Read Zou 2 KHANG TANGTHU 30 Bible Online

2 KHANG TANGTHU 30 - Zou bible

2 KHANG TANGTHU 30

¹Hezekiah in Israel mi zosie le Judah tungah Jerusalem-a TOPA’ biehinn ah Israel Pasien, TOPA’ peisan pawi a bawl dinga a pei nadingun amate vaihlah a, Ephraim le Manasseh tungah zong laihlahte giel hi.

²Azieh pen kumpipa le a uliente le Jerusalem-a om a kikhawm zosie in a hla nina sungin peisan pawi bawl ding a kikum zo uhi.

³(Azieh pen siempute mi a kicingza ding kisiensuo zo nai loin Jerusalem ah mite kikhawm nai lo ahi ziehin amate in a hun lienin pawi a bawl thei sih uhi.)

⁴Tua gelna pen kumpipa le a kikhawm zosie adingin man le kilawm hi.

⁵Tuaci’n mite pei-in Israel Pasien, TOPA adingin peisan pawi a bawl nadingun Beer-sheba panin Dan cieng dong Israel gam buppi ah tangtawhna khat nei dingin a khensat uhi; azieh pen amate in bawl dinga a kigen bangin a bawl lo uh sawtveipi ahi ta hi.

⁶Tuaci’n kumpipa thupiehsa bangin laitaite in kumpipa le a uliente tung pana laihlahte tawh Israel le Judah gam zosie-ah pei kawikawi-in, “Israel mite aw, Assyria kumpite’ khut sung panin a omlai a suohta sun teng kungah ama a kiheikia thei nadingin, Abraham, Isaac, le Israel Pasien, TOPA lamah kilekia un.

⁷Na mu uh bangin TOPA Pasien tungah a pu le pate uh a citah lona ziehun sietna a tunsah na pu na pate ule na sanggamte uh bang sih un.

⁸Tu-in na pu na pate bangin ngawngkhau sih unlen, no kung panin a zauhuoi ama’ lungthahna a kiheidawh thei nadingin TOPA tungah no le no kipumpieh zaw unlen, kumtawn adinga a siensuosa ama’ mun siengtho-ah pei-in TOPA na Pasien uh’ na sem un.

⁹Bangzieh ahei cile TOPA lamah na kilekia uleh, na sanggamte ule na tate un amate sala a man mite tung panin khuotuona mu-in, tami gamah ang peikia ding uhi. Azieh pen TOPA na Pasien ukhu mi khuotuo siempa le mi hepi siempa ahi a, ama kungah na kilekia uleh ama in note a mai ang heisan sih ding hi,” a ci uhi.

¹⁰Tuaci’n Ephraim le Manasseh gam sung khuopi khat pan khuopi khat, Zebulun cieng dong laitaite a pei uhi; ahi vangin amate in na nuisanin na zapi a, zong na simmawbawl uhi.

¹¹Jerusalem ah Asher, Manasseh, le Zebulun mi halkhat beh kiniemkhiehin a pei uhi.

¹²TOPA’ thupiehna bangin kumpipa le uliente’ sawlna sem dingin Pasien in Judah tungah lungsim kihuolna guon hi.

¹³A hla nina sungin tol saw lo anlum pawi bawl dingin Jerusalem ah mi tampi a kikhawm vua, tuaci’n a kikhawm mihon a tam mama hi.

¹⁴Amate nasep a kipan vua, Jerusalem-a maitamte hemdawhin gimnamtui halna maitam zosie zong a ladawh vua, Kidron Lui-ah a paimang uhi.

¹⁵A hla nina a ni sawm le li ni-in peisan pawi tuuno a go uhi. Siempute le Levi-te a maizum vua, amate kisiensuo-in TOPA’ biehinn sungah meihal biehnate a peipi uhi.

¹⁶Amate in Pasien’ mipa Moses thukham tawh kizui-in a panmun ngai teng uh a la uhi; siempute in Levi-te’ khut tung pana a nga[60] uh sisan a the uhi.

¹⁷Azieh pen a kisiensuo lo mi tampi a om uhi; tua ahi ziehin TOPA tungah amate a siengtho-a a kibawl nadingin, a siengtho lo mi zosie adingin Levi-te in peisan tuuno a gaw ding uh kisam hi.

¹⁸Azieh pen Ephraim, Manasseh, Issachar, le Zebulun mihon tampite sung pan mi tampitah a kisiensuo sih vangun a ngaina lopi-in peisan pawi an a ne uhi. Ahi vangin Hezekiah in amate thu a ngetpieh a, “A hoi TOPA aw,

¹⁹mun siengtho siensuona ngaina tawh a kituo sih vangin lungsimtahpi tawh a pu a pate uh’ Pasien TOPA a sui mite’ mawna ngaidam in,” a ci hi.

²⁰TOPA in Hezekiah’ thungetna za-in mite a damsah hi.

²¹Jerusalem-a om Israel mite in lungdamna lienpi tawh ni sagi sung tol saw lo anlum pawi a bawl uhi; tuale Levi-te le siempute in TOPA adingin a ngaih mama tumtheite tawh kopin a ni ni-in TOPA a phat uhi.

²²Hezekiah in TOPA’ nasepna-ah a siemna uh a lah thei Levi-te zosie tungah hanthotna thu a gen hi. Tuaci’n mite in ni sagi sung pawi an ne-in thunuom biehpiehnate a pie vua, a pu a pate uh’ Pasien, TOPA tungah lungdam a ko uhi.

²³Tua ciengin a kikhawm buppi in adang ni sagi sung ma pawi bawlbe dingin a kihotawh uhi; tuaci’n adang ni sagi sung ma lungdam tahin a bawlbe uhi.

²⁴Bangzieh ahei cile a kikhawmte tungah Judah Kumpipa Hezekiah in biehna dingin bawngtang tulkhat le tuu tul sagi a pie hi. Siempute tampitah amau le amau a kisiensuo uhi.

²⁵Judah mi a kikhawm buppi, siempute le Levi-te, le Israel gam pana a pei a kikhawm buppi, Israel gam pana a pei pemtate, le Judah gam sunga a teng pemtate lungdam uhi.

²⁶Jerusalem khuopi sungah Israel kumpi David’ tapa Solomon huna kipanin tam bang om ngai nai lo ahi ziehin Jerusalem-ah lungdamna lienpi a om hi.

²⁷Tua ciengin siempute le Levi-te dingto-in mite thupha a pie vua, tuale amau’ awging a kiza hi; A thungetna un vantunga a siengtho ama’ tenna a tung hi.