Read Zou 2 KHANG TANGTHU 29 Bible Online

2 KHANG TANGTHU 29 - Zou bible

2 KHANG TANGTHU 29

¹Hezekiah a maan ding a kipatin kum sawmni le nga pha hi; ama Jerusalem ah kum sawmni le kuo sung maang hi. Ama nu’ min Abijah ahi a, Zechariah’ tanu ahi hi.

²A pu David’ na bawlsa bang lienin TOPA muna-ah a manin a gamta hi.

³Ama a maan a kum khatna, a hla masa sungin ama in TOPA’ biehinn kotte hongin tua teng a puopha hi.

⁴Ama in siempute le Levi-te peipi a, nisuona lam mun awngah amate a khawm hi.

⁵Ama in amate kungah, “Levi-te aw, ka thugen ei ngai un! No le no kisiensuo unlen, na pu na pate uh’ Pasien, TOPA’ biehinn siengthosahin mun siengtho panin a niehte nawnkhie un.

⁶Azieh pen i pu i pate na citah loin TOPA i Pasien’ muna-ah na siet gamtat uhi; amate in ama na taisanin TOPA’ tenna panin a mai uh hei-in na nuangat uhi.

⁷Amate in talaap kotte zong khahin meivahte a sumit vua, Israel Pasien kung a siengtho munah gimnamtui hal loin meihal biehna a pie sih uhi.

⁸Tua ahi ziehin Judah le Jerusalem tungah TOPA’ lungthahna tung a, na mit vua na mu bangun ama in cimulthaw huoi, cizathuoi, le ehnehhuoi-in amate a bawl hi.

⁹Tami thu ziehin i pu i pate namsau-in a si zo ta vua, i tapate, i tanute, le i zite salin a om zo ta uhi.

¹⁰Tu-in eite kung panin a giinhuoi a lungthahnate a kiheimang thei nadingin ka lungsim sungah TOPA tawh thuciem khat bawl ding a om hi.

¹¹Ka tate aw, TOPA in ama’ na semin ama opna-ah a ding ding, le ama kungah biehnate a pie dingin note ang teel zo tah ziehin tu-in tami thu nelsie bawl sih un,” a ci hi.

¹²Tua ciengin Levi-te, Kohath’ suonte sung panin Amasiah’ tapa Mahath, le Azariah’ tapa Joel; Merari’ suonte sung panin Abdi’ tapa Kish, le Jehallelel’ tapa Azariah; Gershon’ suonte sung panin Zimmah’ tapa Joah, le Joah’ tapa Eden;

¹³le Elizaphan’ suonte sung panin Shimri le Jeuel; Asaph’ suonte sung panin Zechariah le Mattaniah;

¹⁴Heman’ suonte sung panin Jehiel le Shimei; Jeduthun’ suonte sung panin Shemaiah le Uzziel-te a kipan uhi.

¹⁵Amate in a sanggamte uh khawmin a kisiensuotawm vua, TOPA’ kammal tawh kumpipa thupieh bangin TOPA’ biehinn puosieng dingin a lut uhi.

¹⁶A puosieng dingin TOPA’ biehinn sungtawngah siempute a lut vua, TOPA’ biehinnpi sunga a mu uh a nieh teng zosie TOPA’ biehinn tuolah peipi uhi; tuale Levi-te in tuate la-in Kidron Lui-ah a buo uhi.

¹⁷Amate in a hla masa a ni masa ni-in siensuo ding kipanin tua hla a ni giet ni-in TOPA’ talaap-ah a pei uhi; tua ciengin amate in ni giet sung TOPA’ biehinn a siensuo vua, a hla masa a ni sawm le guh ni-in a zo sieng uhi.

¹⁸Tua ciengin Kumpi Hezekiah kungah tumin, “TOPA’ biehinn zosie, mei halna maitam le vanzah zosie, le anlum guolte koina sabuoi le vanzah zosie ka puosieng zo uhi.

¹⁹Kumpi Ahaz in kumpi a sep lai-in a citah lona ziehin ama in a na paimang vanzah zosie siensuo-in a baisa-in ka bawl zo uhi; en in, TOPA’ mai-ah tuate a om hi,” a ci uhi.

