Read Zou 2 KHANG TANGTHU 6 Bible Online

2 KHANG TANGTHU 6 - Zou bible

2 KHANG TANGTHU 6

¹Tua ciengin Solomon in, “TOPA in khuomiel tawkhal lahah ka teng ding hi, ci hi.

²Keima in na ten zing nadingin a thupi biehinn khat nang adingin ka lam zo hi,” a ci hi.

³Tua ciengin kumpipa kinua hei-in, a kikhawm Israel mi zosie a din laitahun ama in a kikhawm Israel mi zosie thupha a pie hi.

⁴Ama in, “Ka pa David tungah a kam tawh a ciemsa a khut tawh a tangtungsah Israel Pasien in minthanna nga ta hinlen,

⁵‘Egypt gam pan ka mite ka peipi ni-a kipanin tua sungah ka min a op thei nadinga a sunga biehinn lam nadingin Israel minamte khat popo panin khuopi khatpo ka teel sih a, ka mi Israel tunga uhpa dingin koima khat zong ka teel sih hi;

⁶hizongle keima in khum sungah ka min a op thei nadingin Jerusalem ka teel zo ta a, ka mi Israel tunga uhpa dingin David ka teel zo ta hi,’ a ci hi.

⁷Israel Pasien TOPA’ min dingin biehinn khat lam ding ka pa David’ lungsim sungah a om hi.

⁸Hinanle TOPA in ka pa David kungah, “Keima’ min dingin biehinn khat lam dinga na ngaisut pen hoi mama hi;

⁹hinanle nang in biehinn na lam sih ding a, na sung pana ang pieng ding na tapa in ka min dingin biehinn a lamzaw ding hi,’ a ci hi.

¹⁰“Tu-in TOPA in a bawlsa ama’ thuciemna a tangtungsah zo hi; azieh pen TOPA’ thuciem bangin ka pa David za luo-in Israel kumpi topha tungah ka to a, Israel Pasien, TOPA’ min dingin biehinn ka lam zo hi.

¹¹Israel mite tawh a bawl TOPA’ thuciemna singkuong tua munah ka koi zo hi,” a ci hi.

¹²Tua ciengin a kikhawm Israel mi zosie’ opna TOPA’ maitam mai-ah Solomon[14] dingin a khut a zah hi.

¹³Solomon in adung tong nga, avai tong nga, a sanna tong thum a pha thugenna sumngo tau khat bawlin leituolah koi zo hi; tuale ama tua tungah a ding hi. Tua ciengin a kikhawm Israel mi vannuoi muna-ah khupdinin a khut gel van lamah a zah hi.

¹⁴Ama in, “Israel Pasien, TOPA aw, thuciemna zui-in a lungsim zosie utawh nangma’ thu ang mang na nasemte tungah itna kip a lah nang bang Pasien dang vantungah hile, leitungah hile a om sih hi.

¹⁵Na nasempa ka pa David tunga na khapsa a tungsah pa na hi hi. Na kam tawh thu na gen a, na khut tawh tuni-in na tangtungsah tahtah hi.

¹⁶Tua ahi ziehin Israel Pasien TOPA aw, ama tungah thu ciemin, ‘Nang in ka thu na man bangin na suonlehlahte in ka thukham sungah kalsuon in a gamtat a kidop nah uleh ka mai-a Israel kumpi topha tungah a to ding mi khat zong na kitasam sih ding hi,’ na cisa bangin na nasempa ka pa David tunga na thuciemsa hing sudet in.

¹⁷Tua ahi ziehin Israel Pasien TOPA aw, na nasempa David tunga na ciemsa kammal hing kipsah in.

¹⁸“Ahi vangin leitungah mihing tawh Pasien ang tengton tahtah ding amah? Vantung le a sangpen vantung nangawnin nang ang dawl sih hi. Tami keima lamsa biehinn bang a ci neu ta zang diei!

¹⁹Na nasempa’ thumna le tauna thudon inlen, TOPA ka Pasien aw, nangma mai-a nasempa ang kikona le ang thungetna ngaipieh in.

²⁰Na nasempa in tami mun lam nga-in ang thumna na zah thei nadingin na min a opna dinga na ciemsa mun tami biehinn lam sun le zanin ei en in.

²¹Amate in tami mun lam nga-in thu ang nget ciengun na nasempa le na mi Israel’ ang thumna ngai in; na tenna van panin ei za inlen, na zah ciengin ei ngaidam in.

