah zosie in siempu Jehoiada’ thupieh teng zosie bangin a gamta uhi; siempu Jehoiada in a kisekhente phiet lo ahi ziehin amau’ mi ciet sabbath ni-a nasem lote tawh sabbath ni-a nasemte peipi uhi.

⁹Siempu Jehoiada in galkap bute tungah TOPA’ biehinn sunga kikoi David-a’ ahi ngai teipite le lum gol le lum neute a pie hi;

¹⁰tuale ama in mi zosie a galhiem ciet utawh kumpipa cing dingin biehinn leitaw lam panin leilu lam pang dong, maitam kimkot le biehinn kimkotah pangsah hi.

¹¹Tua ciengin ama in kumpipa’ tapa peipi-in a lu tungah kumpi lukhu khusah a, ama tungah thuciemna[49] a pie hi; amate in ama kumpi a hina thu taang a tawh vua, Jehoiada le a tapate in ama sathau nu-in, “Kumpipa dam sawt heh!” ci-in a awng uhi.

¹²Mite tai-in kumpipa a a lungdampina uh gamlumna Athaliah in a zah ciengin, TOPA’ biehinn sunga mite kungah a lut hi;

¹³tuale ama nu in a en leh biehinn lutna khuompi gei-ah kumpipa ding a, kumpipa gei-ah galkap bute le pengkul tumte omin, gam sunga mi zosie kipahin pengkulte a mut uhi, tuale tuami pawi bawlna-ah lasate in a tumtheite utawh a makai uhi. Athaliah in a puon ehmalin, “Kumpi suon sawm! Kumpi suon sawm!” ci-in a awng hi.

¹⁴Tua ciengin siempu Jehoiada in galkapte uh dinga kikoi galkap bute hlanin amate kungah, “Galkap guolte kikalah tua nu peipi un; ama a zui poma namsau tawh kithat ding hi,” a ci hi. Bangzieh ahei cile siempu pa in, “TOPA’ biehinn sungah tua nu that sih un,” a ci hi.

¹⁵Tuaci’n amate in ama a man uhi; kumpipa’ inn Sakol Tunkot vangah ama lutin khum munah ama a that uhi.

¹⁶TOPA’ mi ahi nading uh Jehoiada in ama le mi zosie le kumpipa kikalah thuciemna khat a bawl hi.

¹⁷Tua ciengin Baal’ inn sungah mi zosie lutin a inn a phelpieh uhi; ama’ maitamte le a milimte satcimin tua maitamte mai-ah Baal siempu Mattan a that uhi.

¹⁸Moses thukham sunga kigiel bangin David’ thupieh dung zui-in lungdamna le lasahna tawh TOPA tungah meihal biehnate a kipieh nadingin David in a na sesa bangin TOPA’ biehinn en dingin Jehoiada in Levi siempute tungah mawpuohna a pie hi.

¹⁹Lam khat popo tawh a bua mi khat a lut lo nadingin ama in TOPA’ biehinn tunkotte-ah tunkot cingte a koi hi.

²⁰Ama in galkap bute, uliente, mipite a uhte le gam sung mi zosie a zawpi a, tuale amate in TOPA’ biehinn panin tunkot tungnung zui-in kumpipa a peipisuh uhi. Amate in kumpi topha tungah kumpipa a tosah uhi.

²¹Tuaci’n namsau tawh Athaliah a kitha zaw ciengin gam sung mi zosie a kipah vua, khuopi sung a dai pai hi.