Read Zou EZRA 1 Bible Online

EZRA 1 - Zou bible

EZRA 1

¹Persia Kumpi Cyrus’ a maan kum khatna kumin, Jeremiah kam sung panin TOPA’ thugen a tangtun thei nadingin ama’ gam sung zosie-ah Persia kumpipa Cyrus in tangko khat sawl a, a kumpi gam zosie-ah lai tawh a kigiel kumpipa thupieh tam banga a tangtawh nadingin Persia kumpi Cyrus’ lungsim TOPA in a tham hi:

²“Persia kumpipa Cyrus in tam bangin gen hi: Vantung Pasien, TOPA in leitung kumpi gam zosie kei ei pie zo ta a, Judah gama Jerusalem ah ama adingin biehinn khat a lampieh dingin kei ei sawl zo hi.

³Note lahah ama’ mi poma - a Pasien in amate ompi taheh! - tu-in Judah gam sunga Jerusalem ah peito-in TOPA’ biehinn lamkia uheh- ama pen Jerusalem-a om Pasien ahi hi;

⁴a hingsun teng, heisung munah a teng zongun, a tenna mun vua mite in Jerusalem-a Pasien’ biehinn adingin nopthu-a biehnate banah, ngun le kham, nate le ganhingte tawh panpi ciet uheh,” a ci hi.

⁵Judah le Benjamin sunga innkuon lutangte, siempute le Levi-te Pasien’ hlagau in a lungsim uh a thamkhah mi zosie- Jerusalem khuo-a om TOPA’ biehinn lamkia dingin kisa-in a kuonto uhi.

⁶A veng a pamte zosie in a amau’ kizaw zaza a pieh ban vuah ngun tawh kibawl vanzahte, kham, nate, ganhing, le letsong manphate tawh amate a hu uhi.

⁷Nebuchadnezzar in Jerusalem pana a na puohdawh, a pasien-te’ inn sunga a na koi ahi TOPA’ biehinn vanzahte zong kumpi Cyrus in a lakhie hi.

⁸Persia Kumpipa Cyrus in tuate pusuo-in sumkempa Mithredath khut sungah ap a, Methredath in a sum phaza simin Judah uhpa Sheshbazzar’ khut sungah ap hi.

⁹Tam teng pen van sazien ahi hi: Kham kuong sawmthum, ngun kuong tulkhat, nam[1] sawmni le kuo;

¹⁰kham kuongkum sawmthum; adang ngun kuongkum zali le sawmkhat; vanzah adang tulkhat ahi hi;

¹¹kham le ngun tawh a kibawl vanzah zosie a unpi-in tulnga zali sawmguh le kuo pha hi. Salte, Babylon panin Jerusalame ah a kipeipito ciengin Sheshbazzar in tuate zosie a peitopi hi.