Read Zou EZRA 7 Bible Online

EZRA 7 - Zou bible

EZRA 7

¹Tam zaw ciengin Persia Kumpipa Artaxerxes a maan hun sungin Seraiah’ tapa Ezra, Azariah’ tapa Seraiah, Hilkiah’ tapa Azaraiah,

²Shalum’ tapa Hilkiah, Zadok’ tapa Shallum, Ahitub’ tapa Zadok,

³Amariah’ tapa Ahitub, Azariah’ tapa Amariah, Meraioth’ tapa Azariah,

⁴Zerahiah’ Meraioth, Uzzi’ tapa Zerahiah, Bukki’ tapa Uzzi,

⁵Abishua’ tapa Bukki, Phinehas’ tapa Abishua, Eleazar’ tapa Phinehas, siempupi pa Aaron-

⁶tami Ezra pen Babylon pana ang tungto ahi hi. Ama pen Israel Pasien TOPA in a piehsa Moses’ thukham a siem laithei mi khat ahi hi; tuale ama tungah TOPA a Pasien khut a op ziehin a nget zosie kumpipa in a pie hi.

⁷Kumpi Artaxerxes in a uh zaw a kum sagina kumin Israel mi pawlkhat, le siempute, Levi-te, lasate, kotcingte, le biehinn nasemte pawlkhat zong, Jerusalem ah a peito uhi.

⁸Kumpipa in a uh kum sagi a cin kum, a hla ngana sungin Jerusalem ah amate a tung uhi.

⁹Ama tunga a hepi siem a Pasien’ khut a op ziehin, a hla masa a ni khat ni-in Babylon panin khuolzin kipan a, a hla ngana a ni khat ni-in Jerusalem ah a tung hi.

¹⁰Bangzieh ahei cile Ezra in a lungtang sungah TOPA’ thukham kanin tuate zui ding le Israel gam sungah thukhamte le ngaina kipte hil a sawm hi.

¹¹Tami pen Kumpi Artaxerxes in siempu, laithei pa, Israel adinga TOPA’ thupiehnate le a thukham a siem ahi mipil Ezra tunga a pieh a kiteisawn laihlah ahi hi:

¹²“Kumpite’ kumpipa Artaxerxes tung panin van Pasien’ thukham a siem, siempu laithei Ezra tungah a kigiel khu tam bang ahi hi: Kilemna.[9] Tuale tu-in

¹³keima in ka gam sunga a om Israel mite khatpo ahi a, a siempute ahi a, Levi-te ahi zongin, Jerusalem-a pei nuom a op leh nang tawh zawhton dingin thukhentatna a kip ka bawl hi.

¹⁴Bangzieh ahei cile na khut sunga a om na Pasien’ thukham dung zui-in Judah le Jerusalem thu a kan dingin kumpipa le a thu kuppi mihing sagite in nang ang sawl uhi.

¹⁵Note pen a tenna uh Jerusalem ahi kumpipa le a thu kikuppite in Israel Pasien tungah kiphal taha a piehsa uh ngun le khamte,

¹⁶Babylon gam bup-a na mu ding uh ngun le kham zosie, mite le a siempute in Jerusalem ah a Pasien uh’ biehinn dinga lungkimtaha a pieh uh amau’ nop thu-a a kipie biehnate tawh zong a va puohton ding na hi uhi.

¹⁷Tua ciengin tami sum tawh pilvang tahin bawngtangte, tuutangte, tuunote, an tawh a biehnate ule dawnthei a biehnate na lei ding vua, Jerusalem-a na Pasien uh’ biehinn sunga maitam tungah tuate na pie ding uhi.

¹⁸Ngun le kham a val teng na Pasien uh’ deina tawh kituohin na guolhaw tawh hoi na sah bangun na zang thei ding uhi.

¹⁹Na Pasien uh’ biehinn sunga zah dinga ang kipie vanzahte, Jerusalem Pasien mai-ah na tut ding uhi.

²⁰Nang in pieh dinga mawpuohna na nei na Pasien biehinn dinga a kisam adang khat popo, kumpipa’ sumkholna panin na pie ding hi.

²¹“Keima, Kumpi Artaxerxes in Gungal gam sunga om sumkem zosie kungah tam bangin thu ka pie hi: Vantung Pasien Pa’ thukham lam a siem laithei, siempu Ezra in na tung vua ang nget poma,

²²ngun talent zakhat, mangbu cor zakhat, lenggazu bath[10] zakhat, sathau bath[11] zakhat, le ci a dei zaza na pie ding uhi.

²³Vantung Pasien’ thupieh popo, vantung Pasien’ biehinn adingin pawnthaw tahin kibawl ding hi. Tua ahi sihle kumpipa gamsung le a tapate tungah lungthahna ang tung ding hi.

²⁴Siempute, Levi-te, lasate, kotcingte, biehinn nasemte, ahi sihle tami Pasien’ biehinn sunga nasemte khat popo tung panin sieh le kaih ahi a, vanlah man ahi a, losap ahi zongin lah ding thu na nei lona uzong kang zasah hi, ka ci hi.

²⁵“Tua hi a, nang Ezra in na nei dinga ang kipie Pasien’ pilna tawh kizui-in, Gungal gam sunga a om na Pasien’ thukhamte a thei mi zosie tunga thu khen dingin ulien vaihawmte le thukhente koi in. Nang in Pasien’ thukham a thei lote na hil ding hi.

²⁶Na Pasien’ thukham le kumpipa’ thukham a mang lo poma, sina ahi a, hawlkhietna ahi a, a neisate uh lahpiehna ahi a, thongkhiehna ahi zongin, khautahin thu kikhen ding hi.

²⁷Jerusalem-a om TOPA’ biehinn a thupi suo thei nadinga kumpipa’ lungtang sungah tam banga nate a guonpieh pa,

²⁸kumpipa le a thu kuppite, le kumpipa’ mi thahat uliente mai-a itna kip tawh ei it, i pu i pate’ Pasien, TOPA in thupha nga taheh. Keima tungah TOPA ka Pasien’ khut ang op ziehin tha ka nga a, kei tawh a peito dingin Israel panin makaite ka khawm hi.