Read Zou 2 KHANG TANGTHU 26 Bible Online

2 KHANG TANGTHU 26 - Zou bible

2 KHANG TANGTHU 26

¹Tua ciengin Judah mi zosie in kum sawm le guh a pha Uzziah a la vua, a pa Amaziah’ za luo dingin ama kumpi-in a koi uhi.

²Kumpipa si-in a pu a pate tawh a lupton zaw ciengin ama in Eloth lamkia-in Judah adingin a ngakia hi.

³Kumpi sep a kipatin Uzziah kum sawm le guh pha a, ama in Jerusalem-ah kum sawmnga le ni sung uh hi. Ama nu’ min Jecoliah hi a, Jerusalem-te ahi hi.

⁴A pa Amaziah’ gamtat bang lienin TOPA muna-ah ama a manin a gamta hi.

⁵Ama in ama tunga Pasien zatah ding a hil Zechariah hun sungin Pasien sui hi; tuale TOPA a sui laisie Pasien in ama lawcingsah hi.

⁶Ama kuonin Philistia-te sim a, Gath kulpi, Jabneh kulpi, Ashdod kulpite satguoi hi; ama in Ashdod gam sung le Philistia-te’ gam sung mundang tengah khuopite a lam hi.

⁷Ama in Philistia-te, Gur-baal a teng Arab-te, le Meunim-te a simna-ah Pasien in ama panpi hi.

⁸Ammon-te in Uzziah tungah sieh le kaih a puoh vua, ama a thahat mama khat a suo ziehin ama’ minthanna in Egypt gamgi cieng dong nangawn zel hi.

⁹Tham loin Uzziah in Jerusalem-a Kulning Tunkot, Kuom Tunkot, le Kiukawi-ah tausangte daw a, tuate kul tawh a im hi.

¹⁰Ama in gamlahah tausangte daw a, Shephelah le zanglei-ah ganhon a hau ziehin tuikhuh tampi to a, lei nasep a uh ziehin muoltung le leihoina gamte-ah lohlote le lenggui leibawlte a nei hi.

¹¹Tua tham loin kumpipa’ galkapmangte khat ahi Hananiah’ uhna nei-a om thuvanpi pa Jeiel le galkap bupa Maaseiah in min khumna laibu sunga mi phaza a sim uh dung zui-in, Uzziah in a pawl pawlin galsim thei galkap tampi tah nei hi.

¹²A pu a pate uh’ innkuon lutang mi thahat galhangte a phaza a unpi-in tulni le zaguh ahi hi.

¹³A uhna nei vuah kumpipa panpi ding le thahatna tawh gal do thei ding galkap tul zathum le tul sagi le zanga om hi.

¹⁴Uzziah in galkapte zosie dingin lumte, teipite, sia lukhute, sia-songkholte, thalte, se ding suongtangte guon hi.

¹⁵Ama in Jerusalem-a tausangte tung le innkiute tungah thal kap nading le suong golte se nadingin khutsiem nasemte’ bawl sette a koi hi. A thahat dongin lamdang tahin ama a kipanpi ziehin gamlapi-ah a minthanna kizel hi.

¹⁶Ahi vangin ama a thahat zaw ciengin a manthai na gau dingin a kiphatsahna a khang hi. Bang ding ahei cile TOPA a Pasien tungah ama tawnkhiel a, namtui maitam tungah biehna pie dingin TOPA’ biehinn sungah ama a lut hi.

¹⁷Hinanle siempu Azariah, a thahat TOPA’ siempu sawmgiet tawh ama’ nua a zui uhi;

¹⁸amate in kumpipa Uzziah a deh bawl vua, tuale ama kungah, “Uzziah aw, TOPA tunga biehna pieh ding pen nang pieh ding hi lo hi. Biehna pie dinga ki-apsa Aaron’ suon siempute pieh ding ahi bo hi. Mun siengtho sung panin pusuoh in; azieh pen na gamta khiel zo a, tua in TOPA Pasien tung pan nang tungah patawina ang tun sih ding hi,” a ci uhi.

¹⁹Tua ciengin Uzziah a lung a thah hi. Tu-in ama in a khutah gimnamtui beel khat tawi a, siempute tungah a lungthah laitahin gimnamtui maitam gei TOPA’ biehinn sungah siempute’ musietin a talpangah phahnatna[55] khat puoh hi.

²⁰Siempupi pa Azariah le siempu zosie in ama a et ciengun a talpangah phahnatna a vei hi. A mallang tahin a pulamah ama a peisah vua, TOPA in ama gawt zo ahi ziehin ama a pusuoh hi.

²¹A si dongin Kumpi Uzziah phah a, ama miphah ahi ziehin inn tuom khatah a teng hi. Bangzieh ahei cile TOPA’ biehinn panin ama kipuse hi. Ama’ tapa Jotham in kumpi’ inn sung vai puo-in, tua gam mite tungah zong vai a hawm hi.

²²Tu-in Uzziah’ gamtatna a omlai teng, a patna panin a tawpna dong, Amoz’ tapa kamsang Isaiah in giel hi.

²³A pu a pate tawh Uzziah lumton hi; amate in a pu a pate kunga kumpite’ neisa lopang lah hanah ama a vui uhi, azieh pen, “Ama a phah ahi hi,” a ci uhi. Ama’ tapa Jotham in ama’ za luo hi.