²²“Mi khat a vengte tungah a maw ziehin a kiciem ding a poimaw a, ama pei-in tami biehinn sung na maitam mai-ah ang kiciem leh,

²³nangma in van panin hing za-in hing sem inlen, nangma’ nasemte thukhenin a khielte a gamtatna bangun amau’ luzang ma-ah tusahin hing thuh inlen, a thumante zong amau’ thumanna tawh kizui-in thaman piehna tawh kilangsah pai in.

²⁴“Nangma tungah na mi Israel ang maw ziehin a galte mai-ah guol lelin, ahi vangin amate na kungah hing kihei kia-in, na min hing phawhin tami biehinn sungah thumna le tauna ang nei ciengun,

²⁵nangma in van panin za inlen, na mi Israel’ mawna ngaidamin, amate le a pu a pate na piehsa leitangah amate peipikia in.

²⁶“Na tungah ang maw ziehun vantung kikha cipin guo a zuh lo hun, amate na gawt hun ciengin tami mun lam nga-in thu ngenin, na min hing phawhin a mawna uh panin a kihei uleh,

²⁷amau’ zui ding lampi hoi na hil ciengin van panin za-in na nasem, na mi Israel’ mawna ngaidam in; tuale na mite tungah gou-a na piehsa na gam sungah guo zusah in.

²⁸“Gam sungah kiel ang tun a, pul natna, ankung natna, ankung maibuoh na, kauphe ahi sihle pangangte ang omin; a galte un a tenna khuopi uh khat penpenah imtawmin, bangbang gimna, bangbang natna ang tun leh;

²⁹mimal khat in ahi a, na mi Israel zosie in ahi zongin a natna ule a dana ciet uh thei-in tami biehinn lamah a khut uh zahin bangbang thungetna ahi a, bangbang thumna ahi zongin ang bawl uleh;

³⁰na tenna van panin za-in ngaidam inlen, amau’ gamtatna tawh kizui-in nangma in a lungsim uh na thei bangin bawlpieh in, azieh pen nangma beh in mihing’ lungsim na thei hi.

³¹Tam bang hileh amate in ka pu ka pate uh tunga na piehsa leitang tungah a ten sung tungtawnun nangma hing zatahin na thu ang zui ding uhi.

³²“Tua ma bangin mun gamlapi panin na mi Israel ahi lo gamdang mite hing pei-in, a lien mama na min, na khut thahat le a kizah na ban ziehin tami biehinn lam nga-in thu ang nget ciengun,

³³nangma in na tenna van panin hing za-in na kungah tua gamdang mite in ang nget popo bawlpieh in. Tua hile na mi Israel ma bangin leitung mi zosie in na min thei-in ang ging ding vua, amate in keima lamsa tami biehinn zong nangma’ min tawh kilo ahina ang thei ding uhi.

³⁴“Galte sim dingin na mite kuon khie-in, bang lam bang lamah sawl ta lateh, nangma teelsa tami khuopi, le na min tawh ka lamsa tami biehinn lam nga-in amate in thu ang nget uleh,

³⁵van panin amau’ thungetna le thumna za-in amau’ vai panpi in.

³⁶“Mihing a maw lo koima a op lo ziehin, amate na tungah ang maw vua, amate tungah nang lungthahin galte khut sungah amate pie-in, a gamla-ah hile a nai-ah hile amate galmatin kikai-in;

³⁷tua ciengin a kimatna gam sungah kisiakia a, ‘Kote maw-in ka gamta khiel zo ta uhi; ka gitlo tat ta uhi,’ ci-in na kungah ang thum uleh;

³⁸amate in galmat-a a opna uh leitangah a lungsim zosie ule a tahsa zosie utawh kisiakia-in, na teelsa khuopi le na min tawh ka lamsa biehinn, nangma in a pu a pate uh tunga na piehsa ahi a leitang lam uh nga-in thu ang nget uleh,

³⁹na tenna van panin amau’ thungetna le ang thumnate uh za inlen, a vai uzong panpi-in na tunga ang maw na mite ngaidam in.

⁴⁰“Ka Pasien aw, tu-in na mit hahsah inlen, tami mun pana thungetna na bil ei ngat in.

⁴¹“Tu-in dingto-in, TOPA Pasien aw, na khawlna ding munah nang le na thahatna singkuong tawh pei in. TOPA Pasien aw, na siempute hutdamna puon tawh kivon uh hinlen, na hoina-ah na thuman mite kipah uheh.

⁴²TOPA Pasien aw, na sathau nu pa nuol sin. Na nasempa David tunga na itna kip khu phawh gige in,” a ci hi.