Read Zou EZRA 4 Bible Online

EZRA 4 - Zou bible

EZRA 4

¹Saltanna pana a kilekia-te in Israel Pasien TOPA’ biehinnpi lam uhi, ci thu Judah le Benjamin’ galte in a zah ciengun,

²Zerubbabel, Jeshua, le innkuon lutangte va nai-in amate kungah, “Kote tawh lamton bo vai, bangzieh ahei cile ko zong noma banga na Pasien uh a bie ka hi vua, tami muna ei peipi Assyria kumpipa Esar-haddon huna kipan ama kunga biehpiehna a pie ka ta bo uhi,” a ci uhi.

³Ahi vangin Zerubbabel, Jeshua, le Israel sunga innkuon lutang a omlai teng in amate kungah, “Kote Pasien adingin biehinn ka lamna vuah note ei lamhu ding kisam lo hi; Persia Kumpipa Cyrus in ei thupieh bangin Israel Pasien TOPA adingin ko guohin ka lam lel ding uhi,” a ci uhi.

⁴Tua ciengin a gam mite in Judah mite a lungkiesah vua, a inn lam ding uh a zausisah uhi.

⁵Tuale amate in zong a gelnate uh a subuoi dingin uliente guhgol pie-in, Persia Kumpipa Cyrus hun sung tungtawn le Kumpi Darius hun dongin a subuoi den uhi.

⁶Ahasueras in kumpi a sep a kipat cil lai-in amate in Judah le Jerusalem-a tengte mawsahna lai khat a giel uhi.

⁷Tuale Persia Kumpi Artaxerxes hun sungin, Mishlam le Mithredath, Tabeel, le a omlai a kithuopi teng in Persia Kumpipa Artaxerxes tungah lai a hlah uhi; tua laihlah pen Aram lai tawh kigiel a, Aram ham ma tawh kilet hi.[5]

⁸Kumpipa’ khut nei-a om ulien Rehum le laigiel pa Shimshai in Kumpi Artaxerxes tungah Jerusalem a langpanna uh lai khat a nei-a bangin a giel uhi.

⁹(tua ciengin kumpipa’ khut nei-a om ulien Rehum, laigiel Shimshai, le a kithuopi teng zosie, thukhente, palaite, uliente, Persia-te, Erech-te le Babylon-te, Elam-te a kici Susa mite,

¹⁰a lien mama le a zahtahhuoi Osnappar in a na nawkhiet, Samaria gama khuopite le Gungal gamkhen-a a tensah adangte in tua lai a giel vua - tuale tu-in,

¹¹tami pen amau’ laihlah a kiteisawn ahi hi): “Artaxerxes Kumpipa tungah: Gungal gamkhen-a om na nasemte in kang hopi uhi. Tuale tu-in

¹²nangma kung panin Jerusalem-a ko kunga ang pei Jews-te a pei zo ta uhi; amate in a gilo, mi ledo thei khuopi lamkia uhi. Amate in kulpi bawl a man kuon ta vua, khuo bulpite a puophat laitah uh ahi ci thei in.

¹³Tua khu kilamkia-in a kulpite hing kimansieng leh amate in sieh le kaih, vanlah man, le losapte ang pie nawn sih ding vua, kumpi phiengsie ang tawm tuom ding ci thu zong thei in.

¹⁴Tu-in kote ka hi uleh kumpi innpi sunga an nengkie tawh a kivah ka hi bo ziehun, kumpipa’ vangta lam a mu dingin zong ka kilawm valia sih uhi. Tua ahi ziehin na pu na pate’ thuciemtena laibute a kisuikia thei nadingin kumpipa kungah mi sawlin kang zasah uhi. Tua thuciemtena laibute en lacin tam khuopi pen tanglai panin a ledo khuopi, kumpite le gamkhente a gimsah, a khuo sunga kumpi do dingin a kikuontawna thu na mu ding hi. Tam khuopi a kisuhsietna zong tam thu hang ma ahi hi.

¹⁶Tam khuopi hing kilamkia hinlen a kulpite ang kizo sieng mawh leh Gungal gamkhen teng pen nangma’ tanh ahi nawn lo nading thu, kumpipa kungah kang theisah uhi,” a ci uhi.

¹⁷Kumpipa in tam bangin lai thuhkia hi: “Kumpipa khut nei-a om ulien Rehum, laigiel Shimshai le Samaria gama tengte le Gungal gamkhen tenga a teng na kithuopite zosie tungah kang hopi uhi. Tu-in

¹⁸kei tunga nei laihlah uh pen kiletin ka mai-ah kicientahin kisim zo hi.

¹⁹Tuaci’n keima in thupieh khat bawlin mi pawlkhat ka kansah a, tami khuopi pen tanglai-a kipanin kumpite langpangin, tami khuo sungah ledona le kumpi dona a om zing lamtah kimu hi.

²⁰Jerusalem in a thahat kumpite a na nei ngai vua, Gungal gamkhen buppi tungah na vaihawmin, amate tungah sieh le kaih, vanlah man, le losapte na kipie hi.

²¹Tua ahi ziehin tam mite a nasep a khawl nadingun thupieh khat na bawl un. Keima in thupieh khat kang bawlkia masangsie tami khuopi kilamkia lo ding hi.

²²Tua tham loin, tami tungtang nasep ding don loin na mawh om lo nadingun kidawm un; bang dingin kumpipa sup nadingin sietna khang ding ahei?” a ci hi.

²³Tua ciengin kumpipa khut nei-a om ulien Rehum, laigiel Shimshai, le a kithuopi teng mai-a a kiteisawn Kumpi Artaxerxes’ laihlah a kisim ciengin, Jerusalem-a Jews-te kungah va nawpei-in thagum hatna le thuneina suongin a nasep uh a khawlsah uhi.

²⁴Khum huna kipanin Jerusalem-a Pasien’ biehinn lam nasep khawl a, Persia Kumpipa Darius’ maan a kum nina dongin innlam nasep kizom nawn lo hi.