Read Zou 2 KHANG TANGTHU 9 Bible Online

2 KHANG TANGTHU 9 - Zou bible

2 KHANG TANGTHU 9

¹Sheba kumpinu in Solomon’ minthan na a zah ciengin thudawhna hamsate tawh Solomon zelah dingin Jerusalem ah haw a, ama in nuazui honpi le a namtui nate, kham tampi le suongmanpha a puo kalaohte a keng hi. Solomon kungah ama nu a tun ciengin a lungsim sunga om zosie ama tawh a kikum hi.

²Solomon in tua nu thudawh zosie a dawng hi; tua nu kungah Solomon in a gencien thei lo hahsa luo a sah thu bangma om lo hi.

³Sheba kumpinu in Solomon’ pilna, a lamsa a inn a lo,

⁴a sabuoi-a kilui neh le tahte, vaihawm uliente’ tona, le a nasemte’ kep le khoi dan, a puonsil a nihtente uh, a an piete, le TOPA’ inn sunga a meihal biehnate[17] a mu ciengin, tua nu ciza lia-in a hla tawh zong a teng nawn va-ia sih hi.

⁵Tuaci’n tua nu in kumpipa kungah, “Ka gam sung pana ka zah na sepnate le na pilna ang kigente a man vive ahi a,

⁶ahi vangin keima hing pei-in ka mit in a mu masangsie a kigen thute[18] ka tahsang sih hi. Na pilna a lietzie alang nangawn zong ka kungah ang kigen nai sih hi; ka thuzahte sangin na thupizaw tham hi.

⁷Na mite mi nuomsa ahi uhi! Nang ang khoi zing a, na pilna thu a za zing na nasemte zong mi nuomsa ahi uhi!

⁸Na tungah lungkimin, TOPA na Pasien adingin kumpi dinga ama’ kumpi topha tunga ang tosah TOPA na Pasien in thupha nga taheh! Na Pasien in Israel it a, a tawntungin amate kipsah ding ahi ziehin, thutang le thuman na sep thei nadingin ama in amate tungah nang kumpi ang suohsah hi,” a ci hi.

⁹Tua ciengin tua nu in kumpipa tungah kham talent za le sawmni, le gimnamtui tampitah le suong manphate a pie hi: Solomon kumpipa tunga Sheba kumpinu in a pieh tua banga a gimnamtui om ngai nai lo hi.

¹⁰Tua tham loin Ophir panin kham a puo Huram’ nasemte le Solomon’ nasemte in cingsing le suong manphate zong a puo uhi.

¹¹TOPA’ biehinn le kumpi inn kaleite[19] bawl nadingin kumpipa in cingsingte zang a, lasate ading lyre-te le harp-te bawl nadingin zong zang hi; tua hun masangin Judah gam sungah tua bangte kimu ngai lo hi.

¹²Khum hun sungin Sheba kumpinu’ dei nget zosie Kumpi Solomon in pie a, kumpipa kunga a pieh za sanga a tamzaw a pie hi. Tua ciengin a nasemte tawh a gamah tua nu a pei hi.

¹³Kum khat sungin Solomon tunga kipuoh kham a gihna talent zaguh le sawmguh le guh pha a,

¹⁴tuate banah sumbawlte le sumbuhte’ puohte kisim nai lo hi; tuale Arabia kumpite le gam uhpate zosie in Solomon tungah kham le ngunte a puoh uhi.

¹⁵Kumpi Solomon in a kikheng kham tawh lum a gol zani bawl hi; lum a gol khat bawl nadingin kham shekel zaguh tawp hi.

¹⁶Ama in a kikheng kham lum zathum bawl hi; lum khat ciengin kham shekel zathum ta tawp hi; tuale kumpipa in Lebanon Tulah Inn sungah tua lumte koi hi.

¹⁷Kumpipa in saiha tawh kumpi topha golpi khat zong bawl a, kham citah tawh a zut hi.

¹⁸Kumpi topha in kalei ciel guh le kham tawh a kibawl kengngapna khat nei-in, tuate pen Kumpi topha tawh kimat a, a tona pang tuohah ban ngapnate le a ban ngahnate pangah humpi ni ding a,

¹⁹kalei ciel guh mong cietah khat ciet, humpi sawm le ni ding hi. Kumpi gam khatpo-ah tua tawh a kibang kibawl ngai lo hi.

²⁰Kumpi Solomon’ tuidawnna hai zosie a unpi-in kham citah tawh kibawl hi a, tuale Lebanon Tulah Inn sunga vanzah zosie a unpi-in kham citah tawh kibawl vive ahi hi; Solomon hun lai-in ngun bangma-in a kisim sih hi.

²¹Azieh pen kumpipa’ tembawte Huram’ nasemte tawh Tarshish ah a pei uhi; kum thum sielin Tarshish tembawte khatvei tungin kham, ngun, saiha, zawngkute, le utongte[20] puoh zel uhi.

²²Tua bangin kumpi Solomon in a hauna le a pilna tawh leitung kumpi zosie sangin a tungtuongzaw hi.

²³Pasien in a lungsim sunga a guot ama’ pilna ngai dingin leitung mi zosie in Solomon’ opna a leisui uhi.

²⁴Ama kunga a haw zosie in letsong, ngun le kham tawh a kibawl nate, puonsilte, galvante, gimnamtuite, sakolte, laa-sakolte, kum sielin tampi a puoh uhi.

²⁵Solomon in sakolte le leengte koina buh tulli, le sakol tul sawm le tulni nei a, tuate leeng khuopite sungah koi a, Jerusalem khuo-a ama kungah zong koi hi.

²⁶Ama in Euphrates panin Philistia gam cieng dong, le Egypt gamgi cieng dong kumpi zosie uh hi.

²⁷Kumpipa in Jerusalem ah suongpem bangin ngun tamsah a, tuale Shephelah theitheh sing bangin taamtah sing zong a vausah hi.

²⁸Solomon adingin Egypt gam le gam zosie panin sakolte kila hi.

²⁹Tu-in Solomon gamtatna a omlai teng, a patna panin a tawpna dong, Kamsang Nathan’ Tangthu sung, le Shiloh-te Ahijah’ Thugen Kholna sung, le Nebat’ tapa Jeroboam thu tawh kisai-in Thumu pa Iddo’ Mangmuna sungah kigiel hi lo amah?

³⁰Solomon in Jerusalem ah Israel zosie kum sawmli sung uh hi.

³¹A pu a pate tawh Solomon lumton a, a pa David’ khuopi sungah kivui hi; tuale a tapa Rehoboam in ama’ za luo hi.