Read Zou 2 KHANG TANGTHU 5 Bible Online

2 KHANG TANGTHU 5 - Zou bible

2 KHANG TANGTHU 5

¹Tua ahi ziehin Solomon in TOPA’ biehinn ading nasep zosie a man sieng hi. A pa David in a apsa nate Solomon in peipi-in, ngun, kham, le vanzah zosie Pasien’ biehinn sung vanmanpha koinate sungah koi hi.

²Tua ciengin Solomon in Zion a kici David’ khuopi panin TOPA’ thuciemna singkuong a puoto dingin Jerusalem ah Israel upate, minam lutangte, le Israel minam pupa innkuon makai zosie a kikhawmsah hi.

³Hla sagina sunga pawi bawl hunin Israel-te zosie kumpipa mai-ah a kikhawm uhi.

⁴Israel upa zosie pei-in Levi-te in tua singkuong a puo uhi.

⁵Tuaci’n amate in singkuong, kikhopna puonbuh, le puonbuh sunga vanzah siengtho zosie a puoto uhi; siempute le Levi-te in tuate a puoto uhi.

⁶Singkuong mai-ah kumpi Solomon le a mai-a kikhawm Israel zosie in biehpiehna-in tuu le bawngtangte tam pieh seng uh ahi ziehin tuate a phaza kisim zo lo hi.

⁷Tua ciengin cherub-te’ hla nei, biehinn sungnung mun siengtho penah siempute in TOPA’ thuciemna singkuong a peipi uhi.

⁸Cherub-te in singkuong tungah a hlate uh a zah ziehin tua cherub-te pen singkuong le a zawlte tunga a khuna khat a suoh hi.

⁹A zawlte sau mama a, mun siengtho sungnung mai panin zawl mongte kimu thei hi; hizongle a pulam panin kimu thei lo hi; tuni dongin tua munah tuate a omlai hi.

¹⁰Egypt panin a peikhiet zaw uh TOPA in Israel mite tawh thuciemna[13] a bawlna mun Horeb ah Moses in suongpeh ni a koi ci simlo, singkuong sungah bangma dang om lo hi.

¹¹Tu-in a siengtho mun panin siem-pute pusuohin (azieh pen amau’ pawlte ci om tuon loin tua taha om siempute zosie a unpi-un a kisiensuo vua),

¹²Levi lasate Asaph, Hemen, le Jeduthun, a tapate ule a tanaute uh, saihadiel puon tawh kivonin, daltuote, harp te, le lyre lasahnate tawi-in pengkul tum siempute za le sawmni tawh maitam nisuona lamah a ding uhi.

¹³TOPA tungah aw kikhatin phatna le lungdam ko ding pen pengkul tumte le lasate’ mawpuoh ahi hi. Pengkulte, daltuote, le adang lasahnate tawh TOPA phat nadingin, “Azieh pen TOPA hoi a, ama’ itna kip tawntung hi,” ci-in la kisa a, tuaci’n TOPA’ biehinn sung meii tawh kidim a,

¹⁴meii a kai ziehin siempute in na a sem zo sih uhi; bangzieh ahei cile TOPA’ minthanna a vangtang Pasien’ biehinn sung a dim hi.