Read Zou 2 KHANG TANGTHU 3 Bible Online

2 KHANG TANGTHU 3 - Zou bible

2 KHANG TANGTHU 3

¹Solomon in Jerusalem khuopi sunga Moriah Muol tung, a pa David kungah TOPA a na kihilna mun, David in a na senasa mun, Jebus-te Ornan’ ancilna phuolah TOPA’ biehinn lam kipan hi.

²Ama a maan zaw a kum lina, a hla nina, a ni nina sungin lam ding a kipan hi.

³Tam teng pen Pasien’ biehinn lamna dinga Solomon’ tena[6] ahi hi: sil tena lui tawh a kite leh adung tong sawmguh, avai tong sawmni ahi hi.

⁴Biehinn laikim mai-a om talaap pen biehinn[7] vailam tawh kikimin tong sawmni sau a, a sanna tong za le sawmni pha hi; ama in a sunglam teng kham citah tawh zut hi.

⁵Ama in taasing tawh biehinn laikim teng dapin tuate kham hoi tawh tuom a, tua tungah tumsing le khainieng lim a kheng hi.

⁶Ama in suongmanpha guolte tawh a inn zem hi. A khamte pen Parvaim pana kham ahi hi.

⁷Tuaci’n ama in a inn, a innkam, a sangkilte, a kawmte, le a kotkhahte kham tawh dap hi; tuale ama in a kawmte tungah cherub-te a kheng hi.

⁸Ama in siengtho pen mun bawl hi; adung pen a inn vailam tawh a kibangin tong sawm ni hi a, avai pen tong sawmni ma ahi hi; ama in tua pen kham hoi talent zaguh tawh zut hi.

⁹A kilnate a gihna kham shekel sawmnga ahi hi. Ama in kham tawh innkhan tungnungte zut hi.

¹⁰Ama in siengtho pen mun sungah a kikheng cherub ni bawlin kham tawh tuate a zut[8] hi.

¹¹Cherub gel’ hla a kizah ciengin tong sawmni sau hi: a khat’ hla langkhat tong nga ahi a, tua in inn kawm ban a, a hla langkhat zong tong nga ma ahi a, tua in adang cherub’ hla langkhat ban hi.

¹²A cherub dang khat’ hla langkhat tong nga sau a, tua in inn kawm banin tong nga ma a sau a hla langkhat pen a cherub masa’ hla tawh kimat hi.

¹³Tam cherub-te’[9] hla in tong sawmni huom a, tua cherub-te a kephang utawh dingin innpi sunglam a kinga uhi.

¹⁴Solomon[10] in puon a dum, a ausan, a sandup, le saihadiel puon tawh dalna puon bawl a, tua tungah cherub-te a bawl hi.

¹⁵Ama in inn mai-ah tong sawmthum le tong nga a sang, a dawn tuohah tong nga a pha khuom luzepna a nei khuompi ni a bawl hi.

¹⁶Ama in khigui[11] bangin khainieng bawlin khuomte dawnah tuate khai hi; tuale ama in mang kawlsing lim zakhat bawlin khainiengte tungah tuate koi hi.

¹⁷Ama in biehinnpi mai-ah tua khuompite, khat a veilam, a khat a zietlamah phut hi; ama in ziet lama pen Jachin ci a, vei lama pen Boaz ci-in minvaw hi.