²⁰Tua ciengin Kumpi Hezekiah thobai a, khuopi-a uliente khawmin, TOPA’ biehinn ah a peito uhi.

²¹Amate in kumpi gam, mun siengtho mun le Judah gam adingin mawna zieha biehna dingin bawngtang sagi, tuutang sagi, tuuno sagi, le keel sagi a kai uhi. Ama in TOPA’ maitam tungah tuate a pie dingin Aaron’ suon siempute thu a pie hi.

²²Tuaci’n bawngtangte a go vua, siempute in a si la-in maitam tungah a the uhi; amate in tuutangte a go vua, a si tawh maitam a the uhi; amate in tuunote zong go-in a si tawh maitam a the uhi.

²³Tua ciengin mawna zieha biehna dingin kumpipa le a kikhawmte kungah keeltang sagi kikai hi; amate in tuate tungah a khut a ngam uhi.

²⁴Tuale Israel zosie ading thoidamna bawl nadingin, siempute in tuate a go vua, tuate’ sisan tawh maitam tungah mawna zieha biehna a pie uhi. Bang ding ahei cile Israel zosie adingin meihal biehna le mawna zieha biehna a bawl ding uh kumpipa in thu a pie hi.

²⁵David le kumpipa’ thumu pa Gad le kamsang Nathan’ thupiehna tawh kizui-in TOPA’ biehinn sungah ama in daltuote, harp-te, le lyre-te tum dingin Levi-te koi hi. Bangzieh ahei cile tuami thupiehna pen a kamsangte tungtawnin TOPA tung pana ang pei ahi hi.

²⁶David’ tumgingte tawh Levi-te a ding vua, tuale pengkulte tawh siempute a ding uhi.

²⁷Tua ciengin Hezekiah in maitam tungah meihal biehna a kipieh nadingin thu a pie hi. Meihal biehna a kipat ciengin TOPA tungah lasahna zong kipan pai a, Israel kumpi David’ lasahnate in pengkulte a zawp hi.

²⁸A kikhawm mi buppi in Pasien a bie vua, lasate in la sa-in, pengkul tumte in a tum uhi; meihal biehna a man masangsie tam teng zosie a kizomin a bawl uhi.

²⁹Biehnate a man zaw ciengin kumpipa le ama kunga a om zosie kunin Pasien a bie uhi.

³⁰David’ thugente le thumu pa Asaph’ thugente tawh TOPA tungah phatna la a sah nadingun Hezekiah kumpipa le uliente in Levi-te thu a pie uhi. Lungdamna tawh amate in phatna late a sa vua, amate kunin Pasien a bie uhi.

³¹Tua ciengin Hezekiah in, “Tu-in TOPA tungah noma ma na kisiensuo zo uhi; keima ei nai unlen TOPA’ biehinn-ah biehpiehnate le lungdamkona biehnate hing peipi un,” a ci hi. A kikhawmte in zong biehpiehnate le lungdamko biehnate a peipi uhi; tuale piehnopna lungsim a nei zosie in meihal biehnate a peipi uhi.

³²A kikhawmte in a peipi meihal biehna phaza pen bawngtang sawm sagi, tuutang zakhat, le tuuno zani ahi a, tamte zosie pen TOPA tunga meihal biehna ahi hi.

³³A kisiensuo biehnate bawngtang zaguh le tuu tulthum ahi hi.

³⁴Hinanle siempute a tawm ziehun meihal biehna zosie a vun a hawh sieng zo sih vua, tuaci’n siempu dangte a kisiensuo masang sung teng, nasep a kizaw masangin a sanggamte uh Levi-te in amate hu uhi. Bangzieh ahei cile amau le amau a kisiensuona vuah siempute sangin Levi-te a lungsim uh dihzaw[59] hi.

³⁵Meihal biehna tampite banah thunuom biehna thaute, le meihal biehnate adingin dawn thei biehnate a om hi. Tua bangin TOPA’ biehinn sungah nasepna ki-omsahkia hi.

³⁶Mite adinga Pasien in a bawlpieh thute ziehin Hezekiah le mi zosie a kipah uhi; azieh pen tua thu thakhata a piengvat ahi hi.