Read Zou 2 KHANG TANGTHU 8 Bible Online

2 KHANG TANGTHU 8 - Zou bible

2 KHANG TANGTHU 8

¹Solomon in TOPA’ biehinn le ama’ inn a lam zaw kum sawmni a cin ciengin,

²Huram in ama tunga a pieh khuopite Solomon in lamkia a, tuate sungah Israel mite tengsah hi.

³Hamath-zobah ah Solomon pei-in tua gam a la hi.

⁴Ama in senel gam sungah Tadmor khuo sat a, Hamath gam sungah vankholna khuopi zosie a lam hi.

⁵Ama in kul tawh ki-im khuopite, tunkotte, le kotgolte a nei Beth-horon Tungnung le Beth-horon Neinung zong lam a,

⁶Baalath le Solomon’ vankholna khuopi zosie zong, a leengte koina khuopi zosie, a sakol galkapte ading khuopite, le Solomon in Jerusalem, Lebanon, le ama uhna gam sung zosie-ah a lam nop zosie a lam hi.

⁷Israel ahi lo Hit-te, Amor-te, Periz-te, Hiv-te, le Jebus-te sung pan a omlai teng,

⁸Israel mite in a suhsiet nai lo amau’ suonlehlahte sung panin tua gam sunga a omlai teng- tam teng pen Solomon in thona-aana sem dinga a khon mite ahi vua, tua bangin amate tuni dongin a om uhi.

⁹Hinanle Solomon in a nasepna-ah Israel mite salin bawl lo hi; amate pen galkapte, le ama nei-a uliente, a leeng galkap makaite, le a sakol galkap makaite ahi uhi.

¹⁰Tam teng pen mite tunga aana a zang Kumpi Solomon’ ulien zani le sawmnga-te ahi uhi.

¹¹Solomon in David’ khuopi panin ama adinga a lam inn ah Pharaoh’ tanu peipi hi, azieh pen ama in, “TOPA’ singkuong a tunnasa munte a siengtho ahi ziehin Israel Kumpi David’ inn sungah ka zi teng thei lo ding hi,” a ci hi.

¹²Tua ciengin ama in talaap mai-a a lam TOPA’ maitam tungah Solomon in TOPA tungah meihal biehnate a pie hi.

¹³Moses’ thupiehna tawh kizui-in sabbath nite, hladet nite, kum sima kibawl pawi thumte- tol kisaw lo anlum pawi, nipikal pawi, buh pawite le nisima a kisam bangin TOPA tungah biehpiehnate a pie hi.

¹⁴Ama in a pa David’ biehna ngaina kip tawh kizui-in amau’ sep nading munah siempute a pawlpawlin se a, nisim nasepna-ah a kisam bangin Levi-te phatna lasah nasep le a tuonvai nasep a sem dingin siempute tawh kithuosah a, ama in kotpi tuomtuomte dingin kotcingte amau’ pawl kikhenna cietah se hi; azieh pen tua bangin David in Pasien’ mipa thu a pie hi.

¹⁵Levi-te le siempute in thu khat popo le vanmanphate koina tawh kisai-in kumpipa thupiehna panin a lam piel sih uhi.

¹⁶Tua bangin TOPA’ biehinn bulpi a kiphu ni-a kipanin TOPA’ biehinnpi a kiman sieng dongin Solomon’ nasep ding zosie kiman sieng hi.

¹⁷Tua ciengin Solomon in Edom gam sung tuipi gei-a om Ezion-geber le Eloth-te a va pha ta hi.

¹⁸Huram in ama kungah a tembawte le tuipi thu a thei a nasemte a sawl hi. Solomon’ nasemte tawh Ophir ah amate a zawhton vua, khum panin kham talent zali le sawmnga puo-in Kumpi Solomon kung a tunpi uhi.