Read Zou 2 KHANG TANGTHU 7 Bible Online

2 KHANG TANGTHU 7 - Zou bible

2 KHANG TANGTHU 7

¹Solomon a thunget a man ciengin vantung panin meikuong peisuhin meihal biehna le biehpiehnate katum hi; tuale biehinnpi sungah TOPA’ minthanna vang a dim hi.

²TOPA’ biehinn sungah TOPA’ minthanna a dim ziehin TOPA’ biehinn sungah siempute a lut thei sih uhi.

³Israel mite zosie in meikuong ang kumsuh le TOPA’ minthanna biehinn tung sontah ah a op a mu ciengun suongpha tungah lei lam nga-in a kunsuh vua, tuaci’n Pasien bie-in TOPA tungah lungdam a ko vua, “Ama hoi hi, azieh pen ama itna kip tawntung hi,” a ci uhi.

⁴Tua ciengin TOPA mai-ah kumpipa le mi zosie in biehpiehna a pie uhi.

⁵Kumpi Solomon in biehpiehna dingin bawngtang tul sawmni le tulni, le tuu tul zakhat le tul sawmni a pie hi. Tuaci’n kumpipa le mi zosie in Pasien’ biehinn a ap uhi.

⁶Siempute amau’ mun cietah a ding uhi; Levi-te zong, Kumpi David in TOPA tungah lungdam ko nadinga a bawl TOPA tunga tum thei vante tawh a ding uhi. Azieh pen ama’ itna kip tawntung hi. David in amau’ nasepnate tawh phatnate a pieh sielin tua bangin a bawl uhi. Amate tawh kigalsai-in siempute in pengkul a mut uhi; tuale Israel mi zosie a ding uhi.

⁷Solomon in TOPA’ biehinn mai-a om leituol laikim siensuo hi; bang ding ahei cile Solomon in a bawl sumngo maitam ah meihal biehna, le an tawh biehna le a thau pawlkhat ta lo ahi ziehin tua munah ama in meihal biehnate le thunuom biehna thaute a pie hi.

⁸Khum hun laitahin Solomon in ni sagi sung pawi bawl a, Israel zosie ama tawh om tonin, a kikhawm mihon tampite, Lebo-hamath panin Egypt Lui cieng dong a dim uhi.

⁹Amate in a ni giet ni-in kikhopna thupi khat a nei uhi; azieh pen amate in maitam apna ni sagi sung a zang vua, pawi ni sagi sung a bawl uhi.

¹⁰A hla sagina a ni sawmni le thumna ni-in, TOPA in David le Solomon, le ama’ mi Israel tungah a hoina a lah ziehin, ama in lungdamna le kipahna tawh mipite a peisah hi.

¹¹Tua bangin Solomon in TOPA’ biehinn le kumpi inn lam man sieng hi; Solomon in TOPA’ biehinn sung le ama’ inn sungah sep dinga a gel zosie lawcing tahin a man sieng hi.

¹²Tua ciengin zan lai-in Solomon kungah TOPA kilah a, ama kungah, “Na thungetna ka za zo ta a, keima’ biehpiehna inn dingin tami mun ka teel zo hi.

¹³Keima in guo a zuh lo nadingin van kot ka kha cieng hile leitang netum dinga kauphe thu ka pieh cieng hile ka mite lahah natna ka tunsah cieng hile,

¹⁴keima’ min tawh a kilo ka mite, amahaw mama ang kiniemkhiehin, thu ngenin ka mai ang sui vua, a gitlo gamtatnate panun ang kihei uleh, keima in vantung panin za-in a mawna uh maisahin a gam uh ka damsah ding hi.

¹⁵Tu-in mit hahin tam muna kingen thungetna ka bil ka ngat ding hi.

¹⁶Bangzieh ahei cile tu-in khum munah a tawntungin ka min a op thei nadingin tami biehinn teelin ka siensuo zo ta hi; khum munah ka mit le ka lungsim a om zing ding hi.

¹⁷Nang adingin ahile na pa David gamtat bangin keima mai-ah na gamtat a, kang sawl zosie bangin semin, ka thukhamte le ka biehna ngaina kipte na zui leh,

¹⁸na pa David tawh kiciemin, ‘Israel a uh ding mi na kitasam ngai sih ding hi,’ ka na ci ma bangin na kumpi topha kang kipsah ding hi.

¹⁹Ahi vangin note kihei-in na mai-a ka koi ka thukhamte le ka thupiehnate nuasie-in, note pei-in pasien dangte’ na semin tuate na bieh uleh,

²⁰keima in note[15] kang piehsa leitang panin note[16] kang botzuon ding hi; tuale ka min dinga ka siensuosa tami biehinn zong ka muna panin sepmangin mi zosie lahah paunah le thugentena ka suohsah ding hi.

²¹Tu-a a kitawisang tami biehinn tawh kisai-in, a gei a nawhkha poma in lamdangsa-in, ‘Bang dinga TOPA in tam gam le tam biehinn a ci bawl a ta diei?’ ci ding uhi.

²²Tua ciengin amate in, ‘Bangzieh ahei cile amate in Egypt gam pana a peipi a pu a pate uh’ Pasien TOPA a nuasie vua, pasien dangte pomin, tuate bie-in a na a sem uhi; tua ahi ziehin ama in amate tungah tam sietna zosie a tungsah hi,’ ci ding uhi,” a ci hi.